Ezekieli 5 - KITABU KITAKATIFU

Zacheli Yavega Liisu Lilie

¹ Yahova yavoola, “Ivi Mwana wu Mundu, vugula kivavi chugi ukitumikiri kuli ologembe lwu muvegi ma ovege liisu liilio liosi ku mutwi, kandi zinderu zizio ziosi. Maku ogere liisu ku ratiri kandi uligavulanyie mu vidonye vivaga.

² Lwi likumberiza lie lidaala lihera, uvuguli kedonye chukutanga ma ukisambiri hagati hi lidaala zana yili. Uvuguli kedonye chakaviri okikalanyie ni kivavi lwa ovodongana ichova wi Lidaala yili. Usalanyie kedonye cha kavaga kunangwa imbuza iduuki kukiduminya, na ndakelondelera ni kivavi change.

³ Uvuguli liisu likekeeke kutura ku liisu zana yili, ma ulivohe ku lukigiti lwi iganza yooyo.

⁴ Kandi uvuguli liisu lindi likekeeke ulisiuvi mu muliru na liduuki kuhia. Kutura mulio muliru gulalanda kuzia ku ihiiri yoosi ya Isiraeli.”

⁵ Yahova Munene avoora, “Henza ku lidaala lia Jerusalemi, Inzi mali kuliviika hagati hi kivala, ni vivala vindi viosi vi likumberizi.

⁶ Navuzwa Jerusalemi limali kwibaala ku malago gange kandi limali kumanyia ndi ni Lichamu ligali kuvita zihiiri zindi, kandi siliveeye nuvuti kuvita vivala vindi viagikumberiza. Jerusalemi yasura lilaga liange kandi vavura kolonda malago gange.

⁷ Kalunu hulira, munyi avandu va Jerusalemi, aga inzi Mwami Munene Yahova mboraa. Kulivula kutia lilaga liange kandi kuvula kolonda malago gange, mumali kwivika mu vudinyu vunyingi kuvita zihiiri zindi zimukumberiza. Mumali kolonda miima ji zihiiri zindi.

⁸ Kulwayago, Inzi Mwami Munene Yahova muvooleraa ndi, mbeeye musigu winyu. Ndahaana likalaga ku munyi imbiri wi zihiiri ziosi.

⁹ Kigira uvudamanu vwosi vwa mumali kokora, ndahaana mageri ku munyi agangikiri kumukoleraku kandi maziambiri; kandi si ndakakolendio ing'inga yindi mba.

¹⁰ Kigira yaga, avababa valalia avana vaavo kandi avana valalia avababa vaavo. Ndahaana mageri ku munyi kandi ndasalanyia vosi avalitigala mwoyo.

¹¹ “Kulwayago, kuli inzi mbeeye Nyasaye oveeye mwoyo, Mwami Munene Yahova, kigira mumali kwonogonyia Litembeli liange ni vindu vidamanu kandi ni vindu viukuvihiliriza, ndatuliza liyaanzilira liange ku munyi. Si ndamuhonyia mba kandi si ndamuvererera zimbavasi mba.

¹² Kedonye chu kutanga cha vandu vovo valakuza kigira vulwaye kandi inzara mu lidaala; kedonye kindi cha kaviri valitirwa mu vulwani ichova wi Lidaala, Kedonye cha kavaga chu kumaliriza ndakisalanyia mu imbuza kandi ndavakunga ni kivavi.

¹³ “Maku uvutima vwange uvululu vulava ku munye kuduuka lwa neminywa mwoyo. Lwayaga goosi gakolekaa, mulamanya ndi Inzi, Yahova, mali komoloma ku munyi kigira mbeeye nu vutima na munyi mulivula kuva avasuuvirifu.

¹⁴ Ndamukora muve hazwa kandi mulanyegwa hagati hi zihiiri zimukumberizi, kandi imbiri wa yavo vosi avavitaa ahimbi nu munyi.

¹⁵ “Munyi mulava mu manyego kandi mu likolerwa kehenyahenye, mu lieganihizwa kandi kindu chukutiihiza ku zihiiri ziveeye ahimbi na munyi lwa mbana amageri ku munyi mu vutima vwange kandi nu muligondoka.

¹⁶ Ndatuliza yavo avahaana chukulia ku munyi na mulakuza kigira inzara. Mulahulira vuzunu vwi inzara kuli mivano juvuta miugi jilasiywi kumudiviza.

¹⁷ Ndaleta inzara kandi zinyama ziu muvulimu kwita vana vinyu, kandi ndaleta uvulwaye, kilage kandi iliihi kumwita. Inzi Yahova mali kovora.”