Isaya 3 - KITABU KITAKATIFU

Likalagira avandu va Jerusalemi ni Ivuyuda

¹ Kalunu Yahova, Yahova Wuvunyali, aveeye ahimbi kutulizaho ivindu viosi kandi vandu vosi avahaana ovokonyi ku vandu va Jerusalemi ni Ivuyuda; Azizaa kutulizaho avandu vosi avahaanaa ovokonyi ku Jerusalemi kandi Ivuyuda. Alatulizaho viukulia viavo viosi kandi na amazi gaavo goosi,

² avasaza vaduukiru kandi avasikari vaavo, avakalagi kandi avaporofeti vaavo, avasigitiri kandi avakulundu vaavo,

³ avanene vamahi kandi aviimiliri vaavo, avateti kandi vuli mundu utumikira vusigitiri kokora vindu viokogenyia.

⁴ Yahova alakakole avayaayi kwamiiha avandu.

⁵ Vuli mundu alakolera wache goosi aganyala. Avayaayi si valahaana luyali ku avakulundu vaavo mba, kandi avandu vataveeye nuvunyari si valahaana luyali ku avanene vaavo mba.

⁶ Ing'inga yiza lwa aviiko vi inyumba ndala valakatovole mulala kuvo nu kumuvolera, “Ivi ove mwimiliri wiitu mu ing'inga yu vudinyu yiyi, kigira oveeye ninguvu yu kwivika.”

⁷ Navuzwa mundu uyu alakativuli ndi, “Inzi mba! Sinyala kumukonya mba. Munyumba yange inzi simbeeye ni kindu kali kikuzu mba, viukulia kinga zinguvu. Mutangoli kuva mwimiliri winyu mba!”

⁸ Jerusalemi imali kudivizwa! Na Ivuyuda imali kugwa vindu viosi via vavoola kandi via vakoolaa vivihiliriza Yahova; na vanyega Nyasaye; havulavu.

⁹ Lihenza lie zimoni ziavo lilorekiza kuva liu kuhing'ana. Vamali kokora uvwoni havulavu, kuli lidaala linene lia Sodoma. Vamali kudiva! Vamali kwivika mu vudamanu aveene.

¹⁰ Avandu valungi valava nu vusangali, kandi ivindu vilava vilahi kuvo. Valalia viologeli lwavo.

¹¹ Navuzwa avandu vadamanu valadivizwa; agavakolera avandi, navo kandi valakolerwa ndio.

¹² Avayaayi vadambiza avandu vange, avakali vavamihaa. O, avandu vange aviimiliri vinyu vamuchaminya kutura kunzira inungi.

Yahova yakalagira vandu veve

¹³ Yahova yikaye kondeve yeye yilikalaga; kandi yetegeki kukalagira avandu veve.

¹⁴ Alakalagira avakulundu kandi aviimiliri vavandu veve. Alombaa vivuni: “Mumali kulanya mulimi gwa amazabibu, kandi zinyumba zienyu ziizuye vindu via mwalanya kutura ku vadaka.

¹⁵ Muvura vunyali kudambiza avandu vange, kandi mwenyoola uvuhinda kulwa avandu vadaka, Inzi mwami Yahova Wuvunyali mali kovora.”

Lieganihiza ku avakali va Jerusalemi

¹⁶ Yahova avoora, “Heenzi kuli avakali va Jerusalemi vigingiraa! Vagenda ni vategizi mang'oti gaavo mwigulu. Vavunyavunya zimoni ziavo vuli kazozo. Vagenda ni vaseena, kandi ivisambo ni visara ku vilenge viavo.

¹⁷ Navuzwa ndavaha amageri, ndavega mitwi jiavo, na valatigala nu luhale.”

¹⁸ Lidiku lizaa lwa Yahova alituliza ho vindu viosi via vakali va Jerusalemi vigingiraa ku: Ivisambo via vevoha ku zimbigiyi, ku mitwi, mu magoti;

¹⁹ kandi ku makono gaavo kandi zinguvu zikunikaa muzimoni ziavo,

²⁰ kandi zigudwa ziavo, nu uvusigitiri, ni iviseve vifunya mwayu,

²¹ kandi ni zimingiri zia vevoha ku videte, kandi mumuulu gaavo;

²² kandi zinguvu ziavo zindahi, ni visibao, kandi ni zinguvu zindi ziukwiyuhira, kandi vibeti viavo,

²³ kandi ni vielolero, ni zikatani zindahi, kandi ni zinguvu zindambi zinzasasu ziavevohaa ku mitwi jaavo.

²⁴ Muvogono vwukutumikira ivifunyaa mwayu, valafunya vugundu, mu vogono vwu kwevoha misibi mirahi, valevoha zimbunu, havogono hi liisu lilahi, valava ni chole, na havogono hi zinguvu zindahi, valivika zinguvu zia madali. Ligondo liavo lilahi lilagirunganywa kuva zisoni.

²⁵ Avasaza vilidaala linene, Yee, kali avasaza vi zinguru ligali valitirwa mu vulwani.

²⁶ Avalindi vu mu virivwa viavo valakaliri nu kusioma. Lidaala linene lia Jerusalemi lilatigala liere, kuli mukali walekwa yikaye hasi naveeye chahonyo.