Ezekieli 45 - KITABU KITAKATIFU

Kidieli cha Yahova chi Kivala

¹ Lwamugavulanyia kivala cha Isiraeli, nukuhaana ku vuli ihiiri kidieli kilala kilaviikwa halovega kuva havundu hatakatifu ha Yahova. Kidieli yiki kilava zikilomita 12 ninusu uvutambi ku zikilomita 10 uvuvambalaru. Havundu yaaha hoosi halava Hatakatifu.

² Mu kidieli yiki, kilava mu ne kedonye chi Litembeli zimita 250 uvuvambalaru zimbega ziosi uvuvambalaru. Uvwiyangu vwi kidieli chu kukumberiza kedonye chi Litembeli yiki kilava zimita 25 uvuvambalaru.

³ Kandi ulagera zikilomita 12 ninusu uvutambi ku zikilomita 5. Havundu yaaha halava ni Litembeli, Havundu Hatakatifu ligali.

⁴ Kilava kidieli kitakatifu mu kivala, ichavikwa halovega kigira avasaalisi vatumikira Yahova mu Litembeli. Kilakave mu ni zinyumba zia vasaalisi kandi havundu hatakatifu hi Litembeli lilie.

⁵ Kidieli kindi zikilomita 12 ninusu uvutambi ku zikilomita 5 uvuvambalaru, kilaviikwa halovega kigira vinyumba ya Levi avakolaa miyinzi mu Litembeli. Kilakave kidieli cha madaala gaavo komenya mu.

⁶ Ahimbi ni kidieli kitakatifu mulagera kandi kidieli kindi zikilomita 12 ninusu uvutambi ku zikilomita 2 ninusu uvuvambalaru, kilaviikwa halovega kuva lidaala lia vandu va Isiraeli na vamenye hu.

Kivala chu Mwamihi

⁷ Umwamihi Munene kandi alanyoola kivala chiche. Kivala yiki kilava kutura ku lwako lwi madioli kolovega lwi kidieli kitakatifu, kilazia imadioli kuduuka ku Nyanza ya Meditareniani; na kutura ku lwako lwi Ivugwi kuduuka ku lwako lwi kivala chi Ivugwi. Uvutambi, vulaleng'ana ni kidieli kilala ku vidieli vie zihiiri zia Isiraeli ziahevwa.

⁸ Kidieli yiki kilava chu mwamihi munene mu kivala cha Isiraeli, kunangwa navuli kudambiza vandu, navuzwa naleke kivala kindi choosi nakitigale ku zihiiri zia Isiraeli.

Amalago ku vamiihi va Isiraeli

⁹ Yahova Wuvunyali yavoola, “Munyi avamihi va Isiraeli, mwakora uvwoni ku ing'inga indambi! Mulekere kolola kilage kandi lidambiza. Mukore agaveeye amalungi kandi likalaga lirungi. Mutakungi avandu vange vatuli mu kivala chavo kandi mba. Inzi Mwami Munene Yahova muvooleraa yaga.

¹⁰ “Vuli mundu gamuduukira atumikiri ligera lia giligali:

¹¹ “Efa na bazi vilava vie ligera lilala. Ihama indala ilava zibazi 10 ihama ilava kegero.

¹² “Ligera lienyu lilava kuli ndi, zigera 20 lilava Shekeli 1, zichekeli 60 zilava mina 1

¹³ “Lihaana lienyu lilava kuli ndi: Ingano ilava 1/6 yi ligesa lienyu Amavere galava 1/6 gi ligesa lienyu

¹⁴ Amaguta galava 1/100 gi ligesa lienyu

¹⁵ “Ligondi lilala lilahaanwa kutura ku vuli chayo cha magondi 200, munyumba ya Isiraeli. “Mulaleeta vihaanwa viu vuswage, vihaanwa viu kusambwa, kandi vihaanwa vie mirembe kunangwa muduuki kusamifwa uvwoni vwinyu. Inzi Mwami Munene Yahova mali kulaga yaga.

¹⁶ “Avandu vosi vi kivala cha Isiraeli valahaana vihaanwa yivi ku mwamihi munene wa Isiraeli.

¹⁷ Gulava muyinzi gwu mwamihi kuhaana vihaanwa viu kusambwa, vihaanwa viu vuswage kandi vihaanwa vie iwaini ku ihiiri yoosi ya Isiraeli ku ing'inga ya masavo gu Mweli Muhia, Lisabato kandi masavo gandi. Kandi alahaana vihaanwa viu vwoni, vihaanwa viu vuswage, vihaanwa viu kusambwa, kandi vihaanwa vie mirembe kunangwa vandu va Isiraeli vaduuki kusamifwa uvwoni vwavo.”

Amasavo

¹⁸ Yahova Wuvunyali yavoola, “Ku lidiku liu kutanga mu mweli gwu kutanga mulahaana kemoli kigiriki kitaveeye ni mbala na mutakase Litembeli.

¹⁹ Musaalisi alavugula ku masahi gi kihanwa chu vwoni na avake ku maliva gi kiliango chi Litembeli, mu zikona zine ziu vwali kandi ku vigutu vie kirivwa chu mugizi gwu mugati.

²⁰ Ku lidiku lia saba liu mweli; mulakola ndio kandi havogono ha vuli mundu woosi uwaakola uvwoni mu livula kumanya anoho mu lizukanila. Mulikola ndio, mulakola Litembeli liange kuva litakatifu.

²¹ “Ku lidiku lia 14 liu mweli gwu kutanga, mulataga lilia lie Lipasaka. Ku madiku 7 vuli mundu alalia mugadi gutaveeye mu na mamera.

²² Kulidiku liu kutanga lie Lisavo mwamihi munene gamuduukira ahaane kemoli kigiriki keve kuli kisiuviriru kigira vwoni vwivwe umwene kandi kigira uvwoni vwavandu vi kivala cha Isiraeli.

²³ Vuli lidiku ku madiku 7 gi Lisavo mwamihi munene uyu gamudukira ahaane ku inzi Yahova vimoli vigiriki 7 kandi magondi 7 agataveeye ni mbala vive kuli kihanwa chu kusambwa, kandi ahaane imburi ekole vuli lidiku eve kuli kihanwa chu kusamifwa uvwoni.

²⁴ Ku vuli igiriki kandi ligondi liahana kuli kisiuviriru, gamudukira kandi ahaane zikiloguramu 17 ninusu ziu vuswage kandi zilita 3 zia maguta.

²⁵ “Ku lidiku lia 15 liu mweli gwa 7 gwi Lisavo, Mwamihi uyu alahaana vihaanwa vilala viere viu kusamiiha uvwoni, vihaanwa viu kusambwa, vihaanwa viu vuswage kandi vihaanwa via maguta ku vuli lidiku ku madiku 7.”