Ezekieli 36 - KITABU KITAKATIFU

Nyasaye Yagasiza Isiraeli

¹ Yahova yavoola, “Mwana wu Mundu, moloma ku vandu va Isiraeli na uvavoolere vahulirizi makuva ga

² Inzi Yahova Wuvunyali mboraa kuvo: Avasigu va Isiraeli vasangala nivavoora, ‘Kalunu vigulu via kale yivio viveeye iviitu!’

³ “Maku oporofete kandi ulandizi aga Inzi Yahova Wuvunyali mboraa. Lwi zihiiri zindi ziamwingilira kutura ku zimbega ziosi, kandi nivamunyaga miandu jinyu jiosi, vosi vaamunyega.

⁴ Kunangwa kalunu, muhuliri aga Inzi Yahova Wuvunyali mboraa ku munyi; avandu va Isiraeli avamenyi ku vigulu, kandi kutogera kandi mumavona, kandi avamenyi havundu halekwa kuva mang'anye, kandi avamenyi mu madaala galekwa kandi agavalanywa kandi nimulegerizwa ni zihiiri ziosi iziamukumberiza.

⁵ “Inzi Yahova Wuvunyali mali kovora mu vutima vwange vululu ku zihiiri ziamukumbeliza, kukila ligali avandu va Edomu. Vaavugura kivala change harara ni miandu jacho josi ni liekonya kandi ni lilegeriza.

⁶ “Kulwayago, oporofete mu kivala cha Isiraeli, ovoolere avandu vamenyi ku vigulu, kandi ahimbi ni migera ja mazi kandi mu mavoona ndi, Inzi Yahova Wuvunyali mboraa mu vutima vwange vululu kigira vamali konyega kandi kolegerizwa ni zihiiri zindi.

⁷ Inzi Yahova Wuvunyali nzisuha ndi, zihiiri ziveeye ahimbi ni munyi zilava mu zisoni.

⁸ Navuzwa misaala jiraviruka kandi ku vigulu via Isiraeli, kandi jilama makuyu kigira vandu vange Isiraeli; munyi muveeye ahimbi kwirana yengo.

⁹ Inzi mbeeye harara ni munyi, na kuduuka mulalima milimi jinyu kandi mulataga.

¹⁰ Ndamukora avandu vosi va Isiraeli komeedeka. Mulamenya mu madaala manene kandi mulumbaka uvuhia havundu hoosi ahaali nihagwa amang'anye.

¹¹ Ndakora vandu kandi zing'ombe komedeka. Mulava avanyingi kuvita maziambiri. Ndaleka mumenye mu kivala yiki kuli mwamenyaa mucho maziambiri; kandi ndamukora kuva vatugi kuvita ing'inga yindi yoosi. Maku mulakamanye ndi inzi mbeeye Yahova.

¹² Ndamuleeta munyi, avandu vange Isiraeli, kwirana komenya mu kivala yiki kandi. Kilava chiinyu, kandi si ndaleka vana vinyu vakuzi kigira inzara mba.

¹³ “Inzi Yahova Wuvunyali mboraa ndi: Gaveeye agiligali ndi, avandu vavoola ndi munyi mulizaa vandu, kandi vavoola ndi munyi mwitaa vana vi zihiiri.

¹⁴ Navuzwa kutura kalunu, munyi simulalia vandu kandi mba, si muliita vana vi zihiiri kandi mba. Inzi Yahova Wuvunyali mali kovora.

¹⁵ Sindavugilira zihiiri zimunyege kandi mba, anoho kumuchaya mba. Sindaleka ihiiri yinyu igwi mba. Inzi Yahova Wuvunyali mali kovora.”

Limenya Lihia lia vandu va Isiraeli

¹⁶ Yahova yamoloma ninzi kandi.

¹⁷ Yavoola, “Mwana wu Mundu,” “lwa vandu va Isiraeli vamenya mu kivala chavo, vachononyia kolondekana ni limenya liavo liali, kandi muvikolwa viavo. Likora liavo liali lidamanu ligali, kuli mukali oveeye mu madiku geege gu mweli.

¹⁸ Kunangwa ndaviika vutima vwange vululu kuvo kigira avandu vavaali nivamali kwita kandi kigira vayononyia kivala ni vifananyi viavo.

¹⁹ Ndaavakalagira kolondekana ni limenya liavo kandi ni vikolwa viavo, kandi ndavasalanyia hagati hi zihiiri mu vivala vigeni.

