Ezekieli 8 - KITABU KITAKATIFU

Amalola ga Zacheli ga kaviri kutura ku Nyasaye 8:1—10:22 Kusigamira Vifananyi mu Jerusalemi

¹ Ku lidiku lia katano ku mweli gwa sita mu muhiga gwa sita gwi lihaminywa lietu, ndaali ninzikaye munyumba yange harara na vimiliri vi lihaminywa kutura Ivuyuda. Nonoho ndaahulira zinguru ziu Mwami Munene Yahova ziizi ku inzi.

² Ndahenza na ndaalora kindu chalombwa mu lifana liu mundu. Kutura mu kisindi kuzia igulu, kindu yiki chang'ereng'ana kuli mugasa; na kutura mu kisindi kuzia hasi chaloreka kuli muliru.

³ Kelombe yiki chanyiira mukono nigudiila liisu ku mutwi gwange. Maku mu malola yaga Roho wa Nyasaye yang'inga igulu mwigulu niyambila mu Jerusalemi. Yambira mugati mwuvwingiliru vwa Ivaale vwi Litembeli, ahikifananyi chukuvihiliriza ku Nyasaye chaali.

⁴ Maku ndaalora uvukumi vwa Nyasaye wa Isiraeli ahene yaho, kuli amalola ga ndaali nindoli ha mugera gwa Kebari.

⁵ Nyasaye yambolera, “Mwana wu Mundu, henza kolovega lwa Ivaale.” Ndahenza, na ndaalora kifananyi chaali chukuvihiliriza ku Nyasaye ahimbi nu vwali mu vwingiliru vwi kirivwa.

⁶ Nyasaye yambolera, “Mwana wu Mundu, ololaa agekolekaa? Henza ku vindu viukuvihiliriza yivi via vandu va Isiraeli vakora hano, kongola kuzia ihale ligali kutura hatakatifu hange. Ulalola kali vindu viukuvihiliriza vinyingi kuvita yivi.”

⁷ Yambugura niyambila ha vwingiliru vwu mugizi gwichova, kandi yamanyia umuluhu mu lidigi.

⁸ Maku yambolera, “Mwana wu Mundu, ufuduli mu lidigi yili.” Lwa ndaafudula mu na ndanyoora uvwingiliru.

⁹ Yambolera, “Ingira mugati na olole uvudamanu kandi vindu viukuvihiliriza via vandu vakolaamu.”

¹⁰ Kunangwa ndingira mugati nimbenza. Ndalora ovong'ole ku madigi vwi zinzoka, ni zinyama zindi ziukuvihiliriza kandi vifananyi viosi, via vandu va Isiraeli vaasigamira.

¹¹ Aviimiliri 70 va Isiraeli harara na Jaazania mwana wa Shafani vaali nivasingiyi imbiri wi vifananyi yivi. Vuli mulala kuvo yaali nagumiyi ikiju cha vasambiraku ivifunyaa umwayu, kandi umwochi gwatura ku vifunya umwayu, niguvuya kuzia mwigulu.

¹² Maku Nyasaye yambolera, “Mwana wu Mundu, ololaa agaviimiliri va Isiraeli vakora mu vwivisu? Vosi vaveeye mukeng'oze chizuuyi vifananyi kandi vavisigamiraa. Vavola ndi, Yahova akolola mba! ‘Yahova umali koleka kivala.’ ”

¹³ Maku Yahova yambolera kandi, “Ulavalola ni vakora kali vindu vinyingi ligali viu kuvihiliza kuvita yivi.”

¹⁴ Kunangwa yambugura niyambira Ivaale wi kilivwa chi Litembeli, kandi niyamanyia vakali nivasioma kigira likuza liu munyasaye Tamuzi.

¹⁵ Yahova yateva, “Mwana wu Mundu, ololaa yaga? Ulalola kali vindu vinyingi ligali viukuvihiliriza kuvita yivi.”

¹⁶ Kunangwa yambugura niyambila mugati mwu mugizi gwi Litembeli. Hene yaho, ahimbi nu vwingiliru vwi Litembeli, hagati hu vwali nulusimbu, vaaliho avasaza ishilini natano. Vaali nivakubi Litembeli migongo kandi vaali nivinaminyi mitwi jaavo nivahenzi Ivugwi, nivasigamiraa iliuva liali nilitongaa.

¹⁷ Maku Yahova yambolera, “Mwana wu Mundu, ololaa yaga? Avandu vi Vuyuda yava vakikiri kuduukira mu likora vindu viosi viu kuvihiliriza via ivi umali kolola yaaha kandi nokokola kirage mu kivala choosi. Awa vaduukana vaaze kuvikolera mu Litembeli nokongola kali kuva nu vutima vunyingi ligali? Henza kuli vanyega mu liiva liosi liokokola uvudamanu!

¹⁸ Kulwayago, ndahaana mageri kuvo mu vutima vwange. Sindavahonya anoho kuvamanyia zimbasi mba. Kali nivasaara ku inzi mu lihanzuka linene, navuzwa si ndavahuliriza mba.”