Habakuk 2 - KITABU KITAKATIFU

Amativuli ga Yahova ku Habakuki

¹ Ndakasingili ku munara nu kulindilira cha Yahova azizaa kombolera nduuki kovora, kandi amativuli galihaana ku liegana liange.

² Yahova yahaana mativuli yaga ku inzi: “Ong'ode vulahi ku kibaho cha madohi chanzizaa kukuvuulira, kunangwa vandu vaduuki kosoma.

³ Ogang'ode, kigira ing'inga ikikiri kuduuka lwayaga gaava giligali. Navuzwa ing'inga yiza vwangu, kandi chanzizaa kukumanyia kilakave cha giligali. Galaloleka ndi kilaaza galaha, navuzwa ukilindiliri; gaveeye giligali yiki kilekoleka kandi sikilakalindagiliri mba.

⁴ Yaga nigo makuva zana: ‘Yavo avaveeye vadamanu, sivalakahononoke mba; navuzwa yavo avaveeye avalungi valakave mwoyo kigira vaveeye avasuuvirifu ku Nyasaye.’ ”

Kilaamo ku Vandu Vataveeye Avalungi

⁵ Vutugi voveeye vugadi. Avandu vahuvaalu vaveeye ni liekonya kandi sivituuliraa mba. Vaveeye kuli likuza kigira si vaguuta mba. Nicho kigira nivaguuta zihiiri.

⁶ Avandu vaguutwa valasekeliza vaguuti vaavo nu kuvakolera kehenyahenye. Valavoora, “Muvuguraa vitaveeye vienyu, navuzwa mwalaamwa! Mulazizagilira konyoora vutugi muliniga vandu vaveeye na magovi ginyu kutunga kuduuka ng'inga ki?”

⁷ Navuzwa mukikiri ku gaamanya, munyi avandu vamali kuguuta vandi, mulava ni ligovi kandi mulakanigwi kutunga vukala. Avasigu valaza kumudegeliza. Valamuhira mu vuhaambe!

⁸ Mwalanya vandu vi zihiiri zinyingi, navuzwa kalunu yavo avamali kohononoka valamulanya kigira vulumindi vwamwakola kandi kigira kivihiri cha mukoleraa vandu vi kivala na madaala manene.

⁹ O, vayaayi, munyi mwalaamwa kigira mumali kuhaana ku vandu vi zinyumba zienyu vutugi kutura ku vindu via mwanyaga vandi kuzinguru. Mugerizi kukinga hango hinyu kutura ku vusaliri kandi vuhimwa!

¹⁰ Navuzwa lilohiza lienyu limali koleta zisoni ku zinyumba zienyu; kandi lwa mudiviza zihiiri zinyingi mweleteraa lidiva aveene,

¹¹ kali magina ga madigi galamulilira kandi lukwiri lulahulilika ku miguliru.

¹² O, vayaayi munyi mwalaamwa kigira mwanyoola lidaala linene mulitahiza masahi, kandi mumali ku liumbaka mu vulumindi.

¹³ Zihiiri zia mwaguuta ziveeye ni miyinzi ja vuzwa kandi viosi viavamali kwumbaka visambwa mu lumemo liu muliru. Yahova Wuvunyali umali kokora yaga.

¹⁴ Navuzwa kivala kilakave ni limanya linyingi liu vukumi vwa Yahova kuli zinyanza zizura mazi.

¹⁵ O, vayaayi munyi mwalaamwa kigira! Mu vutima vwinyu vululu mwalegeliza kandi mwachaya vatende vinyu; mwavakola ni vagenda nivayekayeka kuli vahambiku.

¹⁶ Munyi kandi mulava mu zisoni havogono hu kuva nu luyali. Munyi mulakanwi kandi mulakagende ni muyekayeka. Yahova alakahaane mageri ku munyi kuli gamudukira, kandi luyali lwinyu lulakagirunganywi kuva lichaya.

¹⁷ Mwatema militu ja Lebanoni; kalunu na munyi mulatemwa. Mwitaa zinyama zimenyi mu; kalunu zinyama yizio zilamutihiza. Yaga galakekoleke kigira vwiti vwa mumali kokora kandi kigira kivihiri chiinyu cha mukoleraa vandu vi kivala na madaala manene.

¹⁸ Kifananyi keveeye navokonyi ki? Yiki ni kindu chalombwa nu mundu kandi sikikovoolera kindu mba, nitali kivoola vovehi. Kifananyi yiki kevoolera ki mulombi wa cho aduuki kukisuuvira? Aveeye munyasaye utamolomaa!

¹⁹ O, vayaayi, munyi mwalaamwa kigira, muvooleraa kifananyi kitamolomaa chalombwa ku lubaho ni ligina: “Vuka! Anoho singira!” Kifananyi kinyala kukuvulira kindu? Kinyala kuva chakunikwa ni ifeza, kandi zahabu, navuzwa sikeveeye ni livamwoyo mba.

²⁰ Yahova aveeye mu Litembeli lilie Litakatifu; gaduukanaa vuli mundu woosi akiring'ane imbiri weve.