²⁰ Navuzwa havundu hoosi havazizaa hagati hi zihiiri, vononyia lieta liange litakatifu, kali kuduuka vandu nivavoora, ‘Yava vaveeye avandu va Yahova, navuzwa gavadukiraa vatuli mu kivala chiche.’

²¹ Navuzwa inzi ndaali nilihenda mwoyo kigira lieta liange litakatifu, ilia vandu va Isiraeli vononyia hagati hi zihiiri muvivala vigeni.

²² “Maku kalunu, ovoolere avandu va Isiraeli ndi, Inzi Yahova Wuvunyali mboraa makuva yaga kuvo: Aga Inzi nziza kokora sigaveeye kigira munyi avandu va Isiraeli mba, navuzwa gaveeye kigira lieta liange litakatifu, iliamumali kwononyia wamwazia hagati hi zihiiri muvivala vigeni.

²³ Lwa manyia zihiiri uvutakatifu vwi lieta liange linene, ilieta liamwononyia hagati hi zihiiri, maku zilakamanye ndi, Inzi mbeeye Yahova. Inzi Yahova Wuvunyali mali kovora. Ndatumikira munyi avandu va Isiraeli kumanyia zihiiri ndi Inzi mbeeye Mutakatifu.

²⁴ Ndamuvugura kutura mu zihiiri, kandi ndamuvungiza kutura muvivala viosi, nukumuleeta mu kivala chienyu aveene.

²⁵ Ndasundura mazi malahi ku munyi, na ndamukora kuva avanifu kutura ku vudamanu vwosi vwi vifananyi via mwononyia.

²⁶ Ndamuha umwoyo muhia, kandi ndaviika Roho muhia mu munyi. Ndatuliza mu munyi umwoyo mudinyu gwi ligina na ndaviika mu munyi umwoyo gwi liegehiza.

²⁷ Ndaviika Roho gwange mu munyi, kandi ndamukora mugumiri lilago liange kandi mulonde amalago gange goosi agaamali kumuha.

²⁸ Maku mulakamenye mu kivala cha ndahaana ku vaguuga vinyu. Mulakave vandu vange na Inzi ndakave Nyasaye winyu.

²⁹ Ndakamuhonyie kutura ku vudamanu vwosi. Ndahaana viukulia vinyingi ku munyi na si mulava ninzara kandi mba.

³⁰ Ndakameeda liama lie misaala ja makuyu kandi ni milimi jinyu, kunangwa inzara silivaho ilimukola kuva nizisoni hagati hi zihiiri mba.

³¹ Maku mulakizulizi likora lienyu lidamanu kandi vikolwa vienyu vitali vilahi. Mulakave ni livihirirwa aveene kigira uvwoni vwinyu kandi kivihiri chiinyu.

³² Munyi avandu va Isiraeli, nyenya mumanye ndi Inzi singolaa yaga kigira munyi mba, nyenya muve soni kandi muve ni lihenda mwoyo ku goosi agamukolaa. Inzi Yahova Wuvunyali mali kovora.”

³³ Yahova Wuvunyali avoora, “Ing'inga ya namwitakase uvwoni vwinyu vwosi, ndakaleke namumenye mu madaala ginyu kandi, nokoleka mwumbake uvuhia havundu hoosi ahatigala mang'anye.

³⁴ Vuli mundu wavitila mumili jinyu yalora kuli jaali vulimu, navuzwa ndakaleke mulajilimi kandi.

³⁵ Avandu yava valakavoole ndi, ‘Kivala yiki ichaali nichatigala hazwa, kalunu kimali kugwa kuli mulimi gwa Edeni. Amadara gaali nigaatigala mang'anye, kandi gadivizwa, kalunu avandu vamenyi mu kandi gumbakiywi zimbinga.’

³⁶ Maku zihiiri ziatigala ahimbi zilakamanye ndi, Inzi Yahova, mali kwumbaka vuhia madaala goosi agaali ni gatigala mang'anye, kandi mali kulima nukutaga milimi jaali nijatigala hazwa. Inzi Yahova mali kulaga, kandi ndakora.”

³⁷ Yahova Wuvunyali avoora, “Ndaleka avandu va Isiraeli vandeeve ovokonyi kutura ku inzi, kandi ndaleka vamedeke vave avanyingi kuli chayo cha magondi.

³⁸ Amadara gaveeye kalunu amang'anye, galavamu na vandu vanyingi kuli Jerusalemi yaali na magondi amanyingi agahaanwa kuva kuli kisiuviriru ku lidiku lie lisavo. Maku avandu yava valakamanye ndi, Inzi mbeeye Yahova.”