Hosea 5 - KITABU KITAKATIFU

¹ “Muhuliri yaga, munyi avasaalisi! Muhulirizi munyi avandu va Isiraeli! Muhuliri, munyi avandu vinyumba yu vwami! Gamuduukira muhaane likalaga liveeye lirungi. Munyi mulakalagirwa! Kunangwa likalagirwa lilaaza kumunyi! Munyi mumali kugumira avandu kigira lisigamira misambwa ha Mizipa, kandi ku Kiguru cha Tabori.

² Mumali kuyava ovogo ha shitimu navuzwa ndahaana mageri kumunyi mwosi.

³ Inzi manyi avandu va Isiraeli kuli vaveeye; si vanyara kwivisa kutura ku Inzi mba. Si vaveeye avasuuvirifu mba, kandi si vaduukani kusigamira Inzi mba.”

Hosea Yiganihizaa Avandu Kigira Vifananyi

⁴ Uvudamanu vwa avandu vamali kokoraa, vuvigaliraa kwirana ku Nyasaye wavo. Vayanzilira vifananyi ligali, na sivamanyi Yahova mba.

⁵ Liegingira lia avandu va Isiraeli lilolekaa muvo. Uvwoni vwavo vuvakolaa vikigitara kandi kugwa, kali avandu vi Ivuyuda vikigitara ma vaagwa harara navo.

⁶ Vavugura magondi nizing'ombe ziavo kuhaana ku Yahova kuli visiuviliru nu kumwenyeleriza, navuzwa si vamunyoola mba, kigira amali kuvaleka.

⁷ Si vaveeye avasuuvirifu ku Yahova mba. Avana vaavo sivaveeye aveeve. Kalunu ku ing'inga yi lisavo mu mweli muhia, valadivizwa harara ni milimi jaavo.

Vulwani Hagati ni Ivuyuda na Isiraeli

⁸ Mukubi visiriva viu vulwani mu Gibea! Mukubi kiliri mu Rama! Mukubi liyoga liu vulwani ha Bezaveni! O, munyi avandu va Benjamini, muzie muvulwani!

⁹ Lidiku liu kuhaana mageri lizaa, na Isiraeli ilatigara mang'anye. Munyi avandu va Isiraeli, ligali yaga galakoleka ku munyi!

¹⁰ Yahova avoora, “Aviimiliri vi Ivuyuda vamali kwingilira avandu va Isiraeli, kandi vasundi ulwako. Ndasundura uvutima vwange uvululu kuli migera ja mazi.

¹¹ Avandu va Isiraeli vaveeye mu vusaliri vwi lidambizwa; vamali kogotiza kivala chaali chavo, kigira vasavira kuzia konyoora ovokonyi kutura kuyavo avataali novokonyi.

¹² Kunangwa ndaleta lidiviza lie zisere ku avandu va Isiraeli, kandi ndaleta lidiviza liu vugundu ku vandu vi Ivuyuda.

¹³ “Lwa avandu va Isiraeli valora uvulwaye vwavo, kandi avandu vi Ivuyuda lwa valora zingwago ziavo, hene yaho, avandu va Isiraeli vazia Asiria koteeva ovokonyi kutura ku mwami munene. Navuzwa mwami munene oyo si yaali anyala kohonyia zingwago ziavo mba.

¹⁴ Inzi ndalwana avandu va Isiraeli kandi avandu vi Ivuyuda kuli isimba enene. Inzi mwene ndavatandulanyia mu vidonye nukuvaleka. Lwa nambahili ihale ligali, si naveho numundu waza avahonyie mba.

¹⁵ “Inzi ndaleka avandu vange kuduuka lwa vasalira ligali kigira uvwoni vwavo kandi valaza konyenya. Namusia mulisalirizwa liavo valageriza kwenya Inzi.”