Isaya 24 - KITABU KITAKATIFU

Yahova alakahaane mageri ku lirova

¹ Henza, Yahova azizaa kudiviza lirova nukulikola hazwa. Alagirung'anyia lirova nukusalanyia vandu vamenya mulio.

² Vuli mundu alava ni kivi kilala chere: avasaalisi navandu, avatugwa na vanene vaavo, avaguli navagulanyi, avegobizi na vegobaa, avadaka na vatugi.

³ Lirova lilononywa ligali nukudivizwa. Yahova umali kovora na galakolwa ndio.

⁴ Lirova liumaa nukuniala; Lirova liosi lidedekeraa; Lirova niligulu, viombi vigundaa.

⁵ Avandu vononyi lirova mu livunanyia lilaga lia Nyasaye kandi kuvula kolonda lilaga lilie liayalomba kuva ho mihiga ni mihiga.

⁶ Kunangwa Nyasaye umali kulandiza kilaamo ku lirova. Avandu valio vasalira kigira uvudamanu vwa mali kokora. Avamenyaa ku lirova vagehaa. Yee, avatigaye mwoyo ni vakekeeke vuzwa.

⁷ Mizabibu jinialaa, na iwaini sienyoolekaa mu vodoto mba. Vuli mundu uwaali nuvuyanzi, aveeye novovereri kalunu,

⁸ zinyimbu ziuvusangali ziuvukana kandi zie zindumba zikiring'ani.

⁹ Sivalanwa iwaini nukwimba zinyimbu ziu vusangali kandi mba; Amalwa gagwiyi amalulu ku yavo avaganwezaa.

¹⁰ Vindu viagoyana mu lidaala linene, vuli mundu yihaniyi munyumba avuli kusalilizwa.

¹¹ Haveeye ho nililira linene mu zinzira kigira sihaveeye ho niwaini mba; uvusangari vwosi vumali kohera; uvuyanzi vumali kutulizwaho mulirova.

¹² Lidaala linene lilekeywe mu vwoneku uvwere, na virivwa vialio vivunagiywi.

¹³ Yiki nicho ichazachekoleke mu vuli ihiiri ku lirova liosi. Galakave kuli keheri chi ligesa, lwa mizeituni jilakave nijimali kusung'uswa kutura ku vuli musaala kandi mazabibu gukumaliriza gamali kwagurwa kutura ku vuli muzabibu.

¹⁴ Yavo avatigara mwoyo valakimba kigira vusangali. Yavo avaveeye Imadioli valavoora kuli ovonene vwa Yahova voveeye,

¹⁵ kunangwa, yavo avaveeye ivugwi valahaana uvukumi ku Yahova. Avandu vamenya himbi ninyanza, valizominya Yahova Nyasaye wa Isiraeli.

¹⁶ Kutura ihale ku zinduru zie lirova kuhulira zinyimbu: “Vukumi voveeye ku oo mulungi wengine.” Navuzwa ndavoora, “Inzi mbeeye vuzwa, Inzi mbeeye vuzwa! O, vayaayi kivi keveeye ku inzi! Umugadi azaama! Nuvugaadi umugadi azaama!”

¹⁷ Uvutihizi, ovogo nimitego vimulindiliraa, O, munyi avamenyaa ku lirova.

¹⁸ Ku vosi ogerizaa kwiruka kutura ku vutihizi alagwa muvogo, na oyo ogeriza kwiruka kutura ku vogo alagumirwa numutego. Migera ji imbura jilasunduka kutura mwigulu, na imise ji lirova jiladengeya.

¹⁹ Lirova lilavunika ligali nukwadika kandi liladengeyizwa ligali.

²⁰ Lirova liene lilayekayeka kuli muhambiki nukuhunguzwa kuli kidioli kinuyangwa mu imbura yi kiihi. Lirova liminiywi nuvuliduhu vwa uvwoni vwalio; Lilagwa na sililasingira kandi mba.

²¹ Ing'inga yizaa lwa Yahova alihaana mageri kuzinguru lie igulu kandi na vamihaa ku lirova.

²² Nyasaye alavungiza avami harara kuli avahambe mu vogo. Alavahanira muvuhambe kuduuka ing'inga yi lihevwa mageri gaavo iliduuka.

²³ Umweli gulamwama tititi, kandi liuva sililaaka kandi mba, kigira Yahova Wuvunyali alava mwami. Alamiiha mu Jerusalemi, ku kiguru cha Ziyoni, kandi aviimiliri va vandu valalola uvukumi vwivwe.