Ezekieli 38 - KITABU KITAKATIFU

Goga Kuli Chugi cha Nyasaye

¹ Yahova yamoloma ninzi kandi.

² Yavoola, “Mwana wu Mundu, oporofete vudamanu vwa Goga, mwamihi munene wi zihiiri zia Mesheki na Tubali mu kivala cha Magogi. Oporofete vudamanu vwivwe,

³ kandi umuvolere ndi Inzi, Yahova Wuvunyali, mbeeye musigu weve.

⁴ Ndamugirung'anya yiyi na yiyi, nukuviika zindohani mu zisaya zizie, kandi ndamukunga harara na vasikari vi liihi veve vosi kuzia ihale, harara ni zibarasi kandi avasaza vi zibarasi vanyingi, kandi vuli musikari oveeye ni inguuva kandi yiyavaye kivavi ni inguva.

⁵ Avandu kutura Pasia, Ezopia kandi Libia vaveeye naye, kandi vosi vaveeye ni zigudwa kandi zikuuti.

⁶ Avasaza vosi vakubana kutura muvivala via Goma na Bezi Togama kolovega lwa Ivaale vaveeye naye, harara na vasaza kutura mu zihiiri zindi zinyingi.

⁷ Umuvolere yetegeke kandi akole vasikari vi liihi veve vetegeke lwa alaga.

⁸ Inyima wi mihiga minyingi, ndakamulage yingiliri kivala uwa vandu viranywa harara kutura mu zihiiri zinyingi vamenyi vugira uvuti vwu vulwani. Alakingiliri vigulu via Isiraeli, iviali hazwa kandi vialekwa ku ing'inga indambi, navuzwa uwa avandu vosi kalunu vamenyi mu mirembe.

⁹ Oyo harara ni liihi lilie kandi zihiiri zinyingi harara naye zilakingiliri kuli ikiihi kandi zilakunika kivala kuli lilesi.”

¹⁰ Yaga nigo ga Yahova Wuvunyali avooreraa Goga: “Lwi ing'inga yeyo iliduuka, ulakatange kuganagana kolohiza vudamanu.

¹¹ Notovole kwingilira kivala kitinyaliza wa vandu vamenyi mu mirembe kandi mulikingwa, mu madaala gataveeye na madigi kandi vugira likingwa.

¹² Nulange avandu vamenyi mu madaala manene agaali amang'anye mu maziambiri. Gamali kuvungizwa kutura mu zihiiri, kandi kalunu vaveeye nimitugu, miandu kandi vamenyi hagati hi kivala.

¹³ Avandu va Sheba na Dedani kandi avakiranyi kutura mu madaala ga Sipeini, navakoteeve ndi, ‘Ivi umali kuvungiza liihi liilio nu kwingilira kuduuka ulanye? Uganagana konyoora izahabu, ifeza, mitugu kandi miandu nu kuzia navio viosi?’ ”

¹⁴ Kunangwa Yahova Wuvunyali yanduma mbolere Goga aga yavoola kuye: “Kalunu lwa vandu vange Isiraeli vamenyi mu likingwa, ulatula

¹⁵ havundu hoho kolovega lwa Ivaale yi ihale, nuwimiriyi muganda munene gwi zinguru gwi liihi lia vasikari kutura mu zihiiri zinyingi, vosi ni vaveeye ku zibarasi.

¹⁶ Ivi nuwingiliri avandu vange va Isiraeli kuli ikiihi kikuguta ku kivala. Lwi ing'inga iliduuka, ndakakutumi kwingilira kivala change, kunangwa umanyie zihiiri ndi, inzi mbeeye vwaha, nukumanyia vutakatifu vwange agandaza ngole kuvitira mu ivi.

¹⁷ Ivi niyie uwa ndaamoloma naye zing'inga ziavita lwa ndalandiza kuvitira mu vatumikiri vange, avaporofeti va Isiraeli, ndi mu madiku gaza ndakaleete mundu kwingilira vandu va Isiraeli.” Yahova Wuvunyali umali kovora.

Nyasaye Yahaana Mageri ku Goga

¹⁸ Yahova Wuvunyali avoora, “Ku lidiku lwa Goga alingilira Isiraeli, ndakave nu vutima.

¹⁹ Nandizaa mu vutima vwange vululu ndi, ku lidiku liene yilio, lidegera linene naliveho mu kivala cha Isiraeli.

²⁰ Vuli isuzi kandi linyonyi, vuli inyama enene kandi engekeeke kandi vuli umundu ku lirova navive nuvuti kandi lidegera kigira inzi. Vigulu navigwi hasi, zinyanda naziadiki kandi vuli lidigi naligwi hasi.

²¹ Nangore Goga kuva nuvuti kandi kivi choosi. Inzi Yahova Wuvunyali mali kovora, avandu veve valakitane aveene ku aveene.

²² Nambane kuye mageri gu vulwaye ni likuza. Imbura yi migelera kandi ya magina harara nu muliru gwi kibiriti nikubi kuye harara ni liihi lilie kandi zihiiri zinyingi iziveeye kolovega lwilwe.

²³ Munzira kuli yiyi, namanyie zihiiri ziosi ndi, inzi mbeeye munene kandi mbeeye mutakatifu. Valakamanye ndi inzi mbeeye Yahova.”