Ezekieli 43 - KITABU KITAKATIFU

Uvukumi vwa Yahova Vwirana mu Litembeli

¹ Maku mundu oyu yambugura ma niyambila ha kirivwa kolovega lwi Ivugwi.

² Hene yaho, ndaalora uvukumi vwa Yahova wa Isiraeli nivuza kutura Ivugwi. Mwoyo gwa Nyasaye gwahulirika kuli lihuuma lia mazi manene, nu vukumi vwivwe vwang'ereng'ana ku lirova.

³ Amalola yaga gaali kuli amalola gandalola lwa Nyasaye yaza kudiviza lidaala lia Jerusalemi, kandi kuli amalola gandalola ahimbi nu mugera gwa Kebari. Maku ndaagwa hasi mamumama.

⁴ Uvukumi vwa Yahova vwazia mu Litembeli kuvitira mu kirivwa chi Ivugwi.

⁵ Maku Roho wa Yahova yaali ku Inzi, kandi yambira mu mugizi gwu mugati, na ndaalora uvukumi vwa Yahova nivwizuyi mu Litembeli.

⁶ Mundu uyu yasingira ahimbi ha ndaali, na ndaahulira mundu namoloma na inzi mu Litembeli,

⁷ yambolera, “Mwana wu Mundu, hano ni havundu he ndeve yange yu Vwami. Ndamenya havundu yaaha nu kwamiiha vandu vange Isiraeli mihiga ni mihiga. Avandu va Isiraeli, anoho avami vaavo si valonogonyia lieta liange litakatifu nu kusigamira avanyasaye anoho kuyavira miviri mikuzu ja vami vaavo havundu hano mba.

⁸ Avandu va Isiraeli harara na vami vaavo valomba oloze lwavo kandi vigutu viavo vie miliango ahimbi no loze lwange kandi vigutu vie miliango ji Litembeli liange, kunangwa hatigale vuzwa ni lidigi hagati hange navo. Vonogonyia lieta liange Litakatifu ni vindu viu kuvihiliriza via vaakora. Ku lwayago, ndavadiviza mu vutima vwange uvululu.

⁹ Kalunu valeke kusigamira avanyasaye vandi kandi vahiri miviri mikuzu ja vami vaavo ihale kutura ku inzi. Niiva valakola ndio, inzi ndamenya hagati haavo mihiga ni mihiga.”

¹⁰ Yahova yaazizagilira kovora, “Mwana wu Mundu, ovoolere avandu va Isiraeli kigira Litembeli harara ni lilohiza lialio. Uvakole vave ni zisoni kigira vikolwa viavo vidamanu.

¹¹ Niiva valava mu zisoni kigira vindu vidamanu via vamali kokora, maku, uvivaaliri lilohiza lie Litembeli. Uvamanyie lifana lialio, vwingiliru kandi litula ichova lialio, lilohiza lie vindu viosi, miima kandi amalago galio goosi. Uvang'odele vindu yivi viosi kunangwa vaduuki kolola kuli vindu viosi vialohizwa kandi vaduuki kolonda malago goosi gi Litembeli.

¹² Yili ni lilago lie Litembeli: Havundu hi Litembeli yili, kosonga yi kiguru, halava Hatakatifu.”

Uvwali

¹³ Yili ni ligera liu vwali, kuli ligera lie Litembeli. Uvugalamu vwu vwali ku zimbega ziosi vwali zisendimita 50 kuzia musi kandi zisendimita 50 uvuvambalaru. Uvwikudumbu vwi chova kundulu vwali zisendimita 25 kuzia igulu.

¹⁴ Kutura ku vugalamu vwa hasi kundulu vwali imiita indala, nu vuvambalaru vwali inusu yi mita. Kutura ku kika kilala kekekeeke kuduuka ku kika kenene ziali zisendimita 50, uvuvambalaru kandi zimita 2 kuzia igulu.

¹⁵ Kika cha higulu chu vwali, havundu haali hu kuhaanira visiuviliru haali zimita ziviri. Liumbakwa liezikona zie kika cha higulu yiki zieginga igulu kuvita vika vindi.

¹⁶ Kika cha higulu chu vwali chaali zimita sita ku vuli zimbega ziosi.

¹⁷ Kika cha hagati kandi chaali zimita 7 ku vuli zimbega ziosi, kandi uvwikudumbu vwi chova kundulu vwali zisendimita 25 kuzia igulu. Uvugalamu vwu vwali vwali zisendimita 50 uvuvambalaru. Vika viazizaa igulu ku vwali viali kolovega lwi Ivugwi

Litakasa liu Vwali

¹⁸ Yahova Wuvunyali yambolera, “Mwana wu Mundu, huliriza ku agangovoolera. Lwu uvwali vuva ni vwakumbakwa, uvutakase mulisamba visiuviliru kuvwo kandi nukwuha amasahi gi zinyama ziahaanwa kuva kisiuviriru.

¹⁹ Avasaalisi vi ihiiri ya Levi, avaari visukululwi via Zadoku, yavo nivo veng'ine ava Inzi mbugilira vaze imbiri wange nukundumikira. Inzi Yahova Wuvunyali mali kulaga yaga. Ulavaha igiriki vahane kuli kisiuviriru chu vwoni.

²⁰ Uvuguli masahi gayo na uviiki ku zitiru zine ziu muzikona ziu vwali, kandi mu zikona ziukundulu kwu vwali, kandi ku vwikudumbu vwavwo. Mu likora ndio, ulanihiza uvwali nukuvutakasa.

²¹ Uvuguli igiriki ihaaniywi kuva kuli kisiuviriru chu vwoni, ma ugisambiri havundu hatovoleywi ichova wi Litembeli.

²² Ku lidiku lilondaku, uvuguli imburi ekole itaveeye nimbala ma ugihaane kuva kuli kisiuviriru chu vwoni. Utakase uvwali na masahi gayo kuli watakasa na masahi gi igiriki.

²³ Nuwakamala kutakasa uvwali, uvuguli igiriki kandi ligondi limigu litaveeye ni mbala,

²⁴ ma uvileete ku Inzi. Avasaalisi valuhaku ijumbi ma vavisambe vive kuli kihanwa chu kusambwa ku inzi.

²⁵ Vuli lidiku ku madiku saba ulahaana imburi, igiriki kandi ligondi limigu kuva kuli visiuviliru viu vwoni. Viosi vive vugira imbara.

²⁶ Ku madiku saba avasaalisi valatakasa uvwali, nukuvokola kuva uvwetegeku kutumikirwa.

²⁷ Lwa madiku yaga gamalilika, maku kutura ku lidiku lia munane, avasaalisi valahaana ku vwali vihaanwa viu kusambwa kandi vihaanwa vie mirembe. Maku inzi ndavavugilira. Inzi Yahova Wuvunyali mali kovora.”