Ezekieli 39 - KITABU KITAKATIFU

Liguutwa Lia Goga

¹ Yahova Wuvunyali yavoola, “Mwana wu Mundu porofeta uvudamanu vwa Goga, mwamihi munene wi zihiiri zia Mesheki na Tubali. Umuvolere ndi, inzi mbeeye musigu weve.

² Ndamugirung'anyia muhiri kolovega lundi kutura ihale wa Ivaale kuduuka ku vigulu via Isiraeli.

³ Maku ndaduya uvuta vwivwe vutuli mu mukono gwigwe mumosi kandi mivano jije ju vuta jituli mu mukono gwigwe mulungi.

⁴ Goga harara ni liihi lilie kandi vandu veve vosi valakuzira ku vigulu via Isiraeli. Ndaleka manyonyi kandi zinyama ziu muvulimu kulia miviri jaavo.

⁵ Valakuzira mu kiguti havulavu. Inzi Yahova Wuvunyali mali kovora.

⁶ Ndahambiza muliru mu kivala cha Magogi kandi ku visulu viosi iviveeye ahimbi ninyanza, wa vandu vamenyi mu mirembe. Vuli mundu woosi alakamanye ndi, inzi mbeeye Yahova.

⁷ Kuduuka ndore ndi avandu vange Isiraeli vamanyi lieta liange Litakatifu. Sindavugilira lieta liange litakatifu lionogonywe mba. Maku zihiiri zilakamanye ndi Inzi Yahova, mbeeye Nyasaye Mutakatifu wa Isiraeli.”

⁸ Yahova Wuvunyali avoora, “Lidiku lizaa lie vindu yivi vilakekoleke.

⁹ Avandu vamenyi mu madaala ga Isiraeli valazia ichova nukuvunginza iviungi vialekwa nukuhambizira muliru. Zinguva kandi zikuuti, uvuta kandi mivano ju vuta, amatimu kandi vigurume; valalomba muliru guliaduka ku mihiga saba.

¹⁰ Sivalakazie kwenya zingu mu mulimi anoho kotema misaala mu mulitu mba, kigira valakave nivaveeye ni viugi kuhambizira muliru. Valakatege nukugumira yavo avavatega, kandi valanuule yavo avavalinuula.” Yahova Wuvunyali umali kovora.

Liyavirwa lia Goga

¹¹ Yahova yavoola, “Lwayaga galakekoleke, ndakahaane ku Goga havundu haliyavilwa mu Isiraeli; mu livona lia vandu avavitaa Ivugwi kolovega lwinyanza yi jumbi. Goga harara ni liihi lilie valakayavilwi wene yeyo, virindwa viavo vilakigaliri inzira ya yavo avavitaa. Havundu yaaha halakalangwe ‘Livona lie liihi lia Goga.’

¹² Avandu va Isiraeli valakayaviri miviri mikuzu ku mieli saba, kunangwa vaduuki kunihiza kivala kandi.

¹³ Avandu vosi mu kivala valakakonyane kuyavira miviri yiji, kandi valakahevwe luyali kulikola yaga ku lidiku Lieliguuta liange! Inzi Yahova Wuvunyali mali kovora.

¹⁴ Inyima wi mieli saba jimali kuvita, avandu vasaza valatovolwa kuvitira hagati hi kivala kwenyeleriza nokonyoora miviri jatigala kumalova nukujiyavira, kunangwa vaduuki kunihiza kivala kandi.

¹⁵ Lwa valakave nivavitira hagati hi kivala, niiva mundu alalola kigumba chu muviri gwakuza, valaviikaku kelolero, kunangwa avayaviri vaduuki kukivugula nu kukiyavira mu livona lie liihi lia Goga.

¹⁶ Ahene yaho, lidaala naliveho iliaza lilangwe lieta ‘Iliihi.’ Kandi nindio valakanihizi kivala kandi.”

¹⁷ Yahova Wuvunyali yambolera, “Mwana wu Mundu, langa manyonyi zing'ano ziosi kandi zinyama ziosi, uzivoolere zievungikizane harara zilie viukulia via mali kuzilombela. Lilakave Lisavo linene ligali ku kiguru cha Isiraeli, uwanazilie zinyama kandi kunwa masahi.

¹⁸ Zilakalie miviri ja vasikari kandi kunwa masahi ga vamiihi vi lirova, vosi avaazaa viitwi kuli amagondi amakole, vimeme, zimburi, zigiriki kandi zinyama ziosi zing'omeru kutura Bashani.

¹⁹ Lwa nanziti avandu yava vosi, amanyonyi kandi zinyama zilakalie zitinya ziosi kandi kunwa masahi kuduuka lwa nazihambiki.

²⁰ Komesa yange, zilakalie zinyama zie zibarasi harara na vahiri vazio, avasikari kandi vasaza vuvulwani. Inzi Yahova Wuvunyali mali kovora.”

Liranywa lia Isiraeli

²¹ Yahova yavoola, “Ndaleka zihiiri kolola uvukumi vwange hagati, kandi ndavamanyia likalaga liange lirungi kandi amageri gambana kuzio.

²² Avandu va Isiraeli valamanya kutura kalunu ndi, Inzi mbeeye Yahova Nyasaye wavo.

²³ Zihiiri zilamanya ndi, avandu va Isiraeli vazia mu lihaminywa kigira uvwoni vwa vaangolera. Ndaagirung'ana kutura kuvo kandi nindeka avasigu vaavo ni vavaguuta kandi ni vavitira mu vulwani.

²⁴ Ndaavakolera kolondekana nu vudamanu vwavo kandi vuchamu vwavo, kandi ndaagirung'ana kutura kuvo.”

²⁵ Yahova Wuvunyali yavoola, “Navuzwa kalunu ndava ni zimbavasi ku visukululwi via Yakobo, avandu va Isiraeli, kandi ndavagasiza. Ndasoora lieta liange litakatifu.

²⁶ Lwa navave nivamenyi mu mirembe kandi mu kivala chavo, vugira mundu kuvatihiza, naviviliri kuli vaali mu zisoni kandi uvudamanu vwa vaangolera.

²⁷ Lwa nanziranyie avandu vange kutura mu zihiiri kandi kutura muvivala via vasigu vaavo, namanyie zihiiri zinyingi ndi, inzi mbeeye Mutakatifu.

²⁸ Maku avandu vange navamanye ndi, Inzi mbeeye Yahova Nyasaye wavo. Valakamanye yaga kigira ndaavahila mu lihaminywa na kalunu ndavavungiza kandi hagati hi zihiiri kandi ndaviranyia mu kivala chavo, vugira koleka mundu kali mulala kuvo kutigala inyima.

²⁹ Ndaviika Roho gwange ku vandu va Isiraeli, kandi sindagirung'ana kutura kuvo mba. Inzi Yahova Wuvunyali mali kovora.”