Ezekieli 44 - KITABU KITAKATIFU

Litumikira Kirivwa chi Ivugwi

¹ Maku mundu uyu yambugura niyambira mu kirivwa chi chova, ichaali kolovega lwi ivugwi wi Litembeli. Kirivwa yiki chaali nikihaniywi.

² Yahova yambolera, “Kirivwa yiki kilahanwa. Mundu si alavugilirwa kuvitira mucho mba, kigira Inzi Yahova Nyasaye wa Isiraeli, mali kuvitira mucho. Kulwayago, kilahanwa.

³ Umwami yeng'ine anyala kuzia kwikala mukirivwa yiki nukulia chukulia imbiri wange. Alingira kuvitira mu keng'oze chu vwingiliru, kandi alatula ichova kuvitira munzira ndala inzere.”

Amalago gu kwingira mu Litembeli

⁴ Maku mundu uyu yambira imbiri wi Litembeli kuvitira mu kirivwa chi Ivaale. Lwandahenza, ndaalora uvukumi vwa Yahova nivwizuyi mu Litembeli lia Yahova, na ndaagwa hasi Mamumama;

⁵ na Yahova yambolera, “Mwana wu Mundu, ohenze vulahi ku viosi viaziza kokora kandi via ngovolera kigira amalago goosi agi Litembeli lia Yahova. Umanyirizi vulahi yavo vosi avavugilirwa kwingira mu Litembeli kandi yavo avatavugilirwa kwingira mulio.

⁶ “ Ovoolere avandu va Isiraeli avibaara ku Inzi ndi, Inzi Yahova Wuvunyali sindikuzira ku vindu viu kuvihiliriza viavakola mba.

⁷ Vamali kwonogonyia Litembeli liange, nokoleka avageni vataveeye avasuuvirifu, avandu vavura kutia kwingira mulio lwahaana vindu vinolu kandi amasahi gi visiuviliru ku inzi. Kunangwa avandu vange vamali kuvunaga lilagana liange mulikola vindu viosi viu kuvihiliriza.

⁸ Sivalinda vindu viange vitakatifu mu Litembeli liange mba, navuzwa muvogono yivwo, vaavugura vandu vageni nivavaviika mu vunyali vwu kulinda vindu viange vitakatifu mu Litembeli.

⁹ “Kulwayago, Inzi Yahova Wuvunyali mboraa ndi, sialavaho mundu kali mulala utaveeye musuuvirifu omenyi hagati ha vandu va Isiraeli, anoho avulaho mundu kali mulala utatiza inzi, ulingila mu Litembeli liange mba.”

Avandu vi Ihiiri ya Levi Vatuliziywi mu Vusaalisi

¹⁰ Yahova yambolera, “Ndahaana mageri ku vandu va Levi yavo harara na vandu va Isiraeli vosi, avaandeka ni vazia kusigamira vifananyi.

¹¹ Vanyara kundumikira mu Litembeli liange, nu kulinda mu virivwa vie Litembeli kandi nokokola miyinzi ji Litembeli. Vanyara kwita zinyama zia vandu vahaana kuva kuli vihaanwa viu kusambwa kandi visiuviliru. Kandi valava ku miyinzi nu kutumikira vandu.

¹² Navuzwa kigira vatumikira vandu va Isiraeli lwa vasigamira vifananyi, nukuvimilira mu likora uvwoni, Inzi Yahova Wuvunyali nzisuha ndi, kuduuka vanyoore amageri.

¹³ Sivalisunda ahimbi ninzi nukundumikira kuli avasaalisi mba, anoho sivalisunda ahimbi ni kindu kiveeye kitakatifu mba, kandi sivalingira Havundu Hatakatifu mba. Yaga ni mageri kigira ivindu viu kuvihiliriza via vamali kokora.

¹⁴ Nitali ndavakora kuva nuvunyari nukutumika ku minyinzi jindi josi ju mu Litembeli.”

