Hosea 11 - KITABU KITAKATIFU

Vuyanzi vwa Nyasaye ku Vandu Veve Avibaali

¹ Yahova avoora, “Lwa Isiraeli yaali mwana inzi ndamuyanza kandi ndamuranga kutura Egebeti kuli mwana wange.

² Navuzwa lwa ndameda kumuvalanga, nilwo lwayazizagilira kutura ku inzi. Avandu vange vahaana visiuviliru ku Baali, kandi vasamba vifunya mwayu ku vifananyi.

³ Kali niiva wigiza vandu va Isiraeli kogenda. Ndaavavika mu makono gange, navuzwa si vamanyiriza ndi ni inzi wavahonyia mba.

⁴ Ndaavaleta nizimbavasi kandi nuvuyanzi. Ndaatuliza inara ku mavega gaavo, kandi nimbaliihiza.

⁵ “Vasuura kwirana ku inzi, na kulwayago kuduuka viirane Egebeti, kandi mwami wa Asiria alakavamiihi.

⁶ Vulwani vuliva mu madaala gaavo manene, kandi navwononyie zitiru zievilivwa viavo nokoheliza lilohiza liavo.

⁷ Avandu vange vasaviyi kugirung'ana kutura ku inzi. Navaaniri kigira iniira eveeye kuvo, navuzwa umundu kali mulala si alivagingira mba.

⁸ “Avandu va Isiraeli, inzi nyara ndi kumuleka? Inzi nyara ndi kusuura munyi? Inzi nyara kumudiviza kuli ndaadiviza Adamali, anoho inzi nyara kumukolera kuli ndaakolera Zeboiimu? Inzi si nyara kokora ndio mba! Vuyanzi vwange ku munyi voveeye vunyingi ligali.

⁹ Inzi si ndamuha mageri mu vutima vwange mba. Sindadiviza avandu va Isiraeli kandi mba. Inzi mbeeye Nyasaye na si mbeeye umundu mba. Inzi, oveeye Mutakatifu mbeeye ni munyi. Si ndaza ku munyi nu vutima mba.

¹⁰ “Inzi Yahova, ndahuuma kuli isimba ku avasigu vaavo, kandi avana vange valirana nivadegera kutura Imadioli.

¹¹ Valaza vwangu kuli manyonyi kutura Egebeti, kandi valaza vwangu kuli makuulu kutura Asiria. Inzi ndakaviranyie yengo wavo kandi. Inzi Yahova, mali kovora.”

Avandu va Isiraeli navandu vi Ivuyuda Vakalagiywi

¹² Yahova avoora, “Avandu va Isiraeli vakumberizi novovehi kandi nuvugadi. Avandu vi Ivuyuda vakikiri avibaalu ku inzi, Nyasaye musuuvirifu kandi Mutakatifu.