Ezekieli 41 - KITABU KITAKATIFU

¹ Maku umundu uyu yambira mu keng'oze cha hagati chi Litembeli Havundu Hatakatifu. Yaagera inzira izizaa mu: Yaali zimita 3 vuvambalaru,

² kandi zimita 5 vutambi, na madigi zimita 2 ninusu uvuliduhu zimbega ziosi. Yaagera keng'oze na chaali zimita 20 uvutambi kandi zimita 10 uvuvambalaru.

³ Maku yazia mu keng'oze chu mugati ligali. Yaagera inzira izizaa mu: yaali imiita indala vuvambalaru kandi zimita 3 vutambi, na madigi ku vuli lovega uvuliduhu vwi 3 ninusu.

⁴ Yaagera keng'oze chene, na chaali zimita 10 vuli lovega. Keng'oze yiki chaali kolovega lundi lwe keng'oze cha hagati. Maku yambolera, “Yaaha na Havundu Hatakatifu ligali.”

Ving'oze Viumbakwa himbi Namadigi gi Litembeli

⁵ Mundu uyu yaagera uvuliduhu vwilidigi liu mugati mwi litembeli kandi liali zimita 3. Ku lidigi yili, liakumberiza litembeli zimbega ziosi, vialiku ving'oze vinyingi vikuzuzu zimita 2 vuvambalaru.

⁶ Ving'oze yivi viali muzigorofwa zivaga, ni ving'oze 30 ku vuli egorofwa. Lidigi lie chova we litembeli ku vuli egorofwa liali ling'erere kuvita egorofwa ya hasi, kunangwa ving'oze viasedema ku lidigi vugira kokonyelerwa.

⁷ Kunangwa nohenza ku madigi gi Litembeli kutura ichova galoleka kuva nuvuliduhu vulala vwere kuduuka igulu. Ku ichova wi lidigi lie Litembeli, ichova wi ving'oze, zinzira zimambalaru ziviri ziumbakwa, kunangwa vove vwangu kutura kogorofwa ya hasi kuzia ku yahagati, kandi kuduuka kogorofwa yi igulu.

⁸ Ndalora ndi Litembeli liali nu muse mudiguluku kuzimbega ziosi, ugwalomba vutangiliru vwi ving'oze vwu muzimbega. Vwali kuli vutambi zimita ziviri ninusu.

⁹ Ichova wamadigi giving'oze viegorofa ziali zifuti munane uvuliduhu. Kindu sichaaliho hagati hamadigi yaga mba

¹⁰ kandi nizinyumba ziali ahimbi zimita likomi na zine.

¹¹ Vwingiliru vwaliho vwu kwingira mu ving'oze viu kundulu kutura mu vwiyangu yivu. Vwingiliru yivu vwali kolovega lwi Ivaale, mu vundi kolovega lwi Isavaalu. Vutangiliru vwahambanyaa havundu hu vwiyangu, vwali vuvambalaru zimita 2 ninusu zimbega ziosi.

Inyumba Kolovega lwi Imadioli

¹² Inyumba yaali kolovega lwu mulimi gwi litembeli kolovega lwi Imadioli yaali zimita 45 uvutambi kandi izimita 35 uvuvambalaru. Zimbega ziosi ziuvuliduhu vwa madigi galio vwali zimita 2 ninusu.

Ligera Liosi Liuvwumbaki Vwilitembeli

¹³ Maku yaagera Litembeli kandi liali zimita 50 uvutambi. Mu mugizi gwi litembeli kandi zinyumba harara na madigi galio gaali kandi zimita 50.

¹⁴ Vuvambalaru vwu mugizi gwi litembeli kolovega lwi Ivugwi, harara nimbiri wi litembeli vwali zimita 50.

¹⁵ Maku yaagera uvutambi vwinyumba yahenza mu mugizi kolovega lwi Imadioli kandi harara na madigi galio na vwali izimita 50 kandi. Keng'oze chu kwingilira mu Litembeli, Havundu Hatakatifu, kandi Havundu Hatakatifu ligali

Livaala Linyingi Liuvwumbaki Vwi Litembeli

¹⁶ chigalirwa ni misaala kutura hasi kuduuka ku madirisha. Madirisha yaga gaali ganyala kufuumwa.

¹⁷ Musi mwa madigi gi litembeli kuduuka igulu ku miliango gafuumwa ligali

¹⁸ ni misaala ja makindu kandi nivilombe viezimbaha iviavazwa. Misaala jumunazi jisundilanaa na vakerubi, kilala chalondaa kindi mu likumbiriza ekeng'oze. Vuli mukerubi yaali nilifana haali kaviri:

¹⁹ mumoni mwu mundu mwagirung'anywa kohenza lovega lulala lwi likindu, kandi mumoni mwi simba mwagirung'anywa kohenza lovega lundi lwi likindu. Lidigi liosi liali kuli ndi,

²⁰ kutura hasi kuduuka igulu ku miliango.

²¹ Ku miliango ja Havundu Hatakatifu jaleng'ana zimbega ziosi. Imbiri wa havundu hatakatifu, chaali ho ni kindu chafana kuli

Vwali Vwi Zimbaho

²² uvwali vwi zimbaho. Uvutambi vwacho vwali imiita 1 ninusu kandi vuvambalaru 1 ninusu. Zimbaho ziu muzikona javwo, nuvutambi kandi numuzimbega ziosi vwalombwa ni zimbaho. Mundu uyu yambolera, “Yiyi niyio emesa eveeye imbiri wa Yahova.”

Miliango mu Litembeli

²³ Uvwingiliru vwu kuzia mu keng'oze kenene chi Litembeli kandi vwingiliru vwu kuzia havundu Hatakatifu vwali nimiliango 2.

²⁴ Jaali miliango 2 hagati ijaali ni jarama.

²⁵ Misaala jiminazi na vakerubi vaali ni vavazwa kumiliango jahavundu Hatakatifu, kuli avaari ku madigi. Kandi haali ho ni kikuniku chu lubaho chakinga kolovega lwi inzira yumuliango muvwingiliru vwikeng'oze.

²⁶ Madigi gu mukeng'oze yiki gaali na madirisha makuzuzu, kandi gwang'olwa ku musaala gwu munazi gwaali nigwavazwa.