Ezekieli 37 - KITABU KITAKATIFU

Livona Lievigumba Vihangalalu

¹ Ndaahulira zinguru zinene zia Yahova, kandi Roho weve yambugura nambira indangu mu livona uwi vigumba viali niviizura.

² Yanzimilira kuduuka mu zimbega ziosi zie livona, kandi ndaalora ndi vigumba vinyingi viali mu livona yili na viali vihangalalu ligali.

³ Yandeva, “Mwana wu Mundu, vigumba yivi vinyala kuva mwoyo?” Ndaativura, “O, Yahova Wuvunyali, ivi weng'ine umanya!”

⁴ Yavoola, “Oporofete ku vigumba yivi. Uvivoolere vigumba yivi vihuliri likuva liange.

⁵ Uvivoolere ndi inzi, Yahova Wuvunyali, mboraa ndi: Nziza kuhuuza mwika mu munyi kandi mulava mwoyo.

⁶ Ndamuha imichi kandi zinyama, kandi ndaviika ku munyi ligodo. Ndahuuza mwika mu munyi na mulava mwoyo kandi. Maku namumanyirizi ndi Inzi mbeeye Yahova.”

⁷ Kunangwa ndaaporofeta kuli Yahova yaali naamboleye. Lwa ndaali nemolomaa, ndaahulira muliviti gwi liyoga, kandi vigumba viatanga kwung'ana harara.

⁸ Lwa ndahenza, imichi, zinyama kandi ligodo, viakunika vigumba. Navuzwa viali numwika muvio mba.

⁹ Nyasaye yambolera, “Mwana wu Mundu, porofeta ku umwika. Ogovoolere ndi, Mwami Munene Yahova alaangaa ivi kutura mu zimbega ziosi, na uzie mu miviri mikuzu yiji, kandi jive mwoyo.”

¹⁰ Kunangwa ndaaporofeta kuli Yahova yaali naamboleye. Umwika gwaaza mu miviri, kandi nijiva mwoyo ma nijisingira. Vaali avandu avanyingi vanyala kolomba iliihi liene.

¹¹ Nyasaye yambolera, “Mwana wu Mundu, avandu va Isiraeli vaveeye kuli vigumba yivi. Vavola ndi vaveeye avahangalalu, kandi vaveeye vugira lisuuvirizwa, kandi vadiviziywi.

¹² Kunangwa oporofete ku vandu vange Isiraeli, kandi uvavoolere ndi, Inzi Yahova Wuvunyali, nziza kukunula vilindwa viavo. Nziza kuvatuliza ichova kandi ndavilanya mu kivala cha Isiraeli.

¹³ Lwa nangunuli vilindwa uwa vandu vange vaayavirwa kandi nukuvatuliza mu, navamanye ndi, inzi mbeeye Yahova.

¹⁴ Ndakahuuzi mwika gwange muvo, na mbakole navave mwoyo, kandi ndavaleka vamenye mu kivala chavo aveene. Maku navamanye ndi, inzi mbeeye Yahova. Mali kulaga ndi ndakora yaga, kandi ndakora. Inzi, Yahova, mali kovora.”

Vwamihi vwi Ivuyuda nu vwa Isiraeli Vuhambani

¹⁵ Yahova yamoloma na inzi kandi.

¹⁶ Yavoola, “Mwana wu Mundu, vugula lubaho ong'ode ku makuva yaga, ‘Vwamihi vwi Ivuyuda.’ Maku uvuguli lubaho lundi ong'ode ku makuva yaga, ‘Vwamihi vwa Isiraeli.’

¹⁷ Maku ugumiri vibaho viviri yivi ku zisonga ziavio kunangwa vivekuli kibaho kilala.

¹⁸ Lwa vandu vovo vakoteeva uvavoolere ichagavolaa,

¹⁹ uvavoolere ndi inzi, Yahova Wuvunyali, nziza kuvugura ulubaho lumanyiaa Isiraeli kandi mbiki harara nulumanyiaa Ivuyuda. Viviri yivi ndavikola kugwa kibaho kilala kandi ndakigumila mu mukono gwange.

²⁰ “Ugumiri mu mukono gugwo vibaho viviri ma oleke avandu vavilore.

²¹ Maku uvavoolere ndi, Inzi Yahova Wuvunyali, nziza kuvugura vandu vange kutura mu zihiiri wa vaali nivamali kuzia, ndavavungiza harara, kandi ndaviranyia mu kivala chavo.

²² Ndavaha mbanyia harara kuli ihiiri indala mu kivala, kandi valakamenye ku vigulu via Isiraeli. Navave nu mwami mulala uwaza avamihi, si navagavulanywe mu zihiiri ziviri anoho vwamihi vuviri kandi mba.

²³ Si naveyonogonyie nivifananyi viavo viukuvihiliriza, anoho kweyonogonyia nuvwoni mba. Nambahonyie kutura mu vwoni vwavo vwosi. Nambakore kuva avasereze. Navave avandu vange kandi inzi nambe Nyasaye wavo.

²⁴ Mwami kuli mutumikiri wange Daudi naave mwami wavo. Vosi valakave nu mwami mulala kandi navatie malago gange Mu vusuuvirifu.

²⁵ Valakamenye mu kivala cha ndahaana ku mutumikiri wange Yakobo, kivala cha vaguuga vaavo vamenyamu. Valakamenyeyo mihiga ni mihiga harara na vana vaavo kandi ni visukululwi viavo viosi. Mwami kuli mutumikiri wange Daudi alakavamiihi mihiga ni mihiga.

²⁶ Inzi ndakalombe lilagana harara navo liukuvasuuviliza mirembe mihiga ni mihiga. Inzi ndakavasingilizi kandi ndakameede ulwivulu lwavo, kandi ndakaviiki Litembeli liange mu kivala chavo uwa lilakamenye mihiga ni mihiga.

²⁷ Inzi ndakamenyeyo navo. Inzi nambe Nyasaye wavo, kandi valakave avandu vange.

²⁸ Lwa ndakaviiki Litembeli liange wene yeyo kuva harara navo mihiga ni mihiga, maku zihiiri zilakamanye ndi, inzi Yahova mali kotovola vandu va Isiraeli kuva vandu vange.”