Hosea 12 - KITABU KITAKATIFU

¹ Vuli kindu cha avandu va Isiraeli vakoola kutura mugamba zuri kuduuka vudiku, keveeye icha vuzwa kandi ichilidiviza. Vugadi kandi vikolwa viekirage viameedeka muvo. Valomba malagano navandu va Asiria kandi vahiraa maguta gimizeituni mu Egebeti.”

² Yahova aveeye namayalo ku vandu vi Ivuyuda. Azizaa kandi kuhaana mageri ku avandu va Isiraeli kigira likora liavo. Alavatuunga ku agavamali kokora.

³ Muguuga wavo Yakobo yang'usana na amwavo weve Esau malongo lwa vombi vaali nivakikiri munda mwa mama wavo. Lwa Yakobo yaviruka yalwana na Nyasaye.

⁴ Yalwana nengelosi kandi naguuta. Yalira kandi nateeva ligasizwa. Nyasaye yaza ku guuga wiitu Yakobo ha Bezeli kandi namoloma naye.

⁵ Uyu ni Yahova Nyasaye Wuvunyali Yahova liveeye lieta lienyekaa lisigamirwi.

⁶ Kunangwa munyi visukululwi via Isiraeli, musuuviri mu Nyasaye winyu kandi mwirane kuye. Muve avasuuvirifu kandi vilikalaga lirungi, ma ku mulindiliri Nyasaye winyu kazozo.

Makuva Gandi Manyingi Gilikalaga

⁷ Yahova avoora, “Avandu va Isiraeli si vaveeye avasuuvirifu mba; vayaanza kugaada avakiranyi niligera liuvugadi.

⁸ Vavoola, ‘Kunyi koveeye avatugi ligali kandi; kunyi kumali kugwa avahinda. Si aveeyeho mundu unyala konyoora uvugadi, nuvuhinda vwitu vwosi mba.’

⁹ Navuzwa inzi, Yahova Nyasaye winyu uwa muletaa kutura Egebeti, ndamukora mumenye mumahema kandi, kuli mwakora lwa inzi ndaaza ku munyi muchangalangwe.

¹⁰ “Inzi ndaamoloma ku vaporofeti kandi nimbaha malola manyingi. Inzi ndiganihiza avandu vange kuvitira ku avaporofeti.

¹¹ Navuzwa vifananyi visigamirwa mu Gileadi, kandi yavo avavisigamira valakakuzi. Zigiriki zihaanangwa kuli kisiuviriru mu Giligali, kandi uvwali uwene yeyo navugwi vitumi via magina mu mulimi gwaalimwa.”

¹² Guuga wiitu Yakobo yiruka nazia Mesopotamia, uwa yakolera wundi mundu miyinzi jukulinda magondi geege kunangwa anyoore mukali.

¹³ Yahova yatuma muporofeti kuzia kosoola avandu va Isiraeli kutura muvutumwa mu kivala cha Egebeti kandi nukuvalinda.

¹⁴ Avandu va Isiraeli vamali kokora Yahova kuva nu vutima vululu. Gavadukiraa vakuzi kigira mahiolo gaavo. Yahova naavahe mageri kigira vamali kumuviika muzisoni.