Isaya 13 - KITABU KITAKATIFU

Nyasaye yahaana amageri ku vandu va Babiloni

¹ Yaga na makuva ga Nyasaye yavulira Isaya mwana wa Amozi kigira Babiloni.

² Ugingi ebendera yu vulwani igulu ku kiguru kitaveeye ni misaala! Muhanzuki ku avasikari kandi mugiingi amakono ginyu igulu keve kuli kelolero kuvo kwingilira virivwa vie lidaala linene lia vandu vigingira.

³ Yahova umali kulanga kandi kulaga avasikari veve avizingulu kandi avatakatifu kulwaana liihi litakatifu nu kuhaana amageri ku yavo avaveeye navo nu vutima.

⁴ Hulirizi liyoga lie kiduma kenene cha avandu ku vigulu, liyoga liu vwami vwi zihiiri zia vugana harara. Yahova Wuvunyali alohizaa liihi lilie kulwaana.

⁵ Amahi yaga galaaza kutura mu kivala chihale, kali kutura ku keheri chi lirova. Yahova alaza nu vutima harara ni viugi vivie kudiviza kivala choosi.

⁶ Mukubi zikwiri kigira lidiku lia Yahova liveeye ahimbi! Yahova Wuvunyali alaleeta lidiviza.

⁷ Amakono gaavo galava amadedekere, kandi valakuza mioyo jaavo.

⁸ Vosi valava nu uvuti kandi valava nu vuzunu, kuli mukali aveeye mu vuzunu vwililumwa liu mwana. Vuli mundu alahenza wache nuvuti, kandi valava mu zisoni.

⁹ Lidiku lia Yahova liveeye ahimbi, lidiku liu vutima vululu vwa Yahova. Lirova lilakolwa hazwa, kandi vuli mwoni omenyi mucho aladivizwa.

¹⁰ Zing'ereng'ani ziosi ziu muligulu si zilahaana uvulavu mba, liuva lilava kuli kisundi lwalitonga, kandi mweli sigulahaana uvulavu mba.

¹¹ Yahova avoora, “Ndaleta kivi ku lirova kandi ndahaana amageri ku vandu vadamanu vosi kigira vwini vwavo. Ndaheriza uluyayi lwa vuli mundu oveeye ni liegingira, kandi ndahaana amageri ku vuli mundu oveeye ni kirage.

¹² Avandu valitigala ndavakora kuva avakeekeke ligali kuli izahabu indahi; vandu valakava vakekeeke kuli izahabu ya Ofura.

¹³ Kulwayago, ndakora ligulu kodegera, kandi ndasung'usa lirova kutura mu vogono vwalio ku lidiku lia inzi, Yahova Wuvunyali manyia uvutima vwange.

¹⁴ “Avageni avamenyi mu Babiloni valiruka kuzia mu vivara viavo aveene, varasarana kuli zimbongo ni ziruka kutura ku avahimi, kandi kuli amagondi gataveeye nu mwayi.

¹⁵ Mundu woosi uligumirwa alakatozwe ni kivavi nu kwitwa.

¹⁶ Avana vaavo vadoto valadonyanywa nu kwitwa, ni zinyumba ziavo zilalanywa, kandi avakali vaavo valonogonywa imbiri wavo.”

¹⁷ Yahova avoora, “Ndasingiliza vandu vi ihiiri ya Ivaale yi Ivugwi wa Babiloni avalangwa Medesi, vazie kwingilira Babiloni. Avandu yava si valiyanzilira ifeza anoho izahabu mba.

¹⁸ Valiita avasoleri nu vuta na matimu gaavo. Si valavererera avana avadoto mba.

¹⁹ Lidaala linene lia Babiloni liveeye lilahi ligali kandi liu vukumi vwu uvwami uvulahi kuvita amadara gandi goosi, liveeye lidaala liu kuyaanziza avandu valio. Navuzwa inzi, Yahova ndalidiviza kuli ndakora ku amadara manene ga Sodoma na Gomora.

²⁰ Mundu sialakamenye mu lidaala yili kandi mba, anoho Avaharabu vagendagenda si valakumbake amahema gaavo mu lidaala yili mba, kandi avayi si valakaloombe mu uvwayiru ku mitugu jaavo mba.

²¹ Lidaala yili lilakave havundu hi zinyama ziu muchangalangwe zilakamenye kandi lilakave havundu ha makuuri galiumbaka zinyumba ziago. Amahudu galamenya yo, kandi zimburi ziu muvulimu zilavinira mu mang'anye.

²² Zimbiti zilafuma mu zimbinga zia zio, na vivwi vi laloka mu zinyumba ziuvusangali ziazio ziu vwami. Ing'inga yu kudiviza lidaala linene lia Babiloni iduuki! Amadiku galio sigalamedwa kandi mba.”