Isaya 26 - KITABU KITAKATIFU

Nyasaye alaha vandu veve liguuta

¹ Lidiku liizaa lwa vandu valakimbi lwimbu yilu mu kivala chi Ivuyuda: Lidaala linene lietu liveeye lie zinguru! Nyasaye mwene akingaa madigi galio nizimbinga zialio!

² Mwigule virivwa via madaala manene na muleke ihiiri isuuvirifu yingiri, ihiiri ya vandu vakora agaveeye malungi.

³ Ivi, Yahova, uhaane mirembe midukiru ku yavo aviziganagani ziveeye zindukiru. Kandi vaviika lisuuvira liavo mu ivi.

⁴ Musuuviri mu Yahova mihiga ni mihiga kigira alakukinga kazozo.

⁵ Umali kugehiza yavo avaari avigingiri; umali kudiviza lidaala linene liavaamenyaa mu; umali kusambulanyia nukutuura madigi galio hasi mu luguki.

⁶ Kalunu lidaala linene yilio, liduvaganyirwa hasi ni virenge via vandu vadaka na vadambi.

⁷ Yahova, ulungikizaa zinzira ziavalungi, inzira ya vagenda ku eveeye inungi.

⁸ O, Yahova kunyi kolondaa uvulariri vuvwo, kandi kuvikaa lisuuvirizwa lietu mu ivi; ni ivi weng'ine wa kwegomba kwizuliza.

⁹ Ngwegomba nu mwoyo gwange gwosi uvudiku vwosi lwa ukalagiraa lirova harara na vandu valio, vosi valiiga uvulungi vuveeye ki.

¹⁰ Kali niiva oveeye ni zimbavasi na vandu vadamanu, sivigaa kokora uvulungi mba. Kali hano, mu kivala cha vandu valungi, vandu vakekola vuzwa uvudamanu. Vasuura kuvugilira ovonene vuvwo.

¹¹ Avasigu vovo sivamanyi ndi ulakavahe mageri mba. O, Yahova, uvaviiki mu zisoni na oleke vasaliri. Leka vasaliri maduywa aga umali kuvetegekizira. Uvamanyie kuli uyanza avandu vovo.

¹² O, Yahova, ulakuha ligasizwa; vindu viosi viakonyoolaa viveeye miyinzi ja makono googo.

¹³ O, Yahova, Nyasaye wiitu, kwamala kwamiifwa navandu vandi, navuzwa ivi weng'ine oveeye Yahova wiitu.

¹⁴ Kalunu vaakuzi, na sivalava mwoyo kandi mba; mioyo jaavo sijilavuuka kandi mba, kigira ivi umali kuvaha mageri kandi kuvadiviza ligali. Sihaveeye ho numulala uvizuliza kandi mba.

¹⁵ O, Yahova, umali kuvirukiza ihiiri yitu; umali komeeda zinzako zie kivala chayo zimbega ziosi, na yaga gakoleeteye uluyali.

¹⁶ O, Yahova, oheeye avandu vovo mageri, na mu vuzunu vwavo vululu, vasaala ku ivi.

¹⁷ O, Yahova, ivi okoli kunyi kuliri vudinyu, kuli mukali aliraa mu vuzunu mu lilumwa liu mwana.

¹⁸ Kwali mu vuzunu vwi liivula, navuzwa kwivura kindu mba! Sikwanyoola liguuta liosi kigira kivala chietu mba. Sikwanyoola kindu mba.

¹⁹ Avandu viitu avamala kukuza valava mwoyo kandi! Miviri jaavo jilasimuguka? Yavo vosi avagonaa mu vilindwa viavo, valavuka nukwimba nuvusangali, kuli iliime lihemahema likindizaa lirova, nindio Yahova alakasimugukizi yavo vakuza kale.

Likalagirwa kandi lihonywa

²⁰ Avandu vange, muzie mu zinyumba zienyu, kandi muhaane viliango. Mwivisi ku ing'inga engekeeke kuduuka lwu vutima vwa Nyasaye vovomboloka.

²¹ Yahova yaazaa kutura mu vomenyo vwivwe vwu mwigulu ukuhaana mageri ku avandu vu mulirova kigira uvwoni vwavo. Avandu aviita vandi mu vwivisu ku lirova valavulika, kandi lirova sililavisa yavo avamala kwitwa mba.