Ezekieli 40 - KITABU KITAKATIFU

Amalola gi Litembeli lia Madiku gaaza 40:1—48:35 Nyasaye Yaahira Zacheli mu Jerusalemi

¹ Ku lidiku lie 10 liu muhiga muhia ugwali muhiga gwa 25 kutura nikuhilwa mu lihaminywa, kandi muhiga gwi 14 inyima wi lidaala lia Jerusalemi liali niliakagumilwa. Kulidiku yilio ndaahulira zinguru zia Yahova niziveeye ku inzi, kandi niyang'inga nambira ihale.

² Mu malola, Nyasaye yambira mu kivala cha Isiraeli ma niyaambika ku kiguru kitambi. Ndaalora zinyumba imbiri wange zialoleka kuli Lidaala linene.

³ Yambira kuduuka ahimbi ku zinyumba yizio, na ndaalora mundu musaza uwaloleka kuli umugasa. Yaali numugoye gwi katani mu makono geege, kandi kidundu chokogera, yaali nasingiyi mu kirivwa.

⁴ Mundu oyo yambolera, “Mwana wu Mundu ohenze vulahi. Huliriza vulahi ligali, kandi uviiki zing'anagani zizio ku vuli kindu choosi changumanyia, kigira yiki nicho kivuni chagira nengoleta hano; kunangwa kuduuki kovolere avandu va Isiraeli goosi aga ololaa.”

Kirivwa chi Ivugwi

⁵ Ivugwi wi kirivwa, ndaalora lidigi ni likumberizi litembeli. Mundu oyo yavugula kidundu chokogelera chaali mu makono geege, ichaali zimita 3 uvutambi ma nagera lidigi. Liali zimita 3 kuzia igulu kandi vuvambalaru vwalio vwali zimita zivaga.

⁶ Maku yazia mu kirivwa cholovega lwi Ivugwi, kuduuka ku vika via cho, nagera vwingiliru vwi kirivwa na vwali zimita 3 uvugalamu.

⁷ Imbiri wacho vwaliyo uvwingiliru uvwali ni ving'oze vivaga viu musikari kuzimbega ziosi. Vuli keng'oze chaali zimita 3 vugalamu, na madigi hagati hi ving'oze yivi gaali zimita 2 ninusu uvuliduhu. Olovega lundi lwi ving'oze viu musikari yaliho ninzira zimita 3 uvugalamu iyazizaa mu vwingiliru vwe keng'oze chahenzana ni Litembeli.

⁸ Maku yaagera ulusimbu lwi keng'oze yiki na chaali zimita zine.

⁹ Kandi yaagera vigutu vie kirivwa, na viali imiita indala. Lusimbu lwi kirivwa lwa henzana ni Litembeli.

¹⁰ Vialiho niving'oze via vasikari 3 ku vuli lovega lwi kirivwa chi Ivugwi, na viosi viali ni ligera lilala, kandi vigutu ku zimbega ziosi viali ni ligera lilala.

¹¹ Maku yaagera inzira yu mu kirivwa, na yaali zimita 6 ninusu uvuvambalaru. Kandi yaagera kirivwa na chaali zimita 5 uvuvambalaru.

¹² Imbiri wa vuli keng'oze chu musikari, chaliho ni lidigi zisendimita 50 kuzia igulu, kandi zisendimita makomi gatano uvuliduhu. Ving'oze yivi viali zimita 3 zimbega ziosi.

¹³ Maku yaagera kirivwa kutura inyima wi lidigi kuduuka ku lovega lundi, kandi kutura ku vwingiliru kuduuka ku vwingiliru vundi, na chaali zimita 12 ninusu uvuvambalaru.

¹⁴ Vaagera ulusimbu, na lwali zimita 10, na umugizi gwaduuka ku vigutu kukumberiza kirivwa.

¹⁵ Kutura mu vwingiliru vwi kirivwa kuduuka kundulu kwu mugati mwu mulusimbu lwi kirivwa, ziali zimita 25.

¹⁶ Amadigi gi chova gi ving'oze viosi gaali na madirisha makuzuzu, kandi madigi gu mugati. Amadigi gu mugati agaali kolovega lwi kirivwa, vaali ni vaviiki ku misaala ja makindu ijavazwa.

Umugizi gwi Chova

¹⁷ Maku mundu uyu yambira mu mugizi gwi chova. Mugizi yigu gwaali ni ving'oze 30. Ving'oze yivi viali ni inzira iyalomberwa magina imbiri wayo.

