Isaya 28 - KITABU KITAKATIFU

Lieganihiza ku vwami vwa Ivaale

¹ O, vayaayi, kivi keveeye ku vwami vwa Isiraeli! Uvukumi vwavwo vukamulukaa kuli kimuli ku mitwi javimiliri vaavo vahambiku. Mitwi jaavo juluyayi jivakiywi maguta gafunyaa mwayu, navuzwa vaagoni hene yaho avahambiku kuvita kegero.

² Yahova aveeye nu mundu mulala Wuvunyali kandi wizingulu wetegeki kuvingilira uyu uliizaa kuli imbura ya magina, kuli imbura yologelera, kuli kiihi cha mazi manene ganyagulaa vwangu vwangu, na alavazooma hasi nukuvaguuta.

³ Itaji yi lielola lia vimiliri vahambiku va Isiraeli, iladuvagirwa hasi ni wivirenge.

⁴ Uvukumi vukamulukaa vwa vimiliri vuluyayi yavo vulatula ho kuli makuyu gukutanga gi ligesa, agagulwa nukuliivwa nigakenga.

⁵ Lidiku liizaa lwa Yahova Wuvunyali alakave kuli itaji yuvukumi vwikimuli kigira avandu veve avalihononoka.

⁶ Alakahaane zing'anagani zie likalaga lirungi ku yavo avatumikaa kuli vakalagi, na uvuluviliri ku yavo avakingaa virivwa via madaala manene kutura ku lingilirwa.

Isaya na vaporofeti vahambiku Vivuyuda

⁷ Kali vaporofeti navasaalisi vaveeye vahambiku ligali kali vagenda nivayekayeka vanweeye iwaini namalwa malulu kali vikigitara mugoyana. Avaporofeti vaveeye vahambiku ligali kali sivanyala kumanyiriza malola ga Nyasaye atumaa mba, na vasaalisi navo kandi vaveeye vahambiku ligali kali sivanyala kukalaga viyaalo viletwaa kuvo mba.

⁸ Zimesa ziosi aha viikara ziizuyi maluki, na sihaveeye ho na havundu hanifu hatigaye mba.

⁹ Vililira kigira inzi. Vavoola, “Mundu ula aganagana yigizaa vwaha? Nivwaha wenyaa makuva geege? Gaveeye malahi vuzwa ku vana vadoto avamali kolekera kunuuna!

¹⁰ Agerizaa kukwigiza induguta ku induguta, luvaso ku luvaso, liegizu ku liegizu.”

¹¹ Niiva simulambuliriza, hene yaho Nyasaye alatumikira avandu vageni avamoloma zinimi zihulilikaa kuli zing'eni kumwigiza agamuduukira kumanya.

¹² Yahaana vosoosi ni lielemeriza ku munyi mwosi, navuzwa mwasuura kumuhulira.

¹³ Yicho nicho kivuni kigira Yahova azizaa kumwigiza induguta ku induguta, luvaso ku luvaso, liegizu ku liegizu. Maku mulikigitala ku vuli kika cha muduukaku; mulaatwa zing'oma, mulahambwa mu mitego, kandi mulahilwa mu vuhambe.

Ligina liu mukoona lia Ziyoni

¹⁴ Kalunu munyi vigingiri avamihaa hano mu Jerusalemi kaluhu, muhuliri icha Yahova avoora:

¹⁵ “Mwiyizominyaa ndi mwalomba lilagana liuvuhambani ni likuza, mwalomba livugilirizana ni kivala chavakuzu. Lwikivi kiiza sikilakakudiiri mba, kigira mwasuuvira mu vovehi nuvugadi kuva chukwivisamu chiinyu.”

¹⁶ Yiki nicho cha yahova Wuvunyali avoora: “Mbikaa musingi mudinyu kandi gwizingulu mu Ziyoni. Mbikaa ligina liu mukoona lidinyu ligali ukwa makuva yaga gang'odwa, ‘Lisuuvira liveeye liezingulu liveeye liokwikuzira kandi.’

¹⁷ Likalaga lirungi lilava mugoye gwi kibimu chu musingi na uvusuuvirifu vulava kibimu chi kabiro yagwo.” Imbura yamagina ileeya ovovehi vwosi vwa musuuviraa mu na migelera gilononyia liekinga lienyu liosi.

¹⁸ Hene yaho, lilagana lia mumali kolomba nilikuza lilatulizwa ho, na livugilirizana lia mulombi ni kivala cha vakuzu lilatulizwa ho. Lwikivi kiduukaa, mulaguutwa ligali.

¹⁹ Kilamuduya vuli ing'inga, vuli mugamba. Kuduuka mwikuziri kucho mbasu nuvudiku. Vuli likuva lihia kutura ku Nyasaye lilakaleete uvutihizi vonene!

²⁰ Mulakave kuli mundu mu zing'ano, ogerizaa kogona mu kidali keveeye chimbi gidi kuye kali sianyala kwiinyira vulungi kucho mba, numulingedi gutaveeye muvambalalu kali sianyala kwifuma mba.

²¹ Yahova alakalwaane kuli yakola ha kiguru cha Perazimu kandi mu livona lia Gibeoni, kunangwa aduuki kokora icha yenya kokora - kali vikolwa vivie niviveeye viokogenyia. Alatwekiza miyinzi jijie jokogenyia.

²² Mutaseki lieganihiza lia muheezaa mba! Niiva mulakola ndio, vulave vudinyu ligali ku munyi kohononoka. Mali kuhulira litovola lia Yahova Wuvunyali aganagana kudiviza kivala choosi.

Ovogeri vwa Nyasaye

²³ Muhuliri icha mboraa; mutegize matu ligali ku ga muvooleraa.

²⁴ Siaveeye ho nu mulimi uzizagilira vuzwa kulima milimi jije nukujetegekiza kutaga mba.

²⁵ Lwu mulimi amali kuvuusa milimi jije vulahi, amiizaa vuguza vwi zinguza kuli zimbindi ni idania. Atagaa zimbaso zie ingano kandi atagaa zing'ano kuzindulu zie milimi jije, zindi ziuvuswage.

²⁶ Amanyi vulahi kuli anyala kokora miyinzi jije, kigira Nyasaye yamala kumwigiza.

²⁷ Siatumikilaa kigulumi kilitu ukuhuula zimbindi anoho uvuguza vwi idania mba; mu vogono yivwo atumikiraa zisaala zinyangu ziduukanaa.

²⁸ Siaduvulanyia ingano ku lizizagilira kuhuura vugira kolekera, kandi yamanya kugihuula mu livitizira ku ligare lie zing'ombe vugira kusionolanyia.

²⁹ Ovogeri yivu vwosi vuturaa ku Yahova Wuvunyali. Ovolohizi vwa Nyasaye voveeye vwokogenyia kandi vogeri vwivwe voveeye vuduukiru ligali.