Avasaalisi

¹⁵ Yahova Wuvunyali yavoola, “Avasaalisi vaveeye vi hiiri ya Levi kandi avaveeye visukululwi via Zadoku, vazizagilira kundumikira nu vusuuvirifu mu Litembeli lwa vandu vosi va Isiraeli vaagirung'ana kutura ku Inzi. Kulwayago, yava nivo avisunda ahimbi ninzi nu kundumikira kuhaana zitinya kandi masahi gi zinyama zie visiuviliru ku Inzi.

¹⁶ Yava nivo avingiraa mu Litembeli liange nukutumika ku vwali vwange, kandi valasigamira mu Litembeli.

¹⁷ Lwa viingira mu kirivwa chu mugizi gwu mugati mwi Litembeli, valivika zinguvu ziu luvaala. Sivaliviika zinguvu ziu vwoya lwa vaveeye mu litumika mu mugizi gwu mugati anoho mu Litembeli mba.

¹⁸ Valivika viremba ku mitwi jaavo kandi inguvu yu luvaala mu vikenge viavo. Si valivika kindu choosi kinyala kuvakola kutura ologeri mba.

¹⁹ Nivakikiri kutura ichova mu mugizi gwi chova, wa vandu vaveeye, kuduuka vatulizi zinguvu ziavo ziu vutumiki mu Litembeli nu kuziviika mu ving'oze vitakatifu. Valivika zinguvu zindi kunangwa zinguvu ziavo zindakatifu zivuli kusaliriza vandu.

²⁰ “Avasaalisi sigavaduukira vavege masu gaavo mba, anoho vataleka gatambihi mba, navuzwa gavadukiraa vavege limbihi.

²¹ Musaalisi kali mulala sialanwa iwaini imbiri wakikiri kwingira mu mugizi gwu mugati mba.

²² Musaalisi sialaselera mukali mukunzakali anoho mukali wakungwa mba; navuzwa anyala koselera mukaana mugima kutura mu lwivulu lwa vandu va Isiraeli, anoho mukali mukunzakali wu musaza weve musaalisi yakuza.

²³ “Avasaalisi yava valigiza vandu vange vaduuki kumanyiriza agaveeye matakatifu kandi hataveeye hatakatifu, kandi vaduuki kwavukanyia hagati hu vulahi kandi uvudamanu.

²⁴ Lwa vandu vava mu lihangalizana kandi lihing'ana, avasaalisi valahaana likalaga lirungi hagati haavo kolondekana na malago gange. Valagumira malago gange kandi miima jange mu masavo gange goosi, kandi kokora lidiku lie Lisabato liange kuva Litakatifu.

²⁵ “Musaalisi gamudukira avuli kudiira ku muviri mukuzu, gase aleyonogonyia. Navuzwa anyala kudiira ku muviri gwa baba weve anoho mamna weve, anoho mwana weve, anoho amwavo weve anoho mbozo weve ukikiri koselerwa.

²⁶ Inyima wu musaalisi amali kweyonogonyia, gamuduukira alindi ku madiku saba,

²⁷ kunangwa yingiri mu mugizi gwu mugati gwi Litembeli nu kuhaana visiuviliru ku lietakasa liu vwoni vwivwe. Niyakakola ndio, anyala kutumika mu Litembeli kandi. Inzi Yahova mali kovora.

²⁸ “Avasaalisi sivalanyora miandu mba, Inzi ndava miandu jaavo. Utavaha uvutugi mu kivala cha Isiraeli mba, Inzi ndava uvutugi vwavo.

²⁹ Valalia kihanwa chu vuswage, kihanwa chu vwoni, kandi kihanwa cha mahiolo. Valanyoola vuli kindu choosi ichatakaswa nukuviikwa halovega mu Isiraeli kigira Inzi.

³⁰ Avasaalisi valanyora kidieli choosi kilahi chukutanga kogeswa. Valanyora kandi vihaanwa viosi vilahi via vandu va Isiraeli vahane ku Inzi. Vuli ing'inga lwa vandu valomba umugadi, kuduuka vahane ku vasaalisi mugadi gwukutanga kuli isadaka kunangwa nduuki kugasiza lwivulu lwavo.

³¹ Avasaalisi sivalalia linyonyi liosi anoho inyama yoosi ikuzi yene anoho inyama imali kwitwa ni inyama yindi yu muvulimu mba.”