¹⁸ Zinzira yizi ziazia kuduuka mu mugizi gwi chova. Mugizi gwi chova yigu gwaali ni kika cha hasi kuvita mugizi gwu mugati.

¹⁹ Maku mundu uyu yaagera inzira kutura mu kirivwa chu mugizi gwu mugati kuduuka mu kirivwa chu mugizi gwi chova, yaali zimita 50 uvutambi. Maku yazia Ivaale Imbiri wange.

Kirivwa chi Ivaale

²⁰ Maku mundu uyu yaagera inzira yi kirivwa cha Ivaale iyazizaa mu mugizi gwi chova.

²¹ Yaagera ving'oze 3 viu musikari iviali ku zimbega ziosi zie kirivwa, amadigi gaali mugati, kandi ving'oze viu vwingiliru, na viosi viali nu ligera lilala liere kuli iviali mu kirivwa chi Ivugwi. Ligera liosi liu vutambi vwi kirivwa liali zimita makomi gaviri na zitano, nu vuvambalaru vwa cho vwali zimita likomi na ziviri ninusu.

²² Keng'oze chaali muvwingiliru, madirisha, kandi misaala ja makindu ijavazwa viali kuli iviali mu kirivwa chi Ivugwi. Hene yaaha vialiho vika saba iviazizaa mu kirivwa, kandi keng'oze chu muvwingiliru chaali chu kumaliriza kolovega lwu mugizi.

²³ Kolovega lundi lwu mugizi gwa Ivaale, yaliho ni inzira yindi yi kirivwa iyaziza mu mugizi gwu mugati, kuli iyaali kulovega lwi Ivugwi. Mundu uyu yaagera uvuvambalaru vwi zinzira jizi, na ziali zimita makomi gatano.

Kirivwa chi Isavaalu

²⁴ Maku mundu uyu yambugura ma niyambila kolovega lwi Isavaalu, uwene yeyo, chaaliyo kirivwa kindi. Yaagera madigi gacho gu mugati kandi ving'oze viacho viu muvwingiliru, na viali ni ligera lilala liere kuli vie virivwa vindi.

²⁵ Kirivwa yiki chaali na madirisha mu ving'oze viacho kuli virivwa vie ving'oze vindi. Uvutambi vwosi vwi kirivwa yiki vwali zimita makomi gaviri na zitano, kandi uvuvambalaru vwacho vwali zimita likomi na ziviri ninusu.

²⁶ Kirivwa yiki chaali ni vika saba iviazizaa kucho, kandi keng'oze chacho chaali chu kumaliriza chahenzana nu mugizi. Madigi gu mugati gaali ni misaala ja makindu ijavazwa.

²⁷ Hene yaho yaliho kandi, ni inzira yazizaa mugati mwu mugizi. Mundu uyu yaagera inzira yiyi na yaali zimita makomi gatano.

Mugizi gwu Mugati gwi Kirivwa chi Isavaalu

²⁸ Maku mundu uyu yambira mugati mwu mugizi gwi kirivwa chi Isavaalu. Yaagera kirivwa yiki na chaali ni ligera lilala liere kuli kirivwa chu mugizi gwi chova.

²⁹ Ving'oze viu musikari, ving'oze viu vwingiliru kandi madigi gacho viali ni ligera lilala liere kuli virivwa vindi. Madirisha gaali mu ving'oze viacho, uvutambi vwali zimita makomi gaviri na zitano, uvuvambalaru vwali zimita likomi na ziviri ninusu.

³⁰ Ving'ozi viu muvwingiliru viali uvutambi zimita likomi na ziviri ninusu, nu vuvambalaru vwali zimita ziviri ninusu.

³¹ Keng'oze yiki chaali chahenzana nu mugizi gwi chova, kandi misaala ja makindu ijavazwa jaali ku madigi gavio, vika viu kunina igulu mu kirivwa yiki viali munane.

Mugizi gwu mugati gwi kirivwa chi Ivugwi

³² Maku mundu uyu yambira mumugizi gwu mugati gwi kirivwa chi Ivugwi, yaagera kirivwa yiki, na chaali ni ligera lilala liere kuli virivwa vindi viu muvwingiliru, kandi madigi gu mugati viali ni ligera lilala liere kuli virivwa vindi.

³³ Ving'oze viu musikari, ving'oze viu muvwingiliru, kandi madigi gu mugati viali ni ligera lilala liere kuli virivwa vindi. Madirisha gaali mu kandi gaali mu, ving'oze viu muvwingiliru. Ligera liu vutambi vwosi liali zimita makomi gaviri na zitano, kandi ligera liu vuvambalaru liali zimita likomi na ziviri ninusu.

