Ezekieli 47 - KITABU KITAKATIFU

Mugera Kutura mu Litembeli

¹ Umundu oyo yambira inyima mu vwingiliru vwi Litembeli. Mazi gaali nigaturaa hasi mu vwingiliru kandi nigazizaa Ivugwi, kolovega lwi Litembeli liahenza. Giturukaa hasi kutura isi we kedonye chi Isavaalu kolovega lwu vwali.

² Maku umundu oyo yambira ichova wa havundu hi Litembeli kuvitira munzira yi kilivwa chi Ivaale kandi niyambitizira mu kirivwa chi Ivugwi. Kagera kekekeeke kitulukaa kutura kolovega lwi Isavaalu wi Kirivwa.

³ Umundu oyo yaagera kidundu cho kogelera kuzia Ivugwi kandi ziali zimita 500 kandi niyambolera mbitili mu mazi. Mazi gandukira mu zimbigiyi.

⁴ Maku yaagera zimita zindi 500, kandi mazi gandukira mu maru. Yaagera zimita zindi 500 kandi mazi gandukira mu kikenge.

⁵ Yaagera kandi zimita 500, na hene yaho mugera gwaali musi ligali, si ndaali nyara kuvitiramu mba. Gwaali musi ligali kwambuka kuduuka wereme.

⁶ Yandeva, “Mwana wu Mundu ivi olola yaga?” Maku umundu oyo yanziranyia inyima ku luginga lwu mugera,

⁷ lwa ndaduuka yo ndaalora misaala minyingi ku vuli luginga lwu mugera.

⁸ Yambolera, “Mazi yaga giturukaa kuvitira Ivugwi nu mulivoona lia Jorodani kuduuka mu Inyanza yi Ijumbi. Lwa giturukaa mu Inyanza yi Ijumbi, gagwizaa mazi malengeru.

⁹ Hoosi hu mugera gwiturukaa, zinyama ziosi ni zisuzi lugano lwosi zilakaveho. Mugera gulakakole mazi gi Inyanza yi Ijumbi kuva malengeru, kandi lwa giturukaa gulakalete livamwoyo.

¹⁰ Kutura mu migera ja Engedi kuduuka mu migera ja Enegilaimu, avandu valuvaa zisuzi valakave yo ku inyanza, kandi navavagale yo zineti ziavo ziduuki kwuma. Zisuzi zing'ano ziosi zilakaveyo kuli ziveeye mu inyanza ya Meditareniani.

¹¹ Navuzwa mazi gu muvidende ahimbi ku inyanza si nagalengele mba. Nagatigale yo kuli ijumbi.

¹² Misaala zing'ano ziosi najiviruki ku vuli luginga lwu mugera kuhaana chukulia. Matu gajo sinaganiare mba, kandi si nagalekele kwama makuyu mba. Naame namakuyu malahi vuli mweli, kigira jisamangwa na mazi gaturaa mu Litembeli. Misaala jilakahaane viukulia kandi matu gajo galakatumiki kohonyia avandu.”

Zinzako zie Kivala

¹³ Mwami Munene Yahova yavoola, “Yizi ni zinzako zie kivala kidukanaa kugavulirwa zihiiri 12 zia Isiraeli. Ihiiri ya Josefu ilanyoola vidieli 2.

¹⁴ Ndisuhira avaguuga vinyu ndi, ndakavahe miandu ji kivala yiki. Kulwayago, kalunu mulagavulane mundu sa mulala anyoore kidieli keleng'ani.

¹⁵ “Lwako lwi kivala yiki lulava kuli ndi: Kolovega lwi Ivaale, ulwako lulavita kutura ku inyanza ya Meditareniani kuzia mu Lidaala lia Hezoroni, kuduuka ha vwingiliru vwa Hamazi kuzia kuduuka ku lidaala lia Zedadi.

¹⁶ Kutura Zedadi, lwako lulazizagilira kuduuka Beroza na Sibiraimu, lidaala liveeye hagati hu lwako lwa Damasiko nu lwako lwa Hamazi, kuduuka Hazori Hatikoni lidaala liveeye ku lwako lwa Haurani.

¹⁷ Kunangwa, ulwako yilu lulatula ku Inyanza ya Meditareniani kuzia Ivugwi kuduuka mu Lidaala lia Hazarenoni, ku lwako lwa Damasiko na Hamazi ko lovega lwi Ivaale.

¹⁸ “Ko lovega lwi Ivugwi, ulwako lulatula Hazarenoni, hagati hu lwako lwa Haurani na Damasiko, kolonda ku mugera gwa Jorodani hagati ha Gileadi ni kivala cha Isiraeli. Lwako yilu lulavitira kandi ko lovega lwi Ivugwi wi Inyanza yi Jumbi kuduuka Tamara.

¹⁹ “Lwako lwi Isavaalu lulatangila ha Tamara, na lulazia Imadioli wi Isavaalu kuduuka ku migera ahimbi Meribazikadeshi. Lulazizagilira kuvitira mu Egebeti kandi lulamalilikira mu inyanza ya Meditareniani.

²⁰ “Ko lovega lwi Imadioli, inyanza ya Meditareniani ilava lwako kuduuka ahimbi mu vwingiliru vwa Hamazi.

²¹ “Kunangwa mulagavuranyia kivala yiki munyi aveene kolondekana ku zihiiri zia Isiraeli.

²² Kilava mwandu gwinyu gwi mihiga ni mihiga. Avageni vamenyi mu munyi kandi avamala kwivulira avana hano, gavadukiraa vanyoore kedonye chavo chu mulimi lwa mugugavuranyia. Gaduukanaa muvakolere kuli avandu vi kivala cha Isiraeli kandi vakubi zikuura konyoora kedonye chu mulimi harara ni zihiiri zia Isiraeli.

²³ Vuli mugeni alanyoola kidieli chiche harara na vandu vi ihiiri yamenya mu. Inzi, Mwami Munene Yahova, mali kovora.”