Hosea 4 - KITABU KITAKATIFU

Yahova ayaara avandu va Isiraeli

¹ Yahova aveeye nikiyaalo ku avandu vamenya mukivala yiki. Muhuliri avandu va Isiraeli, ku agaavoola: “Siaveeye ho kali mulala oveeye musuvirifu anoho wuvuyanzi mukivala, kandi avandu mukivala sivamanyiriza inzi kuli Nyasaye mba.

² Valomba malagano kandi sivatwekizaa mba. Vavoola vovehi, vita, viva, kandi vakora voheyi. Zimbi ziamedeka, kandi iliitana liveeye linyingi ligali.

³ Kandi ndio kivala kiluma, kandi kindu choosi kemenya mu kivala kilakakuzi. Zinyama ziosi, manyonyi gumuvwerefu, kandi kali zisuzi ziu mu inyanza vilakakuzi.”

Yahova Ayaara Avasaalisi

⁴ Yahova avoora, “Mutaleki umundu kali mulala ayaara avandu anoho kuvagondokera mba. Lielilira liange liveeye ku munyi avasaalisi.

⁵ Munyi mwigatalaa mbasu navudiku harara navaporofeti. Kunangwa ndadiviza Isiraeli mama vinyu.

⁶ Avandu vange vadiviziywi kigira sivamanyiriza inzi mba. Munyi avasaalisi mumali kusuura kumanyiriza inzi kandi mumali kusuura miigizu gange, kandi kunangwa inzi musuyi kandi sindamanyiliza avana vinyu kuli avasaalisi vange mba.

⁷ “Lwa munyi avasaalisi muveeye avanyingi, nilwo lwa mukolera inzi uvwoni vunyingi, kunagwa inzi ndakagirung'anyie luyali lwinyu kuva zisoni.

⁸ Munyi munyoora uvutugi kutura ku uvwoni vwa avandu vange, kunangwa mwenya vazizagiliri kokora uvwoni.

⁹ Munyi namuhevwe mageri malala mere kuli avandu! Inzi namuhe mageri kandi naamukole namutungi uvudamanu vwa mukoraa.

¹⁰ Munyi numulie viukulia navuzwa simuliguta mba. Munyi mulasigamira avanyasaye vulwivulu navuzwa, simulanyora avana mba, kigira mumali kondeka na murondaa avanyasaye vandi.”

Yahova Akalagira Lisigamira Misambwa

¹¹ Yahova avoora, “Iwaini inguru ni imbia ekolaa avandu vange kuvula kuva nilimanyiriza!

¹² Vatevaa zing'anagani kutura ku kifananyi chumusaala! Kisala kivavoleraa icha venya kumanya! Vamali kondeka. Kuli mukali ugwizaa mulaya, vamali kwihana aveene ku avanyasaye vandi.

¹³ Vahanaa visiuviliru havundu hatakatifu kuzindongozi zievigulu, kandi vasamba vimuli vifunya mwayu ku tugulu isi wimisaala jigumara kandi mitambi, kigira ichiriri keveeye kilahi! “Kunangwa avakaana vinyu vatumika kuli malaya, kandi avanavizara vinyu vakolanga voheyi.

¹⁴ Navuzwa inzi sindavaha mageri kigira yaga mba, kigira munyi aveene mukora ovoheyi namalaya gi Litembeli, kandi harara navo muhaanaa visiuviliru ku vifananyi. ‘Kuli lugano lovoolaa avandu vugira limanyiriza valaduuka mulidiva.’

¹⁵ “Kali niiva munyi avandu va Isiraeli simuveeye avasuuvirifu ku inzi mba, vwakaveeye vulahi avandu vi Ivuyuda valavula kuva nilihiolo kuli yili. Mutasigamira ha Giligali anoho Bezaveni mba, anoho mutalomba malagano ku Yahova oveeye mwoyo mba.

¹⁶ Avandu va Isiraeli vaveeye avahindagirizi kuli zing'ombe. Inzi, Yahova nyara kuvalihiza ndi kuli vimeme viamagondi mu vwayiru?

¹⁷ Avandu va Isiraeli vayanzizwa nivifananyi ligali. Muvaleke vave.

¹⁸ Niiva kanywa iwaini inyingi, vayanzilira vuraya vwavo nukuva muzisoni kuvita uvukumi.

¹⁹ Valagingwa nu kuhilwa ihale kuli imbuza, kandi valava muzisoni kigira visiuviliru viavo virifananyi.