Isaya 11 - KITABU KITAKATIFU

Uvwami vwi mirembe

¹ Avinyumba yu vwami vwa Daudi vaveeye kuli umusaala gumali kotemagwa; navuzwa kuli visivu visivukaa kutura ku kitinya, nindio mwami muhia alasingira kutura hagati hi visukululwi via Daudi.

² Roho wa Yahova alava harara naye. Roho wovogeri ni limanyiriza; Roho wukwidera kandi wizingulu, Roho wilimanyiliza kandi wukutia Yahova.

³ Alasangalira mu liitia Yahova, sialakalagira mundu ku lihenza ligondo anoho kolondekana ku aga ahuliiyi mba.

⁴ Alakalagira avadaka nuvulungi kandi alakinga avatinyaliza nuvulungi. Ku likuva lie lilaga lilie, avandu valahevwa mageri, kandi avandu vadamanu valitwa.

⁵ Alamiiha avandu veve nuvulungi kandi nu vusuuvirifu.

⁶ Vivwi na magondi vilamenya harara mu mirembe, kandi iziingo zilagona hasi harara nizimbuli. Ivimooli nizisimba vilaaya harara; kandi avana vakekeeke valavilinda.

⁷ Zing'ombe niziduba zilaaya harara, kandi ivimooli viazio vilagona hasi kosoosa harara mu mirembe. Zisimba zilaaya uvulimu kuli zing'ombe.

⁸ Kali umwana sialasalirizwa niiva alakina ahimbi ne enzoka yuvusungu vululu.

⁹ Ku Ziyoni, kiguru kitakatifu cha Nyasaye, sihalava nikindu chukusaliriza anoho kidamanu. Kivala kilizula limanya lia Yahova kuli zinyanza zizura amazi.

Avandu vaahaminywa valirana

¹⁰ Lidiku lizaa lwu mwami muhia kutura munyumba yu vwami vwa Daudi alava kelolero ku zihiiri ziosi. Valavunga harara mu lidaala lilie liu vwami nukumuha luyali.

¹¹ Lwa ilidiku yilio liduka, Yahova alakatumikiri zinguru zizie kandi koleta avandu veve yengo, avandu vaatigara mu kivala cha Asiria na Egebeti, kandi muvivala via Panzurosi, Ezopia, Elamu, Babiloni; Hamazi, kandi kutura mu visulu vie inyanza.

¹² Yahova alasingiriza kelolero chebendera ukumanyia zihiiri ndi avungiza avandu veve harara ulwa kaviri, avandu vasalanywa va Isiraeli ni Ivuyuda, na aviiranyiaa kutura mu zikona zine zie lirova.

¹³ Uvwami vwa Isiraeli sivulakendekera uvwami vwi Ivuyuda kandi mba, kandi Ivuyuda silava musigu wa Isiraeli kandi mba.

¹⁴ Vombi harara vatangilira Avafilisitia ku lovega lwi madioli nukulanya avandu vamenyaa ku lovega lwi Ivugwi. Valaguuta avandu va Edomu na Moabu, kandi avandu va Amoni valavatia.

¹⁵ Yahova alakaminya amazi mu mukono gwi inyanza ya Egebeti, kandi alaleeta imbuza imbiu kukaminya mugera gwa Efurate. Alagwavukanyia mu togera saba, kunangwa avandu vaduuki kwambuka.

¹⁶ Kandi halavaho ninzira enene kutura Asiria kigira yavo vandu veve Isiraeli avatigara mwoyo, kuli gaali ku avaguuga vaavo lwa vaatura Egebeti.