Isaya 23 - KITABU KITAKATIFU

Likuva lia Yahova Kigira Foenisia

¹ Yili ni likuva kigira Lidaala linene lia Tiro. O, munyi aveelemi va amato ga Tarishishi, mukubi zikwiri ni liverera, kigira havundu ha amato ginyu gasingiraa mu Tiro hamali kwononywa, zinyumba kandi hokososera hatigaye amang'anye. Likuva yili livuliywi ku munyi lwa mato ginyu gilanaa kutura Saipurasi.

² Munyi avakiranyi va Sidoni, mwatuma avatumwa kwambuka inyanza,

³ Kuzia kukiranyia uvuswage vwameraa mu kivala cha Egebeti, kandi kukiranyia ni zihiiri zindi ziosi.

⁴ Munyi avandu vi Lidaala linene lia Sidoni, muvikiywi mu zisoni! Inyanza kandi luliva lwinyanza enene lukusunda nolovoolaa, “Inzi si ndayivula ku avana vosi mba, kandi si ndaavirukiza ku avana vayaayi anoho vakaana mba.”

⁵ Kali lwa vandu vi kivala cha Egebeti vahulira ndi Lidaala linene lia Tiro limali kudivizwa, valava ni ligenya kandi lihenda mwoyo.

⁶ Munyi avandu vamenyi muvisuru vie inyanza, mukubi zikwiri ni liverera! Mugerizi mwirukiri mu lidaala lia Tarishishi!

⁷ Yili linyala kuva lidaala linene lia Tiro liu vusangali, lianyoreka mu madiku gakale? Yili ni lidaala linene lia avandu valio vaambuka inyanza kuzia kolomba ovomenyo muvivala vindi vie ihale?

⁸ Yaali vwaha uyu, uwalohiza kwononyia Lidaala linene lia Tiro, lidaala liali linene ligali, iliavakiranyi valio vaali avanene, avasaza vaali vuluyali olonene ligali mu lirova?

⁹ Yahova Wuvunyali, niye walohiza yaga, aduuki kwononyia no koleganyia yavo avaari nu luyali mu lirova liosi.

¹⁰ O, munyi avandu va Tarishishi; mwizuli mu kivala kuli mugera gwa Naili, kigira sihaveeye ho nu mundu unyala kumukinga kandi mba.

¹¹ Yahova umali kunyiira mukono gwigwe kunyanza nukwononyia uvwami. Umali kuhaana lilaga kwononyia havundu hu vukala mu Foenisia.

¹² Avandu vi lidaala linene lia Sidoni vuyanzi vwinyu vokoti, na vandu vinyu vaveeye mu lidambizwa. Kali niiva valirukira mu kivala cha Saipurasi, si valanyora vosoosi mba.

¹³ Sivali vandu va Siria mba, navuzwa vaali vandu va Babiloni valeka zinyama ziu muvulimu nizimenya mu Tiro. Vingilira, nivasambula zimbinga zia Tiro, kandi nivaleka lidaala yilio mu mang'anye.

¹⁴ O, munyi aveelemi va amato ga Tarishishi, musiome, kigira zimbinga zie Lidaala lienyu linene zimali kwononywa.

¹⁵ Ing'inga yiza lwi Lidaala linene lia Tiro lirakivililwi ku mihiga 70, yiyi eveeye kuli ing'inga yi limenya liu mwami. Lwi mihiga yiji jiduuka ku keheri, Lidaala lia Tiro lilakave kuli lwimbu lwi liraya.

¹⁶ “Ivi Mulaya mudaka wiviriywi! Vugula uvukana, uzie mu lidaala linene, ukubi uvukana kandi wimbi zinyimbu kunangwa uduuki kwizulizwa kandi.”

¹⁷ Lwing'inga yi mihiga 70 jiduuka ku keheri, Yahova alakilaniri lidaala linene lia Tiro, kandi lililana ku avanyasaye vandi nukuvasigamira harara nu vwamihi vundi vwosi vwumulirova.

¹⁸ Likiranyia liu vutugi vwalio, vulatakaswa ku vutumiki vwa Yahova; uvutugi yivu si vulavikwa mukedeera mba, navuzwa vulatumika ku yavo avasigamiraa Yahova, kunangwa vaduuki konyoora viukulia kandi lieviika zinguvu kolondekana ni lienya liavo.