Ezekieli 48 - KITABU KITAKATIFU

Ligavula lie Kivala hagati hi Zihiiri

¹ Yaga na mita gi zihiiri: Kutangira ku lwako lwa Ivaale ahimbi ninzira ya Hezoroni, kuduuka mu vwingiliru vwa Hamazi, kuduuka mu lidaala lia Hazarenoni iliveeye ku lwako lwa Damasiko kolovega lwa Ivaale ahimbi na Hamazi; kandi kuzizagilira kutura Ivugwi kuduuka Imadioli, kidieli yiki kilava chi ihiiri ya Dani.

² Kidieli kikagata ni kidieli cha Dani kutura Ivugwi kuduuka Imadioli, kilava kidieli cha Asheri.

³ Kidieli kikagata ni kidieli cha Asheri kutura Ivugwi kuduuka Imadioli kilava cha Nafutali.

⁴ Kidieli kikagata ni kidieli cha Nafutali kutura Ivugwi kuduuka Imadioli kilava cha Manase.

⁵ Kidieli kikagata ni kidieli cha Manase kutura Ivugwi kuduuka Imadioli kilava cha Efuraimu.

⁶ Kidieli kikagata ni kidieli cha Efuraimu kutura Ivugwi kuduuka Imadioli kilava cha Rubeni.

⁷ Kidieli kikagata ni kidieli cha Rubeni kutura Ivugwi kuduuka Imadioli kilava cha Yuda.

Kidieli Kilahi hagati hi Kivala

⁸ Namuviki halovega kidieli kikagata ni kidieli cha Yuda kutura Ivugwi kuduuka Imadioli. Kilava zikilomita 12 ninusu uvuvambalaru kutura Ivaale kuduuka Isavaalu; kandi uvutambi vulava vulala vwere kutura ivugwi kuduuka Imadioli kuli kilala ku vidieli via vagavula ku zihiiri. Litembeli lilava hagati hi kidieli yiki.

⁹ Kidieli cha muviika halovega nu kuhaana ku Yahova, kilava uvutambi zikilomita 12 ninusu kandi uvuvambalaru zikilomita 10.

¹⁰ Avasaalisi valava ni kidieli chavo ku kidieli kitakatifu yiki. Kidieli yiki kilagerwa uvuvambalaru zikilomita 12 ninusu kutura Ivugwi kuduuka Imadioli, kandi uvutambi zikilomita 5, kutura Ivaale kuduuka Isavaalu. Litembeli lia Yahova na live hagati hi kidieli yiki.

¹¹ Kidieli yiki na keve cha vasaalisi vatakaswa, avaveeye visukululwi va Zadoku: Yava vandumikira nu vusuuvirifu kandi si vahambana na vandu va Isiraeli mu likora uvudamanu, kuli avandu vi ihiiri ya Levi vaakora.

¹² Kunangwa, avasaalisi yava valanyora kidieli keveeye kitakatifu ikikagata ni kidieli cha vandu va Levi, kandi na keve kitakatifu ku viosi.

¹³ Vandu va Levi valanyora kidieli chavo kilahi kolovega lwi Isavaalu wi kidieli cha vasaalisi. Kilagerwa uvuvambalaru zikilomita 12 ninusu, kutura Ivugwi kuduuka Imadioli, kandi zikilomita 5 kutura Ivaale kuduuka Isavaalu.

¹⁴ Kidieli cha haanwa ku Yahova keveeye kilahi ligali kuvita vidieli viekivala chiosi. Mundu si alaguliza anoho kugirung'anyia kidieli yiki mba. Keveeye kitakatifu kandi ni cha Yahova.

¹⁵ Kidieli kindi choosi kitigaye, uvuvambalaru zikilomita 12 ninusu kandi uvutambi zikilomita 2 ninusu, si keveeye kitakatifu mba, navuzwa kilatigala ku litumika lia kase ku vandu. Avandu vanyara komenya mucho kandi vanyara kukitumikira, kandi lidaala lilava hagati hacho.

¹⁶ Ligera liacho lilava zimita 2,250 zimbega ziosi kutura Ivugwi kuduuka Imadioli kandi kutura Ivaale kudura Isavaalu.

¹⁷ Lidaala lilakumberizwa nu vwiyangu vwi zimita 125 zimbega ziosi, kutura Ivugwi kuduuka Imadioli, kandi kutura Ivaale kuduuka Isavaalu.

