Ezekieli 46 - KITABU KITAKATIFU

Mwimiihi na Masavo

¹ Mwami Munene Yahova avoora, “Kirivwa chi Ivugwi chu mugizi gwu mugati kuduuka kihanwe ing'inga ya madiku 6 gi liyinzira, navuzwa kuduuka kandi chigulwi ku lidiku lie lisabato kandi kulisavo liu mweli muhia.

² Mwamihi wamihaa nazie kutura mu mugizi gwi ichova kuduuka mu vwingiliru vwe keng'oze kuvitira mu kilivwa kandi nasingili ha misaala ji kirivwa lwa avasaalisi vasamba visiuviliru viavo kandi kuhaana isadaka yeeye yi mirembe. Ha kirivwa yaho kuduuka yasigamiri ma azie ichova kandi. Kirivwa kitahanwa mba kuduuka hamugorova.

³ Vuli Lisabato kandi vuli lisavo liu Mweli Muhia vandu vosi kuduuka viname hasi kandi vasigamiri imbiri wi kirivwa.

⁴ “Mwamihi alakahaane ku inzi ku lidiku lie lisabato vimeme via magondi 6 kandi ligondi limigu lilala ivitaveeye nimbala vive kuli isadaka yukusambwa.

⁵ Ku vuli ligondi limigu gamuduukira aleete isadaka yu vuswage zikiloguramu 17 ninusu. Vuli kememe chi ligondi anyala koleta ivinyingi kuli yinyaliza. Ku vuli isadaka yuvuswage gamuduukira aleete zilita 3 zia maguta ga muzeituni.

⁶ Ku lidiku lie Lisavo liu Mweli Muhia gamuduukira ahaane kemoli kigiriki kesoleli, vimeme via magondi 6 kandi ligondi limigu, viosi vugira imbara.

⁷ Ku vuli igiriki kandi ku vuli ligondi limigu isadaka yu vuswage ilava zikiloguramu 7 ninusu, kandi ku vuli kememe chiligondi isadaka yuvuswage ilava inyingi kuli yinyaliza. Ku vuli isadaka yu vuswage, maguta gamuzeituni zilita 3 galahaanwa.

⁸ Lwa mwamihi yingira, kuduuka avitiri mu keng'oze chu vwingiliru chi kirivwa chi Ivugwi kandi lwa azia ichova kuduuka alazira kunzira indala nzere.

⁹ “Lwa avandu vange vaza kusigamira Yahova kulisavo liosi, yavo avingiliraa mu kirivwa cha Ivaale valatura mu kirivwa chi Isavaalu, lwa vamali kusigamira. Yavo avingiliraa mu kirivwa cha Isavaalu valatura mu kirivwa cha Ivaale. Si aveeyeho umundu kali mulala unyala kuziira kunzira yayatulaa ku mba, navuzwa kuduuka aziiri kunzira yindi.

¹⁰ Mwamihi alingira lwa avandu vingira, kandi alatula lwa avandu vatura.

¹¹ Ku madiku gi lilia kandi aha masavo, isadaka yu vuswage ilava zikiloguramu 17 ninusu nigiriki anoho ligondi limigu nivimeme via magondi vinyingi kuli anyala. Maguta zilita zivaga kuduuka gahaanwe nisadaka yu vuswage kuli yiyi.

¹² “Lwu mwimiliri yamiha yenya kuhaana isadaka yuvwihaani ku inzi, isadaka yukasambwa anoho isadaka yi mirembe, kirivwa chi Ivugwi kizizaa mu mugizi gwu musi kiligulwa. Alahaana isadaka mu liiva lilala liere kuli akolaa ku lidiku lie Lisabato, kandi kirivwa kilahanwa lwa azia ichova kandi.”

Liehaana lia Vuli Lidiku

¹³ Yahova avoora, “Vuli mugamba ligondi liu muhiga mulala liveeye vugira imbara lilasambwa kuli isadaka ku Inzi. Isadaka yiyi ilahaanwa vuli lidiku.

¹⁴ Kandi isadaka yuvusie zikilo 2 kuduuka ihaanwe vuli mugamba, harara na maguta ilita indala yu kuzuganyira muvusie. Malago kigira kuhaana ku inzi galadinyilizwa kazozo.

¹⁵ Kememe chi ligondi, vusie kandi maguta vilahaanwa ku inzi kazozo kandi vuli mugamba.”

Mwami ni Kivala

¹⁶ Mwami munene Yahova yalaga: “Niiva mwami yamiha alahaana mulala ku milimi gigie ku muyaayi weve mulala kuli kihanwa, gulava kuli mwandu gwa avinyumba yeeye.

¹⁷ Navuzwa niiva mwami yamiha alahaana mulimi mulala ku milimi gigie ku mulala ku vatumikiri veve, nagwirane kuva mwandu gwu mwami lwumuhiga gwi Livoholorwa guliduuka. Goveeye gwigwe, oyo na vayaayi veve vanyara kogokola gwaavo mihiga ni mihiga.

¹⁸ Mwami wamihaa si alavugula miandu jaavandu mba. Mulimi gwosi gwa aha avayaayi veve kuduuka gove kutura mu mulimi gwa yahevwa, kunangwa avuli kudambiza mulala ku avandu vange nu kuvugura mulimi gwaavo.”

Havundu Hokodekela mu Litembeli

¹⁹ Maku umundu oyo yambira mu vwingiliru vwi ving'oze viheenza Ivaale ahimbi ni kilivwa kolovega lwi Isavaalu mu mugizi gwu musi. Yivi niving'oze vitakatifu via vasaalisi. Yaasona havundu kolovega lwi Imadioli wi ving'oze,

²⁰ navoora, “Yaaha niho havundu ha vasaalisi vadekera inyama yahaanwa kuli visiuviliru kigira vwoni anoho kuli isadaka ya mahiolo, kandi vadekera isadaka yi kihanwa chu vusie kunangwa si kilava ho kindu kitakatifu kigingwa kuduuka mu mugizi gwi ichova vakinyala kusaliliza avandu.”

²¹ Kwazia mu mugizi gwi ichova kandi nikogenda kuvitira mu zikona zine.

²² Muzikona zine ziu mugizi giali ho migizi mikekeeke, zimita 20 vutambi kandi zimita 15 vuvambalaru.

²³ Vuli mugizi gwakumberizwa ni lidigi lie ligina, na havundu hu muliru humbakwa ku lidigi.

²⁴ Umundu oyo yambolera, “Yaaha na havundu ho kodekera; uwavatumikiri vi Litembeli na vadekere ho visiuviliru via avandu vahaana.”