Hosea 1 - KITABU KITAKATIFU

¹ Yili ni likuva lia Yahova yamoloma ku Hosea mwana wa Beeri mu ing'inga ya Uzia, Jozamu, Ahazi, na Hezekia vaali avami vi Ivuyuda, kandi mu ing'inga ya Jeroboamu mwana wa Jehoashi yaali mwami wa Isiraeli.

Mukali na Avana va Hosea

² Lwa Yahova yamoloma ku avandu va Isiraeli kuvitira ku Hosea lwu kutanga, yamuvolera, “Zia oserere mukali utaveeye musuuvirifu, na avana va wiivula naye valava kandi kuli mama wavo. Muliiva kuli yilio avandu vange vamali koleka Inzi na vamali kugwa avandu vataveeye avasuuvirifu.”

³ Kunangwa Hosea yaaserera Gomeri mukaana wa Dibulaimu. Gomeri yavereka, niyivura mwana muyaayi wukutanga.

⁴ Yahova yavolera Hosea, “Umuguriki ‘Jezireeli’ kigira ku ing'inga engekeeke ndahaana mageri ku avandu vinyumba ya Jehu kigira uvulumindi vwa yakola aha Jezireeli. Ndaheriza uvwami vwa avandu va Isiraeli.

⁵ Ku ing'inga yene yeyo, ndadiviza zinguru zie liihi lia Isiraeli mu livona lia Jezireeli.”

⁶ Gomeri yavereka kandi, niyivura mwana mukaana. Yahova yavolera Hosea, “Umuguriki utayaanzwa, kigira Inzi si ndamanyia vuyanzi vwange ku avandu va Isiraeli mba anoho si ndavasamiiha mba.

⁷ Navuzwa ndava nuvuyanzi ku avandu vi Ivuyuda. Inzi Yahova, Nyasaye wavo, ndavahonyia, navuzwa si ndavahonyia nu vuta, anoho ni kivavi, anoho nu vulwani anoho ni zibarasi kinga navasaza vi zibarasi mba.”

⁸ Lwa Gomeri yaali niyaakalekera kunyunyia mukaana weve, yavereka kandi ma niyivura mwana muyaayi.

⁹ Yahova yavolera Hosea, “Umuguriki sivaveeye vandu vange mba, kigira avandu va Isiraeli si vaveeye avandu vange mba, kandi Inzi si mbeeye Nyasaye wavo mba.”

Lisuuvirizwa ku Avandu va Isiraeli

¹⁰ Avandu va Isiraeli valakave vanyingi kuli muyeke gwu munyanza ugunyala kuvula kuvalizwa anoho kogerwa. Kalunu Nyasaye avavoolera, “Munyi si muveeye avandu vange mba,” navuzwa ing'inga yiza lwa livavoolera, “Munyi muveeye avana va Nyasaye omenya!”

¹¹ Avandu va Isiraeli kandi avandu vi Ivuyuda valakahambane harara. Valaketovolere aveene mwimiliri mulala, kandi valazizagilira konyoora uvutugi mu kivala chavo aveene. Yee, Lidiku lia Jezireeli lilava linene ligali!