Isaya 1 - KITABU KITAKATIFU

¹ Kitabu yiki keveeye mu na makuva kigira Ivuyuda na Jerusalemi aga Nyasaye yavulira Isaya muyaayi wa Amozi, ing'inga lwa Uzia, Jozamu, Ahazu na Hezekia vaali avami vi Ivuyuda.

Nyasaye agondokeraa avandu veve

² Yahova yavoola, “O, munyi lirova ni ligulu, muhuliri cha mboraa! Avana va ndaavirukiza vamali kwibaala ku inzi.

³ Zing'ombe ziamanya mwenezio kandi zibunda ziamanya mwenezio ahazilihizilaa. Navuzwa avandu vange Isiraeli sivamanyi mba, kandi sivahulira mba.”

⁴ Munyi mudivi, ihiiri yuvwoni, yuvwoneku kandi avandu vadamanu! Munyi muveeye avandu vataveeye avasuuvirifu. Munyi mumali koleka Yahova Nyasaye Mutakatifu wa Isiraeli nu kumusuura.

⁵ Kigira ki muzizagiliraa kwibaala? Mwenya muhevwe mageri kali kuvita. Avandu va Isiraeli mitwi jinyu josi jizuyi zing'oma, kandi mioyo jinyu niziganagani zienyu zilwaaye.

⁶ Kutura ku mitwi kuduuka ku virenge, sihaveeye ho nahavundu ahalamu ku miviri jinyu mba. Munyi mwizuyi zing'oma nuvukinduki nuvuvuni. Zingwagu zienyu siziogiziiywi anoho kovohelerwa mba. Amaguta sigavakiywi muzigwagu zienyu mba.

⁷ Kivala chienyu kinganyiywi, madaala ginyu manene gasambiywi goosi nu muliru. Avageni vavugura kivala chienyu nukukidiviza ligali na munyi nimulolaa.

⁸ Lidaala lia Jerusalemi lilekeywi kuli kidioli chumusikari mu kizabibu, anoho lidiri mu mulimi gwa mahondo kuli lidaala likumbiriziywi na vasigu.

⁹ Yahova Wuvunyali alavula koleka valala ku avandu zana vave mwoyo ngano Jerusalemi liadivizwa ligali kuli madaala ga Sodoma na Gomora gadivizwa.

¹⁰ Jerusalemi, avamihi vovo na vandu vovo vaveeye kuli avandu va Sodoma na Gomora. Muhuliri aga Yahova amuvoleraa. Mutegize amatu ku aga Nyasaye wiitu amwigizaa.

¹¹ Avoora, “Muganaganaa nyenya visiuviliru yivi viosi via muzizagiliraa kuhaana ku inzi? Mali konyoora kuvita kegelo magondi ga musambaa kuli visiuviliru, kandi gi zinyama zing'omeru ligali. Nduhiziywi na masahi gi zigiriki, magondi kandi ni zimburi.

¹² Nivwaha omuteevi mundeetere vindu yivi viosi lwa muzaa kusigamira? Nivwaha omuteevi kuduvaga mu mugizi gwange?

¹³ Mutandeteli vihaanwa vienyu vitaveeye novokoonyi kandi mba. Lifunya lie kimuli cha musambaa limbihilirizaa. Sinyala kwikuzira ku amasavo ginyu gu mweli muhia, Amasabato, na mavugano ginyu; viosi vikoleywe vidamanu nuvwoni vwinyu.

¹⁴ Mbihirirwa ni lilia lienyu liu Mweli Muhia kandi amadiku matakatifu gi lisosa; Gaveeye musigo muliduhu ku inzi kali nduhi ligali kugaginga.

¹⁵ “Lwa mugingaa makono ginyu igulu mu lisaala, sindamuheenza mba. Kali ni musaala kuli ndi, inzi sindahuliriza kali hakuzu mba, kigira amakono ginyu gizuyi amasahi.

¹⁶ Mwisaave aveene munihi. Mulekere likora uvudamanu yivu vwosi vwa ndolaa nimukora. Yee, mulekere likora uvudamanu

¹⁷ na mwigi okokora amalungi. Mulole ndi likalaga liuvulungi likoleywi. Mukoonye yavo avadambizwa, muhe avavisandu uvulungi vwavo, na mukingi avakunzakali.”

¹⁸ Yahova avoora, “Kalunu, hambi kuhulirizane mu makuva yaga. Kali uvwoni vwinyu nivoveeye vwakanyu ligali ndamwogiza mulave kuli likonza; kali nivoveeye vwakanyu ligali kuli masahi, mulava avalavu kuli ipamba.

¹⁹ Niiva muratia inzi, mulalia vindu vilahi vie kivala.

²⁰ Navuzwa niiva mulasuura nu kwibaala ku inzi, mulitwa nikivavi. Inzi Yahova mali kovora.”

Lidaala linene liuvwoni

²¹ Lidaala linene iliali ing'inga indala lisuuvirifu kalunu liveeye ni miima kuli ji liraya! Ing'inga ndala liizula vandu valungi, navuzwa kalunu avalumindi vatigaye mulio.

²² Jerusalemi, ivi waali kuli ifeza ku ing'inga ndala, navuzwa kalunu sioveeye novokoonyi mba; waali kuli iwaini indahi, navuzwa kalunu oveeye vuzwa amazi.

²³ Aviimiliri vovo vaveeye aviibaali kandi avalina va aviivi; vuli kazozo vavugilira kuvugura vihaanwa kandi viambeti. Sivakingaa avavisandu mu viyaalo mba anoho lwa avakunzakali vahaana livaala lie kiyaalo chavo mba.

²⁴ Kunangwa kalunu, muhuliri aga Yahova Wuvunyali, Nyasaye Wizingulu wa Isiraeli, avoora: “Ndavanza kisaalia ku munyi, avasigu vange, na simulangubiza kivi kandi mba.

²⁵ Ndamuha amageri. Ndamutakasa vuzwa kuli kivia kitwulwa vulahi, kandi ndatuliza uvudamanu vwinyu vwosi.

²⁶ Ndamuha avamihi na vahaani vi zing'anagani kuli yavo ava mwali navo maziambiri. Maku Jerusalemi, ilalangwa lidaala linene lirungi kandi lisuuvirifu.”

²⁷ Kigira Yahova aveeye mulungi, alahonyia Jerusalemi kandi ku woosi uwiganiraa.

²⁸ Navuzwa Yahova aladuvulanyia mundu woosi okola uvwoni nukwibaala kuye. Aliita vuli mundu umuleka.

²⁹ Mulava novovereri ndi mwasigamira misaala nukutaga misaala mu milimi mitakatifu.

³⁰ Mulaniala kuli musaala, kuli mulimi gwu mundu atasamaa na mazi.

³¹ Kuli uluvuva luhambizwa muliru neesese, nindio kandi vasaza vi zinguru valadivizwa muvikolwa viavo vidamanu, na sihalava numulala unyala kugaya lidivizwa zana yilio mba.