Isaya 10 - KITABU KITAKATIFU

¹ O, Vayaye kivi keveeye ku munyi! Munyi avalomba amalago kuva amachamu nu kudambiza avandu vange.

² Mukora ndio kunangwa muduuki kwigalira avadaka vavuli konyoora uvulungi vwavo, kandi vavuli konyoora likalaga liu vulungi. Nindio mukoraa muduuki kuvugura miandu ja vakunzakali na vavisandu.

³ Mulakakole ki lwa Nyasaye alimuha amageri? Mulakakoleki lwa aleetaa kivi kumunyi kutura mu kivala chi ihale? Mulirukira ku vwaha konyoora ovokonyi? Mulakavise hayi vutugi vwinyu?

⁴ Munyi mulakitilwi muvulwani anoho mulakahilwi kuli avahambe. Kali ndio uvutima vwa Yahova si vulahera mba, navuzwa alanyira mukono gwigwe kuhaana amageri ku munyi.

Nyasaye atumikiraa mwami wa Asiria kuli imbimbu

⁵ Yahova yavoola, “Ivi Asiria! Ndumikila avandu va Asiria kuli imbimbu kuhaana amageri kuyavo avambeeye nu vutima navo.

⁶ Nduma avandu va Asiria kuzia kwingilira ihiiri ya vandu vataveeye na Nyasaye, avandu vaangora kuva nu vutima. Mbatumaa kuzia kulanya nu kwiva kandi kuduvagira vandu hasi kuli madohi kuzinzira.”

⁷ Navuzwa mwami wa Asiria aveeye ni lilohiza lilie umwene liu vutindi mu zing'anagani zizie. Umali kusaavira kudiviza zihiiri zinyingi.

⁸ Aveeye ni liegingira kovora ndi, “Avanene vange vosi vaveeye avami!

⁹ Mali kuguuta amadara manene ga Kalino, Karikemishi, Hamazi, Aripadi, Samaria na Damasiko.

¹⁰ Ndaanyiira mukono gwange kuhaana amageri ku vwami vusigamiraa vifananyi viveeye vinyingi ligali kuvita via Jerusalemi na Samaria.

¹¹ Mali kudiviza lidaala linene lia Samaria, harara ni vifananyi vialio. Kandi ndakora malala mere ku lidaala linene lia Jerusalemi harara ni fananyi via vasigamira.”

¹² Navuzwa Yahova avoora, “Lwa inzi mala miyinzi jange ku kiguru cha Ziyoni ni mu Jerusalemi, ndahaana amageri ku mwami wa Asiria kigira lielola lilie liosi kandi liegingira lilie liosi.”

¹³ Mwami wa Asiria yigingira nokovoora ndi, “Mali kokora yaga goosi inzi mwene. Inzi mbeeye ni zinguru kandi mugeri wi limanyiriza. Mali kutulizaho zinzako hagati hi zihiiri, kandi mali kuvugura uvutugi vwavo kutura mu mavikiru gaavo goosi. Mali kuduvagira hasi avandu vamenyi yo kuli igiriki, nu kuvatuliza ku zindeve ziu vwami.

¹⁴ Zihiiri zie kivala ziali kuli inyumba yi linyonyi, na ndavungiza uvutugi vwavo kuli amavuyu gaali ni galekeywe. Si lialiho kali lilala iliali linyala kuburuka mba, anoho iliali linyala kukunula munwa gwalio nu kunzulira!”

¹⁵ Navuzwa Yahova avoora, “Imbaazi inyala kwevoora kuva enene ligali kuvita umundu ugitumikiraa? Musumeno gunyala kuva nilizominywa kuvita mundu ugutumikiraa? Imbimbu si inyala kuginga mundu mba, navuzwa mundu agingaa imbimbu.”

¹⁶ Kigira yaga, Yahova Wuvunyali alatuma lukuzu kuhaana amageri ku yavo avaveeye avatugi kandi avalizaa vulahi. Miviri jaavo jilasaambwa nu muliru gwolomemo.

¹⁷ Nyasaye, uvulavu vwa vandu va Isiraeli, alava kuli umuliru. Nyasaye Mutakatifu wa Isiraeli alagwa olomemo, ulusaamba vindu viosi kali amafwa kandi zindavati mu lidiku lilala.

¹⁸ Yahova aladiviza ligali militu milahi kandi milimi migunamu, galava kuli uvulwaye uvudamanu vwitaa umundu.

¹⁹ Misaala mikekeeke ligali ju mulitu jilatigala kali ju mwana mukekeeke anyala kuvaliza.

Avandu vakekeeke valilana kutura mu Lihaminywa

²⁰ Ing'inga yizaa lwa vandu va Isiraeli vatigara kandi avahononoka valakavuli kusuuvira ihiiri yaali himbi kuvadiviza. Valakaviki lisuuvira liavo ku Yahova, Nyasaye Mutakatifu wa Isiraeli.

²¹ Vakekeeke ku vandu va Isiraeli valirana ku Nyasaye wavo wi zinguru.

²² Kali niiva kalunu avandu va Isiraeli vaveeye vanyingi kuli umuyeke gu munyanza, vakekeeke vuzwa kuvo valirana. Lidiviza liveeye ho ku vandu, kandi lidukanaa ligali.

²³ Yahova Wuvunyali alaleeta lidiviza mu kivala choosi kuli yavoola alakora.

Yahova alahaana amageri ku vandu va Siria

²⁴ Mwami munene Yahova Wuvunyali avooreraa avandu veve vamenyi mu Ziyoni ndi, “Mutatia kigira avandu va Asiria mba, kali niiva vamudambizaa kuli avandu va Egebeti vamudambizaa.

²⁵ Ku ing'inga engekeeke, lihaana mageri liange ku munyi lilahera, maku ndavadiviza.

²⁶ Inzi Yahova Wuvunyali, ndavakuya ni imbimbu yange kuli ndaakuya avandu va Midia ha lwanda lwa Orebu. Ndahaana amageri ku vandu va Siria kuli ndaakola ku vandu va Egebeti.

²⁷ Lwa ing'inga yeyo iduuka, ndamuvoholora kutura ku zinguru zia vandu va Siria, na iniira yaavo silava nuvuliduhu ku mavega ginyu mba.”

Musigu yingiliraa lidaala linene lia Ayazi

²⁸ Liihi lia vasigu ligumiye lidaala linene lia Ayazi! Vavitiye mu Migironi! Vaaleki miandu jaavo ha Mikamashi!

²⁹ Vamali kwambuka inyambuku, na vaziiye konyoora lisosa lia vudiku ha Geba! Avandu mu lidaala lia Rama vaveeye nu vuti, kandi avandu mu lidaala lia Gibea liu mwami Saolo vamali kwiluka.

³⁰ Umukubi lwanga, O, munyi avandu va Galimu! Muhuliri, O, munyi avandu va Laisha! Mu haane amativuli, O, munyi avandu va Anazozi!

³¹ Avandu va Madimena na Gebimu virukaa kigira vaduuki kwesoora.

³² Kalunu avasigu vaveeye mu lidaala lia Nobu, vasonaa videte viukutihiza ku kiguru cha Ziyoni, mu lidaala linene lia Jerusalemi.

³³ Yahova Wuvunyali alavagwihiza nu kuvasionoranyira hasi kuli zisia ziu musaala. Avigingiri ligali kandi avataambi ligali ku vosi valikizwa hasi.

³⁴ Yahova alavatemaga kuli misaala milahi giveeye hagati hu mulitu gwa Lebanoni jitemwa ni imbaazi ma jigwa hasi.