Isaya 17 - KITABU KITAKATIFU

Nyasaye alakahaane mageri ku Siria

¹ Yahova yavoola, “Damasiko sililava lidaala linene kandi mba. Lilava vuzwa kitumi chi vianyi.

² Madaala manene ga Siria galang'anywa mihiga ni mihiga. Galava vwayiru vwa magondi ni zing'ombe, na sihaveeye ho numulala uvikunga mba.

³ Zimbinga ziukuhalira mu zilatulizwa ho mukivala cha Efuraimu. Zinguru ziuvwami vwa Damasiko zilahera; Avandu va Siria avalitigala valava kuli uvukumi vwa vandu va Isiraeli, Inzi Yahova Wuvunyali mali kovora.”

Nyasaye alakahaane amageri ku Isiraeli

⁴ Yahova yavoola, “Lidiku liizaa lwa ovonene vwa Isiraeli vulahera, na uvudaka vulavugula vogono vwu vutugi vwavo.

⁵ Kivala cha Isiraeli kilava kuli mulimi gwuvuswage kotema ma vogeseywi, kilava mang'anye kuli mulimi mu livona lia Refaimu lwi viangala vimali kodoolwa nukutigara umwere.

⁶ Avandu vakekeeke veng'ine valatigala mwoyo, na Isiraeli alava kuli musaala gwa muzeituni ugwa makuyu goosi gamali kwagurwa nigataveeye gavili anoho gavaga gatigaye ku lusia lwa higulu ligali, anoho makekeeke agatigaye ku zisia zia haasi. Inzi Yahova Nyasaye wa Isiraeli mali kovora.”

⁷ Lwi lidiku yilio liliduuka avandu valagirung'ana kwenya vokonyi kutura ku Mulombi wavo, Nyasaye Mutakatifu wa Isiraeli.

⁸ Sivaleereda kandi ku vwali vwa valomba na makono gaavo mba; anoho kusuuvira mu vusiza vwa makono gaavo mba. Viveeye vuzwa vifananyi viu munyasaye wikikali Ashera kandi uvwali vwu kusambira ku vimuli.

⁹ Lwi lidiku yilio liliduuka, madaala manene agakingwa vulahi galang'anywa, kandi galalekwa vuzwa ivianyi kuli madaala manene aga vandu va Hivi na Amori valeka lwa viiruka kutura ku vandu va Isiraeli.

¹⁰ Isiraeli, mumali kwivilira Nyasaye Umuhonyia kandi Umukinga kuli lwanda lwi zinguru. Mu vogono yivwo, musimikaa misaala mu milimi mitakatifu kunangwa muduuki kusigamira munyasaye mugeni.

¹¹ Navuzwa kali niiva jaamera nukulaviza vimuli mugamba mulala mwere lwa wajisimika, kali sihalava niligesa mba. Halava vuzwa nuvudinyu vweng'ine kandi mulasalira uvuzunu vutanyala kohonywa.

Nyasaye akingaa vandu veve

¹² O, Muriviti munene gwi zihiiri goveeye kuli lihuma lie inyanza! O, lihuuma lia vandu liveeye kuli viguvuli vienyanza enene.

¹³ Mahi gi zihiiri gaaza kuli muriviti gwa mazi manene, navuzwa Nyasaye alagagondokera nago galiirukira ihale ligali. Galakungwa kuli mukuuzi ku vigulu imbiri wi imbuza ihuuzaa; valakungwa kuli luguki luhilwa ni kihuzuzi.

¹⁴ Valeta vutihizi vonene hamugorova, navuzwa vaatura ho mugambazuri. Yiki nicho keheri cha yavo avalanyaa miandu jietu; kandi kidieli cha yavo avakunuulaa kivala chietu.