Hosea 13 - KITABU KITAKATIFU

Likalaga liu kumaliriza ku Isiraeli

¹ Ku ing'inga yavita, lwa ihiiri ya Efuraimu yamoloma, zihiiri zindi zia Isiraeli ziali nuvuti. Vamanyia liegehiza ku ihiiri ya Efuraimu. Navuzwa vandu vaakora uvwoni ku lisigamira Baali. Kigira yaga, vosi valakuza.

² Avandu yava vazizagilira kokora uvwoni, valomba vifananyi vie ifeza nu kuvisigamira. Vifananyi yivi vialombwa na vandu vaveeye avasiza. Vavoola ndi, “Muhaane visiuviliru ku vifananyi yivi!” Avasaza vavusavusaa vifananyi vie vimoli.

³ Kulwayago, avandu yava valakama kuli malesi kandi kuli iliime likamaa mugambazuri. Valava kuli mukuzi gwi imbuza ihilaa kutura Koloze, kandi valava kuli umwochi guvitiraa mu muluhu.

⁴ Yahova avoora, “Inzi mbeeye Yahova Nyasaye winyu, uwamuleta kutura mu kivala cha Egebeti. Si muveeye na Nyasaye wundi nataveeye Inzi. Inzi wengine mbeeye muhonyi winyu.

⁵ Inzi niye waamulinda mwigendanyama, mu kivala chumu.

⁶ Navuzwa lwa mwaduuka mu kivala kilahi yiki, mwalia kuduuka ni mwiguta. Maku mwatanga liegingira kandi ni munzivilira.

⁷ Kunangwa ndamwingilira kuli isimba; ndamugoneka kuzinzira zienyu kuli engo.

⁸ Ndamwingilira kuli iduba imali kunuurwa vana vayo, kandi kuvatandula. Ndamwita kuli isimba yitaa inyama yu mu vulimu nu kugitandulanyia mu vindonye.

⁹ “Inzi ndadiviza munyi avandu va Isiraeli! Nivwaha unyala kumukonya?

¹⁰ Mwami winyu aveeye haliha aduuki kumuhonyia? Aviimiliri vinyu vosi vaveeye haliha vamukingi, avamwavoola, ‘Okohe mwami kandi okohe mwimiliri?’

¹¹ Inzi mali kumuha avami mu vutima vwange, kandi mali kuvatuliza kumunyi muvutima vwange uvululu.

¹² “Uvuchamu vwa avandu va Isiraeli vuvikiywi harara, kandi uvwoni vwavo vuvikiywi mu mang'oda.

¹³ Munyi muveeye mu vuzunu kuli vwu mukali ulumwaa. Navuzwa mwana uyu aveeye vugira limanyiriza; lwa ing'inga iduuka yu kwivulwa mwana uyu si yenya kutura munda mwa mama weve mba.

¹⁴ Inzi si ndahonyia vandu yava kutura mu kivala cha vakuzu si ndavasoola kutura mu likuza mba. O, likuza, kivi chicho chu vulwaye vudamanu keveeye haliha? O, kirindwa, lidiviza liilio liveeye haliha? Inzi sindavererera vandu yava kandi mba.

¹⁵ Kali niiva avandu va Isiraeli valazizagilira kuviruka kuli indiva, ndatuma imbuza yikivi kutura Ivugwi mu changalangwe, na iluminya visenukiru via mazi kandi vidaho viavo. Ilatulizaho ivindu viavo viosi viuvuguli.

¹⁶ Avandu vilidaala lia Samaria valanyora mageri kigira vamali kwibaala ku inzi. Vosi valitirwa mu vulwani; avana vaavo valasionolanywa mu vidonye, na vakali vaavo avaveeye ni zinda valatemanywa.”