Isaya 21 - KITABU KITAKATIFU

Amalola Kigira liigwa lia Babiloni

¹ Yili ni likuva lia Nyasaye kigira Babiloni Kuli vihuzuzi vinene kutura Negebu vihuzaa kuvitira hagati hi changalangwe, ikivi kilaaza kutura mu kivala chi litihiza.

² Mali kolola malola gi vindu viukusaliriza ligali, malola gavandu vukuzama nukudiviza. Liihi lia Elamu, mwingiliri! Liihi lia Media, kumbirizi madaala manene! Nyasaye alakaherizi lisalirizwa liosi lia vandu va Babiloni vamali koleta.

³ Aga ndalora nukuhulira mu malola gamali koleta uvuti vonene kandi uvuzunu vwizuli mu inzi; uvuzuunu vululu kuli vwu mukali oveeye mu lilumwa liu kwivura.

⁴ Mutwi gwange govodong'ana, kandi ndegeraa nuvuti. Nzegomba umugolova guduuki, navuzwa mugolova zana si gondeteye kindu mba, nitali litihiza.

⁵ Mu malola zana, lilia linene lietegekiziywi; amadali gaaliywi vageni viikare ku. Avandu valiza nukunwa. Nonoho, mwoyo gwukulaga kuhulilikaa; “Vimiliri! Mwetegekize zinguva zienyu!”

⁶ Maku Yahova yambolera, “Zia uviiki mulindi wokohenza, umuvolere avoole ichalolaa.

⁷ Niiva alalola avandu nivaazaa nivanini ku zibarasi, vaviri ku vaviri, kandi avandu nivanini ku zibunda kandi ku zing'amia, kuduuka avahenzerizi vulahi ligali.”

⁸ Maku mulindi oyo yahanzuka navoora, “Mwami, inzi singiyi igulu ku munara gwo kohenzera ku mu vulindi vwange mbasu nuvudiku!”

⁹ Nonoho, avandu vazaa! Avandu vanini ku zibarasi, vaviri ku vaviri; Mulindi ahaanaa makuva, “Lidaala lia Babiloni limali kugwa! Vifananyi viosi viavaasigamiraa vigwiyi hasi.”

¹⁰ Avandu vange va Isiraeli, mumali kuhuulwa kuli vuswage. Navuzwa kalunu mali kumulandizira makuva malahi gamali kuhulira kutura ku Yahova Wuvunyali, Nyasaye wa Isiraeli.

Likuva lia Yahova kigira Edomu

¹¹ Yili ni likuva lia Nyasaye kigira Edomu. Mundu mulala yanangaa kutura mu kivala cha Edomu navoora, “Mulindi Wokohenza, navuchi ng'inga ki? Ombolere ng'inga lwa vucha!”

¹² Ndaativura, “Umugamba guzaa, navuzwa uvudiku vulilana kandi. Niiva wenyaa koteeva kandi, wirane ma oteeve.”

Likuva lia Yahova kigira kivala cha Arebia

¹³ Yili ni likuva lia Yahova kigira Arebia. Munyi avandu va Dedani, avagendi valombi hokososa mu kivala chi changalangwe cha Arebia,

¹⁴ muhaane mazi ku vandu vuvuluhu avaazaa ku munyi. Munyi avandu vi kivala cha Tema, muhaane chukulia ku yavo avahaali.

¹⁵ Avandu virukaa vaduuki kohononoka kutura ku vivavi vimali kwetegeka kuviita kutura ku uvuta vwetegeki kulasa, kutura ku vuhimwa vwosi vwi liihi.

¹⁶ Maku Yahova yambolera, “Mu muhiga mulala, ovonene vwi ihiiri ya Kedari vuladuuka ku keheri.

¹⁷ Avalasi vimivano juvuta vaveeye vasaza valuviliri va Kedari, navuzwa vakekeeke kuvo valatigala. Inzi Yahova Nyasaye wa vandu va Isiraeli mali kovora.”