Hosea 8 - KITABU KITAKATIFU

Yahova akalagira Avandu va Isiraeli Kigira Lisigamira Kifananyi

¹ Yahova avoora, “Ukubi kisiriva! Avasigu vaza mukivala change kuli zindizu! Avandu vange vavunanyia lilagana lia inzi ndalomba navo kandi vamali kwibaala ku lilaga liange.

² Kali niiva valanga inzi Nyasaye wavo kandi vekola ndi vaveeye avandu vange kandi vamanya inzi,

³ vamala kusuura agaveeye malahi. Kigira yaga avasigu vaavo valavakunga.

⁴ “Avandu vange vatovora avami yavo aveene. Vaatovora aviimiliri vugira inzi kumanya. Vaavugura izahabu yavo ni feza kandi nivalomba vifananyi iviaavadiviza.

⁵ Inzi mbihirirwa igiriki yi ifeza ya avandu vilidaala linene lia Samaria vasigamira. Mbeeye nu vutima navo. Navazizagilira kokora ndio kuduuka ing'inga ki valazizagilira kusigamira vifananyi viavo kuduuka ng'inga ki?

⁶ Umundu musiza wa Isiraeli yalomba kifananyi, kandi sikeveeye nyasaye kali hakuzu mba! Igiriki yi ifeza isigamirwa mu Samaria iravunanywa muvidonye!

⁷ Lwa vegomba imbuza valanyora kihuzuzi! Mulimi gwuvuswage ugutaama sigunyala kuva niligesa lie ingano mba. Navuzwa kali niiva ligesa liakaveeye mu avageni valavilia.

⁸ Avandu va Isiraeli vadiviziywi. Kalunu vaveeye muzihiiri kuli kiju kitaveeye novokonyi.

⁹ Avandu va Isiraeli vavoyavoya veng'ine kandi vaveeye kuli zihiiri zindi kandi kuli zibunda ziu muvulimu. Vamali kuzia nukwenya vokonyi kutura ku avandu va Asiria, kandi vamali kutunga zihiiri zindi kunangwa zivakingi.

¹⁰ Navuzwa kalunu inzi ziza kuvavungiza harara kandi ndavaha mageri. Nonoho navave muvuzunu, lwa munene wa Asiria naavadambizi.

¹¹ “Uvunyingi vwu uvwali vwa avandu Vaisiraeli vamali kumbaka kuhaanilaku visiuviliru viu vwoni. Nilwo lwa vaveeye na havundu hanyingi hokokolera uvwoni.

¹² Inzi ndaavang'odera ivindu vinyingi vielilaga liange, navuzwa vaavivugula kuva kuli kindu kegeni.

¹³ Vahanaa visiuviliru ku inzi kandi ma valia inyama yukuvisiuviliru. Navuzwa inzi, Yahova, nzilira navo mba, kandi kalunu inzi ndizuliza uvwoni vwavo kandi ndavaha mageri. Inzi ndaviranyia Egebeti!

¹⁴ “Avandu va Isiraeli vamali kwumbaka zinyumba ziuvwami, navuzwa vayivilira mulombi wavo. Avandu vi Ivuyuda vamali kwumbaka madaala manene gi zimbinga. Navuzwa inzi ndasamba zinyumba ziavo ziu vwami kandi madaala gaavo manene.”