¹⁸ Kidieli chaza kitigale, kolovega lwi kidieli kitakatifu, kilava zikilomita 5 ku zikilomita 2 ninusu kolovega lwi Ivugwi, kandi zikilomita 5 ku zikilomita 2 ninusu kolovega lwi Imadioli. Avandu vamenyi mu Lidaala valatumikira kidieli yiki kulima mu viukulia.

¹⁹ Avandu vosi avamenyi mu lidaala, kutura mu zihiiri ziosi zia Isiraeli valalima mu kidieli yiki.

²⁰ Kidieli choosi harara ni kidieli kitakatifu kindi ni miandu gi lidaala kilava zikilomita 12 ninusu ku zimbega ziosi.

²¹ Kidieli kitigara ku zimbega ziombi 2 zie kidieli kitakatifu kandi kidieli chi Lidaala, ekeveeye zikilomita 12 ninusu zimbega ziosi, kutura Ivugwi kuduuka Imadioli, ekehenzani ni vidieli vi zihiiri, kilava chu mwamihi munene. Kidieli kitakatifu chi Litembeli liveeye hagati hacho,

²² kandi kidieli cha vandu va Levi harara ni kidieli chi Lidaala, vilava hagati hi kidieli chu mwamihi munene. Kidieli chu mwamihi yiki, kilava hagati nu lwako lwi ihiiri ya Yuda nu lwako lwi ihiiri ya Benjamini.

Kivala chi Zihiiri Zindi

²³ Zihiiri zindi zitigala ziosi zilagavulirwa vidieli viavo kuli ndi: Ihiiri ya Benjamini ilanyoola kidieli kutura Ivugwi kuduuka Imadioli.

²⁴ Ihiiri ya Simioni ilanyoola kidieli kikagata ni kidieli cha Benjamini kutura Ivugwi kuduuka Imadioli.

²⁵ Ihiiri ya Isakari ilanyoola kidieli kikagata ni kidieli cha Simioni kutura Ivugwi kuduuka Imadioli.

²⁶ Ihiiri ya Zabuloni ilanyoola kidieli kikagata ni kidieli cha Isakari kutura Ivugwi kuduuka Imadioli.

²⁷ Ihiiri ya Gadi ilanyoola kidieli kikagata ni kidieli cha Zabuloni kutura Ivugwi kuduuka Imadioli.

²⁸ Kidieli kikagata ni kidieli chi ihiiri ya Gadi kolovega lwi Isavaalu, ulwako lulatula mu lidaala lia Tamara kuduuka ku mazi ga Meribazi Kadeshi. Lulavitira kolovega lwi Imadioli wu mugera gwa Egebeti kuduuka ku inyanza ya Meditareniani.

²⁹ Mwami Munene Yahova avoora, “Yiki nicho kivala cha ugavula mu vidieli hagati hi zihiiri zia Isiraeli keve kuli miandu kuvo.”

Virivwa via Jerusalemi

³⁰ Lidaala lia Jerusalemi lilava ni virivwa kuli ndi: Kolovega lwa Ivaale lidigi lilava uvutambi zimita 2,250. Kolovega lwene yilu lulava ni

³¹ virivwa 3; Kirivwa cha Rubeni, kirivwa cha Yuda, kandi kirivwa cha Levi. Virivwa yivi vilagulikwa mita gi zihiiri zia Isiraeli.

³² Kolovega lwi Ivugwi lidigi lilava uvutambi zimita 2,250. Lovega yilu lulava ni virivwa 3: kirivwa cha Josefu, kirivwa cha Benjamini kandi kirivwa cha Dani.

³³ Kolovega lwi Isavaalu lulava ni lidigi zimita 2,250 uvutambi. Lovega yilu lulava ni virivwa 3: Kirivwa cha Simioni, kirivwa cha Isakari kandi kirivwa cha Zabuloni.

³⁴ Kolovega lwi Imadioli, lidigi lilava zimita 2,250 uvutambi. Lovega yilu lulava ni virivwa 3: Kirivwa cha Gadi, kirivwa cha Asheri kandi kirivwa cha Nafutali.

³⁵ Uvutambi vwosi vwi lidigi lie lidaala zimbega ziosi zine ni zimita 9,000. Lieta lie Lidaala yili kutura kalunu lilalangwa, “Yahova Aveeye Hano!”