Isaya 2 - KITABU KITAKATIFU

Mirembe ji mihiga ni mihiga

¹ Yili ni likuva liovoporofeti lia Nyasaye yahaana ku Isaya, mwana wa Amozi kigira Ivuyuda na Jerusalemi:

² Mu madiku gaaza, kukigulu kwi Litembeli lia Yahova liumbakwa kilava igulu ligali kuvita vigulu vindi viosi. Na zihiiri zinyingi valagenda kuzia kucho.

³ Avandu avanyingi valaza nivavoora, “Gendi kuzie ku Kiguru cha Yahova, ku Litembeli lia Nyasaye wa avandu va Isiraeli. Alakwigiza agayenya kunyi kokole. Kulagenda kuzinzira ziamali kotovola, kigira amalago ga Yahova gaturaa Jerusalemi. Kandi amolomaa ku avandu veve kutura Ziyoni.”

⁴ Yahova alaleeta mirembe hagati hi lihing'ana lie zihiiri zinene. Valatura vivavi viavo kuva amagembe, kandi amatimu gaavo kuva zingonono, zihiiri si zilazia kulwaana zihiiri zindi mba, anoho si ziligiza avandu vaavo uvulwani mba.

⁵ Kalunu, ivisukulurwi via Yakobo, hambi kogende mu vulavu vwa Yahova akuheezaa!

Vwigingiri vulakadivizwi

⁶ O, Nyasaye, ivi umali koleka vandu vovo, ivisukulurwi via Yakobo! Kivala chizuuyi uvusigitiri kutura Ivugwi kandi kutura mu kivala cha Avafilisitia. Avandu valonda imiima javageni.

⁷ Kivala chavo chizuuyi ifeza kandi izahabu, na keheri sikeveeye ho ku mavikiru gaavo mba. Kivala chavo chizuuyi zibarasi zinyingi, kandi keheri sikeveeye ho ku magare gaavo gu vulwani mba.

⁸ Kivara chavo chizuuyi vifananyi vinyingi ligali, kandi vasigamira vifananyi via vamali kolomba na amakono gaavo aveene.

⁹ Kunangwa avandu yava valagehizwa nu kuvikwa mu zisoni. Yahova, utavasamiiha mba!

¹⁰ Valingira mu zimbangaywa zie vigulu kwivisa mu, anoho valayava malina kunangwa vagelizi kwiluka kutura ku vutima nukwivisa kutura kuzinguru zia Yahova, nuvukumi vwivwe.

¹¹ Ing'inga yiza lwu luyaayi lwu mundu lulakahere, kandi liegingira liu mundu liradivizwa. Maku Yahova yeng'ine alakahevwe luyali.

¹² Ing'inga yene yeyo, Yahova Wuvunyali alakagehize vosi avizingulu, kandi yavo vosi vikirage ni liegingira.

¹³ Yahova alakadivize midaragwa mitambi josi ja Lebanoni, kandi misaala josi ja Muhaloni jiveeye mu kivala cha Bashani.

¹⁴ Yahova alakikize vigulu viosi vinene ni vikekeke,

¹⁵ minaara josi jatambiha, kandi amadigi goosi ga vuli imbinga.

¹⁶ Yahova alakakole zimeri ziosi zinene zia Tarishishi kandi ziveeye zindahi ligali kwiyina mu mazi.

¹⁷ Luyaayi lwu mundu lulagehizwa, kandi liegingira liu mundu lilikizwa. Maku Yahova yeng'ine alakahevwe luyali mu lidiku yilio.

¹⁸ Kandi vifananyi viosi vilakatulizwiho ligali.

¹⁹ Avandu valakingiri mu zimbangaywa zia magina gi vigulu, kandi mu malina gu mu lirova kunangwa vahononoke kutura ku vutima vwa Yahova, kandi kwivisa kutura kuzinguru zizie nu vukumi vwivwe, lwa yaza kodegeriza lirova.

²⁰ Lwa lidiku yilio liliduuka, valakasiuvi vifananyi vie izahabu ni ifeza via velombera aveene kuvisigamira, valakavilekele zimbuku na manyinya.

²¹ Lwa Yahova yaazaa kodegeriza lirova, avandu valakivisi mu zimbangaywa zia magina gi vigulu kandi mu malina, nokogeliza kwiruka kutura ku vutima vwivwe, kandi kwivisa kutura kuzinguru zizie kandi ku vukumi vwivwe.

²² Mutaviika lisuuvira lienyu mu avandu mba, kigira vaveeye kuli umwika. Vaveeye na vokonyi ki?