Isaya 18 - KITABU KITAKATIFU

Nyasaye yalahaana amageri ku vandu va Ezopia

¹ Nyasaye alahaana amageri ku avandu va Ezopia, kuvitira ku migera ja Ezopia, koveeye ho nikivala che lihuuma lie zisigi lihulirika. Keveeye ho kivala ichizula umuhumu gwi zimbaha.

² Avatumwa vatura mu kivala yiki kuzia ku mugera gwa Naili mu amato agalombwa kutura ku vidundu. Mwilane yengo galaha, munyi avatumwa va vwangu! Mwilanyie amakuva mu kivala chiinyu ichagavulanywa ni migera, muhaane ku ihiiri ya vandu vinyu avaveeye nizinguru kandi nuvunyari, avataambi kandi vi ligodo lilahi, kandi avizingulu zinene ligali, avaveeye avandu vatiivwa kivala choosi.

³ Muhuliri, munyi avandu vamenyi ku lirova! Muhenze ku kelelero chebendera kiligingwa igulu ku vigulu! Muhulirizi lwi kisiriva kilikubwa!

⁴ Yahova yambolera, “Ndahenza galaha kutura mwigulu kuli iliime lielomba machiriri mu vudiku vwu luya mu ing'inga yo kogesa, kandi kuli iliuva liaka mu ing'inga ya mbasu.

⁵ Imbiri wa mazabibu gagikiri kuvungizwa, lwa vimuli viosi vimali kuvunguluka kandi lwa mazabibu genga, musigu aladiviza avandu va Ezopia kuli muvano gukalagaa zisia kutura ku musaala gwu muzabibu.

⁶ Miviri mikuzu ja avasikari vaavo jilalekwa kuva chukulia cha manyonyi ni zinyama ziu muvulimu. Amanyonyi galalia zing'inga ziu muvasu, nizinyama zilalia ing'inga yu vudiku.”

⁷ Ing'inga yiza lwa Yahova Wuvunyali alinyoora vihaanwa kutura ku vandu vi kivala yiki ichagavulanywa ni migera, kutura ku ihiiri eveeye indambi kandi yi ligodo lilahi, kandi avizingulu zinene ligali, avatiivwa mu kivala choosi. Vosi valaza ku kiguru cha Ziyoni, uwa Yahova Wuvunyali asigamirwa.