³⁴ Keng'oze chu muvwingiliru chahenzana nu mugizi gwi chova, kandi misaala ja makindu ijavazwa jali ku madigi gavio. Vika viu kunina igulu mu kirivwa yiki viali munane.

Mugizi gwu mugati gwi kirivwa chi Ivaale

³⁵ Maku mundu uyu yambira mugati mwu mugizi gwi kirivwa chi Ivaale. Yaagera na chaali ni ligera lilala liere kuli virivwa vindi.

³⁶ Kirivwa yiki chaali ni ving'oze viu musikari, madigi gu mugati; keng'oze chu muvwingiliru kandi madirisha. Uvutambi vwacho vwali zimita makomi gaviri na gatano, na uvuvambalaru vwacho vwali zimita likomi na ziviri ni nusu.

³⁷ Keng'oze chu muvwingiliru chaali kolovega lwu mugizi gwichova. Misaala ja makindu ijavazwa jali ku madigi gumugati. Vika viu kunina igulu mu kirivwa yiki viali munane.

Zinyumba ziali ahimbi ni kirivwa chi Ivaale

³⁸ Mu mugizi gwu mugati, keng'oze chaali mu ichahambanywa ni kirivwa chu mugati kolovega lwi Ivaale. Keng'oze yiki chazizaa mu keng'oze chu muvwingiliru ichaali kolovega lwu mugizi. Hene yaho vogizilaho vihaanwa via vasamba kuli visiuviliru.

³⁹ Muving'oze viu muvwingiliru yivi, zialimu ni zimesa ziviri kuvuli lovega. Ku zimesa yizi vasinzira ku zinyama zie, vihaanwa viu kusambwa kandi vihaanwa viu vwoni anoho vihaanwa via mahiolo.

⁴⁰ Mukeng'oze chi chova, havwingiliru vwi kirivwa chi ivaale, zialiho zimesa ziviri, kandi kolovega lundi lwi keng'oze chi kirivwa, zialiho zimesa ziviri.

⁴¹ Mugati mwi keng'oze, zialimu zimesa zine, na ichova wu mugizi kandi zialiyo zimesa zine. Ziosi harara ziali zimesa munane ziavasinziraku zinyama zia vahaana kuva kuli kisiuviriru.

⁴² Ziali mu kandi ni zimesa zine iziavazwa kutura ku magina. Zimesa yizi ziali ziokolomberaku vihaanwa viu kusambwa. Ziali zisendimita 50 kuzia igulu, nu vwaliru vwazio vwali zisendimita makomi saba na zitano zimbega ziosi. Viju viosi viavatumikiraa kwita visiuviliru viavikwa kwene yiku.

⁴³ Zinzari zimilimita 75 uvutambi ziavofwa kuzindulu zie zimesa yizi. Zinyama ziosi zievihaanwa ziavikwa komesa yiyi.

⁴⁴ Maku mundu uyu yambira mugati mwu mugizi. Mumugizi yigu, vialimu ving'oze viviri, keng'oze kilala chaali kolovega lwi Isavaalu kolovega lwi kirivwa chi Ivaale, nikindi chaali kolovega lwi ivaale kolovega lwi kirivwa chi Isavaalu.

⁴⁵ Mundu uyu yambolera ndi, keng'oze keveeye kolovega lwi Isavaalu ni cha vasaalisi avatumikaa mu Litembeli,

⁴⁶ ne keng'oze keveeye kolovega lwi Ivaale ni cha vasaalisi avatumikaa ku vwali. Avasaalisi yava vaali ivisukulurwi via Zadoku, avaari vi ihiiri ya Levi avavugililwa kuzia imbiri wa Yahova kumutumikira.

Mugizi gwu Mugati kandi Litembeli

⁴⁷ Mundu uyu yaagera mugizi gwu mugati, na gwaali zimita 50 zimbega ziosi. Litembeli liali kolovega lwi madioli, nu uvwali vwali imbiri wa lio.

⁴⁸ Maku yambira mu vwingiliru vwe keng'oze chi Litembeli, ma nagera uvwingiliru, na vwali zimita ziviri ninusu kuzia musi, nu vuvambalaru vwali zimita saba, na madigi gaali imiita ndala ninusu uvuliduhu ku zimbega ziosi.

⁴⁹ Uvutambi vwu lusimbu vwali zimita likomi, nuvuvambalaru vwali zimita sita. Lwali ni vika likomi viaziza kulwo, kandi lwali ni zitiru ziviri, indala kolovega lulala, ni yindi kolovega lundi.