Hosea 2 - KITABU KITAKATIFU

¹ Kunangwa, muvoolere avamwavo vinyu ndi “Avandu va Nyasaye” kandi avavozo vinyu “Yahova yavayanza.”

Yahova Asaaviraa kuhaana mageri ku Isiraeli

² Avana vange, mugoonye mama winyu, kali niiva si aveeye mukali wange, kandi inzi si mbeeye musaza weve mba. Mumugonye aleke kokora ovoheyi kandi uvulaya.

³ Niiva si alaleka mba, ndamutuliza zinguvu atigale chahonyo kuli yiivulwa. Ndamukora ave kuli changalangwe kandi kuli kivala chumu, kandi alakuza kigira uvuluhu.

⁴ Si ndavererera vana veve mba kigira vaveeye avana vumuheyi utaveeye ni zisoni mba.

⁵ Mama wavo yakola ovoheyi, kandi yaavavereka mu zisoni. Yavoola, “Inzi ndazia kuvasaza vange, avambezaa viukulia kandi amazi, uvwoya vwa magondi kandi zinguvu, amaguta kandi Iwaini yange.”

⁶ Kunangwa, ndigalira inzira yeeye nu lugaga lwa mafa, kandi ndumbaka lidigi kunangwa avuli konyoora inzira yu kuvitiramu.

⁷ Alanyagula nokolondelera avasaza veve, navuzwa si alavanyoola mba. Alavenyeleriza navuzwa sialavalora mba. Maku alavoora, “Inzi ndirana ku musaza wange wukutanga, kigira ndaali vulahi naye kuvita kalunu.”

⁸ Si alamanyiriza ndi ni Inzi wamuha uvuswage, Iwaini, amaguta, ifeza kandi izahabu ya yatumikira mu lisigamira Baali mba.

⁹ Kuunangwa, mu ing'inga yi ligesa ndavugura vuswage vwange, Iwaini, kandi ndavugura uvwoya vwa magondi, kandi inguvu ya ndaamuha kufuma chahonyo chiche.

¹⁰ Ndamutuliza zinguvu zizie atigale chahonyo imbiri wa vasaza veve, kandi si naveho mundu kali mulala ulimuhonyia kutura mu zinguru ziange mba.

¹¹ Ndaheriza lisangala lilie liosi, masavo gu mweli muhia kandi masabato geege goosi, kandi mavugano geege gidiini.

¹² Ndononyia mizabibu kandi mikuyu jije josi ijayavoola ndi avasaza veve vamuha kigira yakola ovoheyi navo. Ndagirung'anyia mizabibu yiji kandi mikuyu yiji kuva umulitu, kandi zinyama ziu muvulimu zilajidiviza.

¹³ Ndahaana mageri kuye ku ing'inga ya yaanzivilira, lwa yasamba vimuli vifunya mwayu ku Baali, kandi niyivika zimingiri ziu mumatu kandi niviuma viuvuguli nokolondelera avasaza veve. Yahova umali kovora.

Uvuyanzi vwa Yahova ku vandu veve

¹⁴ Kunangwa, ndamuvugura nu kumuhila mwigendanyama, kandi ndamoloma kuye nu vuyanzi.

¹⁵ Wene yeyo, inzi ndamwiranyira milimi jije jie mizabibu, kandi ndakora Livona liu vudinyu kuva kiliango chi Lisuuvirizwa. Wene yeyo alakandivuliri kuli yativura lwa yaali nakikiri musoleri kandi lwa yaza kutura mu kivala cha Egebeti.

¹⁶ Maku kalunu alananga musaza weve, kandi si alananga Baali mba.

¹⁷ Inzi ndakamukole avuli ku lieta lia Baali kandi mba.

¹⁸ Ing'inga yene yeyo, ndakalombe lilagana liange ni zinyama ziu muvulimu, na manyonyi kandi ni vilombe viosi, vimolaa ku lirova, kunangwa vivuli kusaliriza avandu vange. Ndatulizaho uvuta, kivavi kandi uvulwani kutura mu kivala, nokoleka vandu vange vamenye mu mirembe.

¹⁹ Avandu va Isiraeli, ndamukora muve umukali vange; ndava wa agiligali kandi musuuvirifu, Ndamanyia uvuyanzi vwange kandi zimbavasi ziange zitaveeye nekeheri; kandi ndamukora muve avandu vange mihiga ni mihiga.

²⁰ Ndamukora muve avandu vange mu vusuuvirifu kandi mulamanya ndi Inzi mbeeye Yahova.

²¹ Ku ing'inga yene yeyo ndahaana mativuli ku lisaala lia avandu vange Isiraeli.

²² Ndakora imbura kukuba ku lirova, na lirova lilahaana uvuswage, iwaini kandi amaguta ku Jezireeli.

²³ Ndaviika avandu vange mu kivala kandi ndavakora kugasizwa. Ndayaanza yavo avalangwa “Avatayanzwa,” kandi ndayaanza yavo avalangwa, “Avandu vataveeye avange.” Kalunu ndavoora, “Munyi muveeye avandu vange,” navo valativura, “Ivi oveeye Nyasaye wiitu.”