Hosea 6 - KITABU KITAKATIFU

Lieganira lia avandu litaveeye lia ligali

¹ Avandu vavoola, “Gendi kwirane ku Yahova! Umali kukusaliriza, navuzwa alakohonyia; umali kukwata zing'oma, navuzwa alavohelera zingwago zietu.

² Inyima wa madiku gaviri, alakokola kove avahia; ku lidiku lia kavaga alakusingiliza, kandi kulamenya muye.

³ Gendi kwenyelerizi kumanya Yahova. Alaza kukunyi kuli iliuva litongaa mugambazuri, kandi kuli imbura yu lunyilira kandi kuli imbura yi ing'inga yi lisembera ikubaa ku lirova.”

⁴ Navuzwa Yahova avoora, “Inzi nyara kumukoleraki munyi avandu va Isiraeli avandu vi Ivuyuda? Uvuyanzi vwinyu ku Inzi vogotaa vwangu kuli amalesi ga mugambazuri; kandi voveeye kuli iliime likamaa mugambazuri.

⁵ Kunangwa inzi mali kutuma avaporofeti vange ku munyi na makuva gange kumukalagira kandi kumudiviza. Aga inzi nyenya kutura kumunyi ni yaga:

⁶ Inzi nzegomba munyi kuva nu vuyanzi vwa kazozo navuzwa si nzegomba visiuviliru vinyu viezinyama mba. Inzi nzegomba avandu vange vamanye inze kuvita kuhana vihanwa kuinzi.

⁷ “Navuzwa ha Adamu vaavunaga lilaga liange, ahene yayo vavura kuva vasuuvirifu kuinze.

⁸ Lidaala lia Gileadi lia yizula vandu vadamanu kandi avarumindi.

⁹ Avasaalisi vaveeye kuli muganda gwa vanuuri avagonekaa avandu kuzinzira. Kali vita avandu kunzira izizaa Shekemu havundu hatakatifu. Vakora uvudamanu yivu vwosi mu liyanza liavo.

¹⁰ Inzi mali kolola kindu chu kutihiza mu Isiraeli: Avandu vange vamali kweyonogonyia aveene mu lisigamira vifananyi.

¹¹ “Na munyi avandu vi Ivuyuda, mali kulaga ing'inga yukuhaana mageri ku munyi kigira vikolwa vinyu vidamanu via mukoraa.