Ezekieli 6 - KITABU KITAKATIFU

Yahova Yakalagira Lisigamira Vifananyi

¹ Yahova yamoloma na inzi.

² Yavoola, “Mwana wu Mundu, henza kuvigulu via Isiraeli ma ovoolere avandu makuva gange.

³ Ovolere avandu va Isiraeli vahuliri likuva lia Yahova, vahuliri aga inzi, Mwami munene Yahova, mbolera vandu vaveeye mu vigulu, tugulu, mimalina, na mamavoona: ndadiviza havundu hoosi ni kivavi ha vandu vasigamira vifananyi.

⁴ Uvwali volononywa nu uvwali vwi vifunyaa umwayu vuladivizwa. Ndiita avandu vosi uwene yeyo, imbiri wi vifananyi viavo.

⁵ Ndasalanyia miviri ja vandu va Isiraeli; Ndasalanyia nu kukumberiza uvwali vwavo.

⁶ Amadara goosi ga Isiraeli galadivizwa, kunangwa vwali vwavo vwosi kandi ivifananyi viavo vilavunaganywa mu vidonye, vwali vwavo vwi vifunya mwayu viladegerizwa, na vuli kindu chavalomba kilagota.

⁷ Avandu valitwa havundu hoosi, kandi yavo avalihononoka valakamanye ndi, Inzi mbeeye Yahova.

⁸ “Inzi ndakaleke valala vahononoke ku liitwa kandi vasalanywi hagati hizihiiri,

⁹ uwa valimenya mu lihaminywa. Wene yeyo vaala kanzizulizi nukumanya ndi inzi mali kuvaha mageri nukuvaviika muzisoni, kigira mioyo jaavo jitasuuvila, valeka inzi kandi vayanzilira vifananyi. Valakavihilizane aveene ku aveene kigira zimbi ni ivindu viezisoni via vamali kokora.

¹⁰ Navamanye ndi Inzi mbeeye Yahova; Inzi si ndatiihiza vugira koleta kivi kenene yiki kuvo mba.”

¹¹ Mwami munene Yahova avoora, “Mukubage makono ginyu! Muduyi hasi virenge vienyu! Muliri novovereri kigira uvudamanu vwosi kandi vindu viosi vielivihilirizwa via vandu va Isiraeli vamali kokora. Vazizaa kukuzira mu vulwani, inzara, kandi vulwaye.

¹² Yavo avaveeye ihale navalwale ligali ma navakuzi; yavo avaveeye ahimbi navakuziri muvulwani; yavo avalihononoka navakuzi kigira inzara. Valakahuliri uvuliduhu vwosi vwu vutima vwange.

¹³ Miviri jaavo mikuzu jilakasalanywi hagati hi vifananyi kandi ku vwali vwosi, najisalanywi ku vuli tugulu tutambi, kondongozi ya vuli kiguru, isi wumusala gwosi umuvisi kandi nu muduguyu gwosi munene, na havundu hoosi aha vasambira visiuviliru ku vifananyi viavo. Maku vuli mundu namanyirizi ndi inzi mbeeye Yahova.

¹⁴ Yee, ndanyira mukono gwange nukudiviza kivala chavo. Ndakekola kuva amang'anye kutura mwigendanyama kuduuka mu lidaala linene lia Ribula Ivaale, vugira koleka havundu hoosi ha vandu va Isiraeli vamenya. Maku vuli mundu namanyirizi ndi inzi mbeeye Yahova.”