Ezekieli 4 - KITABU KITAKATIFU

Zacheli Yakola Kekolwa chu Kutulira Jerusalemi

¹ Nyasaye yavoola, “Ivi Mwana wu Mundu, uvuguli lidafari, ma uliviiki imbiri woovo, ma ong'oreku ipicha yi lidaala lia Jerusalemi.

² Maku, wetegeke kwingilira lidaala yili, olombe zimbinga kulio, olombe kitumi kenene imbiri walio, wumbake mahema imbiri walio, kandi uviiki viduyiru viukusambula kukumberiza lidaala yili.

³ Uvuguli uluju lwi kivia kandi uluviiki love kuli lidigi hagati hoho ni lidaala linene. Ohenze lidaala linene live mu liiva liu kukumbirizwa kandi ulikumberize. Yiki kilava kelolero ku ihiiri ya Isiraeli.

⁴ “Maku ogone hasi kolovega lwu mukono gugwo umumosi, na ndaviika mageri ga vandu va Isiraeli ku ivi. Ulaginga uvwoni vwavo ku madiku goosi gogona hasi.

⁵ Mali kuhaana ku ivi madiku 390, galalengana ni mihiga ja mageri gaavo. Kunangwa ivi ulaginga uvwoni vwa vandu va Isiraeli.

⁶ Lwa umala kokora yaga, ugirung'ane ogone ku lovega lwu mukono mulungi na ugingi uvwoni vwa vandu vi Ivuyuda ku madiku 40. Ulakolandio lidiku lilala ku vuli muhiga.

⁷ “Ohenze ku likumberiza lia Jerusalemi. Osone mukono gwugwo ku lidaala yili na oporofete kulio.

⁸ Ndakovoha harara kunangwa uvuli kugirung'ana kutura kolovega lulala kuzia kolovega lundi kuduuka lwa madiku gi likumberiza gahera.

⁹ “Kalunu uvuguli ingano, amavere, ovoro, amaganda kandi izimbindi uviviiki mu kiju mauzunganyie olombe umugadi. Ulalia mugadi yigu ku madiku 390 aga ogonaa ku lovega lwu mukono mumosi.

¹⁰ Umugadi gwa ulia ku lidiku lilala gulagerwa ziguramu 230 ulagulia kuduuka lidiku lilonda ku.

¹¹ Amazi ga unwa ku lidiku lilala galagerwa kandi vikombe viviri vuzwa.

¹² Ulalomba muliru kutura ku mavi amuumu gu mundu, ma olombe mugadi mulitumikira muliru yigwo, ma uguliri havundu havandu vosi vanyara kokolola.”

¹³ Yahova yambolera, “Yaga gamanyia kuli avandu va Isiraeli valakalie chukulia kitaveeye kilahi lwandiva hagati hi zihiiri.”

¹⁴ Maku ndaamutivulira, “Ah Mwami Munene Yahova! Inzi sindayeyononyia ku kali hakuzu mba. Kutura mu vosooleri vwange kuduuka kalunu ndi, inzi sindaalia ku kindu choosi chaakuza anoho ichiitwa ni zinyama ziu muvulimu mba, anoho si ndaaliaku inyama yukuvihiririza mba.”

¹⁵ Kunangwa Nyasaye yambolera, “Vulahi ligali. Ndaleka uvuguli isingu utumikiri kolomba umugadi havogono ha mavi.”

¹⁶ Nyasaye yameda kombolera, “Ivi Mwana wu Mundu, ndatulizaho viukulia viu mugadi mu Jerusalemi. Avandu valava ninzara yi chukulia, kandi valava nichukulia kekekeeke kandi mazi makekeekego kunwa.

¹⁷ Ndakora ndio kunangwa vaduuki kudaka umugadi kandi amazi. Valahenzana aveene naveene muvuti, kandi valadekerana kigira uvwoni vwavo.”