Isaya 19 - KITABU KITAKATIFU

Nyasaye alakahaane amageri ku vandu va Egebeti

¹ Yili ni likuva kigira avandu va Egebeti. Yahova yaazaa mu Egebeti, naniini ku lilesi ligendaa vwangu. Vifananyi via vandu va Egebeti vasigamira, videgera imbiri weve, na avandu va Egebeti valakuza mioyo jaavo.

² Yahova avoora, “Ndaleta uvulwani mu kivala cha Egebeti, na vuli mundu alalwana na amwavo weve, kandi mutende alalwana nu mutende weve, madaala manene gahimanaa galalwaana na madaala manene gandi, kandi vami vahimana valalwaana na vami vandi.

³ Ndagoyanyia lilohiza lia vandu va Egebeti, kandi ndononyia amakuva gaavo. Valazia kwenya ovokonyi kutura ku vifananyi viavo, kandi valazia ku valaguli na vakumu kwenya zing'anagani kutura ku vakuzu.

⁴ Ndahaana avandu va Egebeti ku vandu valulu, ku mwami mululu ulivaamiha. Inzi Yahova Wuvunyali mali kovora.”

⁵ Amazi galageha mu mugera gwa Naili, na guluma galaha ligali.

⁶ Migera ja Egebeti josi jilafunya uvugundu lwa mazi gakama galaha. Visenukiru viosi vilageha amazi gu kwuma ligali. Vidundu nu vunyasi vilaniala nu kwuma ligali,

⁷ kandi vitagwa viosi viatagwa ku lujinga lwu mugera gwa Naili vilaniala nu kwuma kandi vilatulizwa ho.

⁸ Vuli mundu woosi onyoora lilia lilie kutura ku liluva zisuzi mu mugera gwa Naili alava ni liverera kandi alalira; kigira zindohani ziavo kandi zineti ziavo si zilava kindu imbiri wavo mba.

⁹ Yavo avaloombaa zinguvu zie katani valakuza mioyo;

¹⁰ yavo avaveeye nu vusiza vwu kunava kandi vayinziri valahi valava avadedekere mu mioyo jaavo kandi valava no vovereri vonene.

¹¹ Aviimiliri vi lidaala linene lia Zoani vaveeye avasiru! Avasaza avageri vu Mwami wa Egebeti vahaana zing'anagani ziu Vusiru! Ndi kovoolera mwami yavo nivo vavugura vogono vwa vandu vageri vavami va kale?

¹² Mwami wa Egebeti, vaveeye hayi yavo avaveeye avahaani vi zing'anagani vovo? Hawundi vanyara kokovoola lilohiza lia Yahova Wuvunyali aveeye nalio ku vandu va Egebeti.

¹³ Aviimiliri va Zoani na Mefisi vaveeye avasiru. Gavadukiraa kwimilira ihiiri navuzwa vagegotiza; Yavo avaveeye kuli amagina gu mukoona gi zihiiri ziavo vamali kogotiza avandu va Egebeti.

¹⁴ Yahova umali kuvakola kuhaana zing'anagani zio kogoyanyia. Kigira yago, avandu va Egebeti vakora vindu viosi vudamanu kandi vagenda ni vagoyana kuli mundu muhambiku agendaa naateleleka mu maluki geege mwene.

¹⁵ Siaveeye ho mundu kali mulala mu Egebeti, mutugi anoho mudaka, wikivuni anoho utamanyikani unyala kuhaana vokonyi mba.

Avandu va Egebeti valakasigamiri Yahova

¹⁶ Ing'inga yiza, lwa avandu va Egebeti valakave nuvuti kuli vakali. Valakadegere nuvuti lwa valilola ndi Yahova Wuvunyali umali kunyiira mukono gwigwe nukuhaana kuvo amageri.

¹⁷ Avandu va Egebeti valatiihizwa ni ihiiri ya vandu va Yuda vuli ing'inga lwa vizuliza kivi cha Yahova Wuvunyali amali kuvaloombera.

¹⁸ Lwi ing'inga yiyi iduuka, lulimi lwa Avaheburaina lulakamolomwe mu madara manene 5 ga Egebeti. Avandu wene yeyo valisuuha mu lieta lia Yahova Wuvunyali. Lidaala lilala ku madaala yaga lilakalangwe, “Lidaala linene lie liuva.”

¹⁹ Lwi ing'inga yeyo iduuka uvwali vwa Yahova vulava mu kivala cha Egebeti kandi munara gwi ligina gwa Yahova gulaviikwa kulwako lwa Egebeti.

²⁰ Yivi vilakave vimanyiru imbiri wa Yahova Wuvunyali mu kivala cha Egebeti. Lwa vandu wene yeyo vadambizwa nukwanira Yahova kigira ovokonyi alakatumi mukonyi kuvasoora.

²¹ Yahova alakaloleke umwene ku vandu va Egebeti, maku vandu va Egebeti valakamanye Yahova nu kumusigamira nukumuletera visiuvilu harara ni vihaanwa. Valalomba lilagana lie liesuuha na Yahova nu kugatwekiza.

²² Yahova alakahaane amageri ku vandu va Egebeti, navuzwa alakavahonye kandi. Valirana ku Yahova, alahulira amasaala gaavo nukuvahonyia.

²³ Lwing'inga yeyo iduuka, inzira ilakaveho kutura mu kivala cha Egebeti kuduuka mu kivala cha Asiria. Avandu va Asiria valakagende kuduuka Egebeti kandi avandu va Egebeti valakagende kuduuka Asiria. Zihiiri ziviri yizi, zirakasigamira Yahova harara.

²⁴ Lwing'inga yeyo iliduuka, avandu vi kivala cha Isiraeli valakahambane harara na avandu va Egebeti, na Asiria, ni zihiiri zivaga yizi, zilakave uvugasu ku lirova liosi.

²⁵ Yahova Wuvunyali alakavagaasizi nokovoora, “Ndagasiza munyi vandu va Egebeti; avandu vange; ndagasiza munyi vandu va Asiria, avandu vandaloomba; kandi ndagasiza munyi avandu va Isiraeli, avandu vange avatovole.”