Ezekieli 7 - KITABU KITAKATIFU

Keheri Keveeye Ahimbi Ku Vandu va Isiraeli

¹ Yahova yamoloma na inzi.

² Yavoola, “Mwana wu Mundu,” yaga nigo aga inzi Yahova Wuvunyali mbolera vandu va Isiraeli: Yili nilimalilika lie kivala choosi!

³ “Isiraeli, keheri kimali kuduuka ku munyi. Ndava nu vutima ni munyi, kigira nziza kumukalagira ku agamumali kokora. Ndamukalagira kolondekana ku likora lienyu kandi ndamutunga ku miyinzi jinyu josi jukuvihiliriza.

⁴ Inzi si ndamuleka anoho kumumanyia zimbavasi mba. Nziza kumuha mageri kigira vindu viukuvihiliriza viamumali kokora, kunangwa muduuki kumanya ndi, inzi mbeeye Yahova.”

⁵ Yaga nigo ga Yahova Wuvunyali avoora, “Kivi kenene kilahongela kuzaa ku munyi.

⁶ Keheri kiduuki! Keheri kimali kuduuka ku munyi. Munyi mumali kudiva!

⁷ Kivi kimali kuduuka ku munyi, avandu vamenya mu kivala. Ing'inga eveeye ahimbi lwi lisangala lilakavuli kuva ho Ha kiguru hu kusigamira vifananyi navuzwa ligoyana.

⁸ “Nonoho kalunu vuliduhu vwu uvutima vwange vulava ku munyi. Inzi mukalagiraa ku gamumali kokora, kandi ndamutunga ku miyinzi jinyu josi jukuvihiliriza.

⁹ Inzi si ndamuleka anoho kumumanyia zimbavasi mba. Inzi nziza kumuha mageri kigira ivindu viukuvihiliriza via mumali kokora, kunangwa muduuki kumanyiriza ndi inzi mbeeye Yahova, kandi Inzi niyie umuhezaa mageri.”

¹⁰ Lidiku lie kivi lizaa ku vandu va Isiraeli. Kirage kemedeki. Lielola liveeye linyingi ligali.

¹¹ Kirage kemedaa uvuchamu vunyingi. Avandu vaavo, anoho uvuhinda vwavo anoho uvukumi vwavo si navitigale mba.

¹² Ing'inga yiza, lidiku liveeye ahimbi. Avakiranyi vatasangala anoho vatasioma mba, kigira vutima vwa Nyasaye vululu vulava ku vandu vosi.

¹³ Umukiranyi sialinyoora mulimi gwa yakiranya lwa vombi vaveeye mwoyo mba, kigira amalola kolondekana nu muganda gwosi si galagirung'anywa mba. Yava avaveeye nizimbi si valahononoka mba.

¹⁴ Kisiriva kikubaa ma vuli mundu yetegeka. Navuzwa siaveeye ho kali mulala uzizaa mu liihi, kigira vutima vwa Nyasaye vulava ku vuli mundu woosi keleng'ani.

Mageri Kigira Uvwoni vwa Vandu va Isiraeli

¹⁵ Lilwaana liveeye mu zinzira, kandi vulwaye ninzara viveeye mu zinyumba. Mundu woosi oveeye mu mulimi alitirwa yo ni kivavi, na ku oyo oveeye mu lidaala linene inzara nu vulwaye vilamudiviza.

¹⁶ Ku vosi avalakahononoke valakave mu vigulu nivasioma kuli makuulu gu mumavona kigira uvwoni vwavo.

¹⁷ Makono ga vuli mundu galakaleme na amalu goosi galakave madedekere kuli amazi.

¹⁸ Naviviiki zinguvu ziamagunia nukuva muvuti vonene ligali. Mitwi jaavo na jivegwe, kandi vosi vaza vave muzisoni.

¹⁹ Navasiuvi zizahabu ni zifeza ziavo mu zinzira, nazive kindu kitaveeye kilahi. Izahabu ni feza yaavo sinivahonye mu lidiku liuvutima vwa Yahova vululu mba. Yivi viosi si vilavakola kwiguta mba, kigira izahabu ni ifeza yavo vimali kuvakola kwikigatira nukuzia mu vwoni.

²⁰ Maziambiri velola kigira magina gaavo guvuguli, navuzwa vaagatumikila kolomba vifananyi viukuvihiliriza. Kulwayago inzi ndavikola kuva ivindu kitaveeye vinifu kuvo.

²¹ Yahova avoora, “Inzi ndaleka vageni vavalanye, kandi avavunanyi vamalago valavugula vutugi vwavo kandi valavwonogonyia.

²² Inzi si ndasora Litembeli liange litakatifu lwa avanuuli valingila mu nukuliononya mba.

²³ “Vuli kindu keveeye muligoyana kandi kivala chizuuyi avalumindi kandi avandu vikirage vizuye madaala manene.

²⁴ Inzi ndaleta zihiiri zindamanu ligali hano, kandi ndazileka zivuguli zinyumba zienyu. Avasaza vinyu vizingulu navave avadedekere lwa nandeke zihiiri kwononya havundu ha mwasigamiraa misambwa.

²⁵ Likuza mwoyo liduka mulenya mirembe navuzwa si valajinyoola mba.

²⁶ Kivi kenene kilaaza vuli kase kandi ulusuma lwa makuva govovehi lulaza. Valageliza konyoora malola kutura ku muporofeti; liegiza lielilaga navasaalisi lilagota, kandi lihaana zing'anagani kutura ku vakulundu lilagota.

²⁷ Mwami alakasiome, na mwana wumwami alakuza mwoyo, kandi avandu valadegera nuvuti. Ndamuha mageri ku goosi gamumali kokora. Ndamukalagira munzira ndala nzere kuli mukalagiraa vandi. Yaga galamumanyia ndi inzi mbeeye Yahova.”