Isaya 15 - KITABU KITAKATIFU

Nyasaye aladiviza avandu va Moabu

¹ Yili ni likuva lia Nyasaye kigira kivala cha Moabu. Madaala manene ga Ari na Kiri gadiviziywi mu vudiku vulala, kandi kisundi kikuniki kivala cha Moabu.

² Avandu va Diboni vanina ku kiguru ukusiomera hatakatifu haavo. Avandu va Moabu vakuba zikwiri mu vovereri kigira Nebo kandi Medeba; vaavegi mitwi ni zinderu ziavo mu vovereri vonene.

³ Avandu vaveeye mu zinzira viviiki zinguvu zia magunia. Ku visegese vie zinyumba kandi hagati ha madaala manene avandu vasiomaa nukulira.

⁴ Avandu va Heshiboni na Eleyale valira vudinyu kandi lilira liavo linyala kuhulilika ihale ligali kuli Jahazi. Kali avasikari vi liihi vadegeye ligali mu vuti. Vuluviliri vwavo vogoti.

⁵ Mwoyo gwange guliliraa Moabu! Avandu virukiyi mu lidaala lia Zoari, kandi kuduuka Egilazi Shelishiya. Valala vanigira kunzira izizaa Luhizi, nivasioma lwa vaziza; valala virukira Horonaimu nivasioma ligali.

⁶ Amazi gu mugera gwa Nimuraimu gakami, uvunyasi voveeye ku lujinga lwagwo vuniaye; uvulimu vwumi sikeveeye ni kindu kivisi sikitigaye ho mba.

⁷ Avandu va Moabu vaambuka Livona lia Wilosi nivagerizaa kwiruka ni miandu josi ja avaveeye najo.

⁸ Havundu hoosi ku zinzako zia Moabu, mwoyo gwi lilira linene guhulilikaa. Guhulilikaa mu madaala ga Egilaimu na Beerelimu.

⁹ Amazi gi lidaala lia Diboni gizuyi masahi; navuzwa Nyasaye alameda maduywa ga vandu va Diboni. Yee, halava niliitwa linene lia vuli mulala utigala mwoyo mu Moabu; na yavo avagerizaa kwiruka, nizisimba zilaviita.