Haggai 1 - KITABU KITAKATIFU

Lilaga lia Yahova Kwumbaka Litembeli Vuhia

¹ Mulidiku liu kutanga liu mweli gwa sitamu muhiga gwa kaviri gwi liamiiha liu mwami Dariasi wa Pasia, Yahova yamoloma kuvitira ku muporofeti Hagai, ku Zerubabeli mwana wa Shealitieli, mwamihi wivuyuda, kandi ku Joshua mwana wa Jehozadaki, musaalisi munene.

² Yahova Wuvunyali yavolera Hagai, “Avandu yava vavoola ndi yiyi si eveeye ing'inga indahi yu kwumbaka Litembeli vuhia.”

³ Maku Yahova yahaana makuva yaga ku vandu kuvitira ku muporofeti Hagai.

⁴ “Avandu vange, kigira ki munyi mumenyi mu zinyumba ziumbakwa vulahi, navuzwa Litembeli liange liveeye amang'anye?

⁵ Si muloraa chekoleka ku munyi?

⁶ Mwamiza vuswage vunyingi, navuzwa ligesa lienyu liveeye likekeeke. Muveeye ni chukulia, navuzwa si kimuduukaa mba. Muveeye ni iwaini, navuzwa si muhambikaa mba! Muveeye ni zinguvu, navuzwa si zimuheza luya mba. Munyoolaa mitungu, navuzwa mujiviikaa mu zimuya ziafuduka.

⁷ Si muloraa kigira yaga ni gekoleka?

⁸ Kalunu muzie mu vigulu mwenye zimbaho mwumbake Litembeli vuhia; maku mulakanyaanzizi kandi mulasigamiri kuli genyekaa.

⁹ “Mwasuuvira mulanyola ligesa linyingi, navuzwa mwanyoola ligesa likekeeke. Lwa mwaleeta yengo via mwagesa, ndaviononya. Ndakora ndio kigira Litembeli liange liveeye amang'anye, na vuli mundu ku munyi ayinziraa vudinyu ku inyumba yeeye.

¹⁰ Yiki nicho kigira imbura nivula kukuba, kandi kindu si kinyala komera mba.

¹¹ Inzi mali koleta kimeyu mu kivala choosi: ku vigulu, mu milimi ju vuswage, mu milimi ji kizabibu kandi mu milimi ja mizeituni, kandi ku vuli kitagwa kimeraa, ku vandu, zinyama kandi ku vuli kindu cha mugerizaa kutaga.”

Avandu Valonda Malago ga Yahova

¹² Maku Zerubabeli, Joshua na vandu voosi vaali ni vakatula Babiloni mu vuhaambe, vakora cha Yahova Nyasaye wavo yavavolera. Vaali nu vuti kandi vaatia muporofeti Hagai mutumwa wa Yahova.

¹³ Maku Hagai yahaana makuva ga Yahova ku vandu: “Inzi ndakave na munyi; yili ni lilagana liange.”

¹⁴ Yahova yadinyiriza vandu kuyinzira ku Litembeli: Zerubabeli mwami wi Ivuyuda, Joshua musaalisi munene na vandu vosi vaali ni vatuli mu vuhaambe, vosi vatanga kuyinzira ku Litembeli lia Yahova Wuvunyali, Nyasaye wavo.

¹⁵ Yili liali lidiku lia 24 liu mweli gwa sita mu muhiga gwa kaviri lwa Dariasi yaali mwami.