Ezekieli 42 - KITABU KITAKATIFU

Zinyumba Ziviri Ahimbi ku Litembeli

¹ Maku umundu uyu yambira ichova wu mugizi kandi niyambilala munyumba kolovega lwi Ivaale wi Litembeli, ahimbi ku inyumba kolovega lwu kumalirika Imadioli wi Litembeli.

² Uvutambi vwi nyumba yiyi vwali zimita 50 kandi vuvambalaru vwayo vwali zimita sirini na tano.

³ Kolovega lulala yahenza muvwiyangu izimita 10 uvuvambalaru uvwali himbi ku Litembeli, kandi kolovega lundi yahenza munzira yu mu mugizi gwi ichova. Yumbakwa kovoreng'anu vuvaga, vuli indala yaasingirizwa inyima kuvita yaali isi wayo.

⁴ Kolovega lwa Ivaale winyumba yiyi inzira yaali yo zimita 5 uvuvambalaru kandi zimita 50 uvutambi, nuvwingiliru kolovega lwene yilwo.

⁵ Ving'oze vie igulu wi nyumba viali ving'erere kuvita via hagati kandi no ovong'erere vwi isi kigira viasingilizwa inyima ligali.

⁶ Voreng'anu vuviri vwigulu vwa sedema ku ving'oze vio voreng'anu vwa hasi kandi ndio ving'oze yivi siviali nizitiiru kuli zinyumba zindi mu mugizi mba.

⁷ Lialiho lidigi lie ichova liavuli kwagana ni ving'oze kandi nu mugizi gwi ichova. Liesunda imbiri wi ving'oze zimita 25 viali nuvwingiliru kolovega lwi Ivugwi lwa umundu yingira mu kutura mumigizi gwi ichova. Liesunda imbiri wi ving'oze zimita 25.

⁸ Ving'oze viu mugizi gwi ichova viali zimita 25 vutambi, na iviali ahimbi ku Litembeli viali zimita 25 vutambi.

⁹ Ving'oze via hasi viali nu vwingiliru kolovega lwi Ivugwi lwumundu yingiliraa mu kutura mu mugizi gwi ichova.

¹⁰ Kolovega lwi Isavaalu wi Litembeli inyumba yaali ho ahimbi yafanana ni inyumba yaali kulimalilika wi Imadioli wi Litembeli.

¹¹ Imbiri wi ving'oze yivi, inzira yaali ho vuzwa kuli eveeye kolovega lwa Ivaale. Yaali niligera lilala liere, liumbaka liafanana, kandi uvwingiliru vwafanana.

¹² Muliango gwaali ho isi wi ving'oze kolovega lwa Isavaalu wi inyumba, kulimalilika Ivugwi uwi lidigi litangira.

¹³ Umundu uyu yambolera, “Zinyumba yizi ziosi ziveeye zindakatifu. Muzio, avasaalisi vazizaa imbiri wa Yahova valiza vihaanwa vitakatifu ligali. Kigira ving'oze viveeye vitakatifu, avasaalisi valaviika yo vihaanwa vitakatifu ligali: Kihanwa chu vuswage, kihanwa chivisiuviliru kigira uvwoni, kandi kihanwa cha mahiolo kigira havundu yaho nahatakatifu.

¹⁴ Lwa avasaalisi vamali kuva mu Litembeli, kandi venya kuzia mu mugizi gwi ichova, kuduuka valeke mu ving'oze yivi zinguvu zindakatifu ziavivikaa lwavatumikiraa Yahova. Kuduuka viviki zinguvu zindi nivakikiri kuzia ichova havundu havandu vivungizaa.”

Ligera lia havundu hi Litembeli

¹⁵ Lwu umundu uyu yaali niyakamara kogera mugati havundu hi Litembeli, yambugura kuzia ichova kuvitira mu kirivwa chi Ivugwi kandi nagera ichova wa havundu yaho.

¹⁶ Yavugula kidundu chokogera kandi nagera lovega lwi Ivugwi, na ziali zimita 250.

¹⁷ Maku yagirung'ana kandi nagera lovega lwa Ivaale nikidundu cho kogera na lwali zimita 250.

¹⁸ Maku yagirung'ana kandi nagera lovega lwi Isavaalu ni kidundu cho kogera na lwali zimita 250.

¹⁹ Maku yagirung'ana nahenza kolovega lwi Imadioli kandi nagera nikidundu cho kogera na lwali zimita 250.

²⁰ Kunangwa lidigi liali zimita 250 vuli lovega. Lidigi liatumika kwavukanyia vindu iviveeye vitakatifu ni vindu ivitaveeye vitakatifu.