Isaya 27 - KITABU KITAKATIFU

¹ Lidiku yilio Yahova alakatumikiri kivavi chiche chugi chi zinguru kandi chukwita kuhaana mageri ku Leviazani, goyoka gwisiitasiitaa, ooveeye gunyama gonene gwukutihiza gomenyaa munyanza.

² Lidiku yilio, Yahova alakavoole ndi, “Mwimbi lwimbu kigira mulimi gwange mulahi gwa mazabibu!

³ Inzi Yahova mbeeye mulindi wagwo kandi ngusamaa amazi zing'inga ziosi, ngulindaa vudiku numbasu gase mundu alagwononyia.

⁴ Simbeeye nu vutima ni kizabibu zana mba. Niiva amafwa ni vigunzanguva kingiliyi kizabibu! Inzi ndakalwaani navio nukuvisamba viosi.

⁵ Navuzwa niiva avasigu va vandu vange valeenya likingwa kutura ku inzi, leki valombe mirembe ninzi. Yee, leki valombe mirembe ninzi.”

⁶ Mu madiku gaaza avandu va Isiraeli, visukululwi via Yakobo, valahila imiri hasi kuli musaala, kandi valalaviza kimuli nukusivuka. Lirova liliizula makuyu garamaa.

⁷ Yahova akiri kuhaana mageri malulu ku Isiraeli kuli yahaana ku vasigu vaavo, kandi vakikiri kogotiza vasaza vanyingi mu vulwani kuli vasigu vaavo vagotiza.

⁸ Yahova yahaana mageri ku avandu veve lwa yavahila mu livahaminywa. Yaavatulizaho mu imbuza yi kivi kutura Ivugwi.

⁹ Navuzwa uvwoni vwa Isiraeli vulakasamifwi vuzwa lwa magina guvwaali vwi vifananyi galisievwa kuli ichoka, kandi uvwali vwi vimuli anoho vifananyi viu munyasaye wikikali Ashera vilivula kulekwa.

¹⁰ Lidaala linene liembinga litigaye mang'anye. Liing'anyiywi kuli ligendanyama iliere. Ligwiyi uvwayiru vwi mitugu, aha ginyala kososera nukwaaya.

¹¹ Zisia zie misaala ziayuma kandi ziavunika na avakali vazitenyaa kuli iziingu. Kigira avandu si vamanyi kindu mba, Nyasaye mulombi wavo sialavavera zimbavasi mba.

¹² Lidiku yilio, kutura ku mugera gwa Efurate kuduuka ku lwako lwa Egebeti, Yahova alavungiza avandu veve sa mulala, kuli mundu yahulanyia ingano kutura ku mukuzi.

¹³ Lwilidiku yilio liliduuka, kisiriva kilakakubwi ukulanga avandu vosi va Isiraeli avaari nivahaminyirwa mu vivala via Asiria na Egebeti, viirane. Valakaze kusigamira Yahova mu Jerusalemi, ku kiguru chiche kitakatifu yiki.