Ezekieli 32 - KITABU KITAKATIFU

Mwami wa Egebeti Yafananywa ni Ingwina

¹ Ku lidiku liu kutanga ku mweli gwa 20 mu muhiga gwa 12 gwi lihaminywa lietu, Yahova yamoloma na inzi.

² Yavoola, “Mwana wu Mundu, uhaane lieganihiza ku mwami wa Egebeti. Umuvolere makuva yaga: Ivi wekolaa kuva kuli isimba hagati hizihiiri, navuzwa oveeye kuli ingwina yuhulanyia mazi mu mugera. Uduvulaa mazi ni virenge vivio kandi okolaa migera kugwa ovodohi.

³ Ndakuviika mumuluvu gwange na ndaleka muganda gwa vandu vanyingi vang'usi muluvu kutura munyanza.

⁴ Ndakakusiuvi ku kivala kigalamu kandi ndaleka amanyonyi goosi kandi zinyama ziosi ziu mu kivala kukulia.

⁵ Ndakasalanyie zinyama ziu muviri gugwo ku vigulu, kandi ndakakuniki mavoona goosi ni zinyama zitigala.

⁶ Ndakasunduli masahi googo mu kivala kali kuduuka ku vigulu viosi, kandi ndakizulizi malina goosi ni zinyama ziu muviri gugwo.

⁷ Lwandakakudivizi, ndakakuniki ligulu nokokola zing'ereng'ani kuva kisundi. Ndakakuniki liuva na malesi, kandi mweli sigulaka mba.

⁸ Ndakakole uvulavu vwosi kuva kisundi kandi ndakakuniki kivala chicho choosi ni kisundi. Inzi Yahova mali kovora.

⁹ “Avandu vanyingi valahenda mwoyo lwandakakuhili mu lihaminywa hagati hi zihiiri, muvivala via ivi ukikiri kumanya.

¹⁰ Agandakakole ku ivi galakola zihiiri zinyingi kogenya. Avami vaavo valadegera nu vuti vunyingi lwa sung'usa kivavi change imbiri wavo. Ku lidiku lieligwa liilio, vosi valakadegere nu vuti kigira livamwoyo liavo.”

¹¹ Yahova Wuvunyali avooreraa mwami wa Egebeti ndi, “Mwami wa Babiloni alakwita ni kivavi.

¹² Ndakaleke vasikari vi zinguru kutura mu zihiiri viiti avandu vovo vosi ni vivavi. Avandu vovo vosi kandi vuli kindu choosi cha ivi wigingira ku ilakadivizwi.

¹³ Ndakadivizi kali zinyama ziosi ku vuli lujinga lwa mazi. Avandu sivalakaveho, anoho zinyama kuduvula mazi kandi mba.

¹⁴ Maku ndakakole mazi googo kuva malengeru, kandi ndakakole migera kwitululuka galaha kuli amaguta. Inzi Yahova Wuvunyali, mali kovora.

¹⁵ Lwa ndakakole kivala cha Egebeti kuva hazwa, kandi lwu vutugi vwosi vulakavugulwi kandi lwa nandakadivizi avandu vosi avamenyi mucho, hene yaho valakamanye ndi Inzi mbeeye Yahova.

¹⁶ Lieganihiza yili lilava ulwimbu lwi lisioma. Avakali vi zihiiri valakimbi nukusioma kigira Egebeti harara na vandu vosi avamenyi mucho. Inzi Yahova Wuvunyalimali kovora.”

Kivala cha vakuzu

¹⁷ Ku liduku lia 15 ku mweli gwu kutanga mu muhiga gwi likomi nagiviri gwi lihaminywa lietu, Yahova yamoloma na inzi.

¹⁸ Yavoola, “Mwana wu Mundu,” usiome kigira vandu vanyingi va Egebeti. Uvaviiki mu kivala cha vakuzu harara ni zihiiri zindi zie zinguru.

¹⁹ Uvavoolere: “Muganaganaa muveeye avandu vi ligondo lilahi ligali kuvita mundu wundi woosi? Mulazia hasi mu kivala cha vakuzu kogona harara na vandu vataveeye avasuuvirifu.

²⁰ “Avandu va Egebeti valagwa harara nayavo aviitirwa mu vulwani. Kivavi chetegeki kuviita vosi.

²¹ Avanene vi zinguru harara na vimiliri va Egebeti valakavagenihizi mu kivala cha vakuzu. Valakahanzuki: ‘Avandu vataveeye avasuuvirifu, aviitirwa mu vulwani vamali kuduuka hano, mbava vaagoni hano!’

²² “Umwami wa Asiria aveeye uwene yeyo, akumbiriziywi ni virindwa via vasikari veve. Vosi viitirwa mu vulwani,

²³ kandi virindwa viavo viveeye musi ligali mu kivala cha vakuzu. Avasikari veve vosi viitirwa mu vulwani, kandi virindwa viavo viakumberiza kirindwa chiche; maziambiri valeta litihiza mu kivala cha yavo avaari mwoyo.

²⁴ “Elamu aveeye uwene yeyo, kirindwa chiche chakumberizwa ni virindwa via vasikari veve. Vosi viitirwa mu vulwani, na vazia mu kivala cha vakuzu nivataveeye avasuuvirifu. Valeta litihiza mu kivala cha vandu vaveeye mwoyo, navuzwa kalunu vagona mu zisoni mu kivala cha vakuzu.

²⁵ Elamu Yagona hagati ha yavo aviitirwa mu vulwani, kandi virindwa via vasikari veve viakumberiza kirindwa chiche. Vosi sivaveeye avasuuvirifu mba, kandi vosi viitirwa mu vulwani. Valeta litihiza mu kivala cha vandu vaveeye mwoyo, navuzwa kalunu vagona mu zisoni mu kivala cha vakuzu harara na yavo avamala kwitirwa muvulwani.

²⁶ “Mesheki na Tubali vaveeyeyo kandi, virindwa viavo viakumberizwa ni virindwa via vasikari vaavo, vosi si vaveeye avasuuvirifu mba, kandi viitirwa mu vulwani. Valeta litihiza mu kivala cha vandu vaveeye mwoyo.

²⁷ Si vaayavirwa nu luyali kuli avasaza vakale vi zinguru vu vulwani mba, avaazia mu kivala cha vakuzu niviyavali viugi viu vulwani. Yivavi viavo viavikwa isi wi mitwi jaavo, kandi zinguva ziavo ziakinga miviri jaavo. Avasaza avaluviriri yava vaali ni zinguru zinyingi ligali ziaduukanaa kutihiza vandu mu kivala cha avaveeye mwoyo.

²⁸ “Nindio avandu va Egebeti valakaduvulanywe hagati ha vandu vataveeye avasuuvirifu, aviitirwa mu vulwani.

²⁹ “Virindwa via vandu va Edomu harara na vami vaavo kandi na vamiihi vaavo viveeye uwene yeyo. Vaali avasikari vi zinguru ligali, nakalunu vagona harara na vandu vataveeye avasuuvirifu mu kivala cha vakuzu, aviitirwa mu vulwani.

³⁰ “Virindwa via vamiihi va Ivaale harara na Sidoni viveeye uwene yeyo. Valeta litihiza mu kivala cha vaveeye mwoyo. Navuzwa kalunu vagona muzisoni harara niyavo aviitirwa mu vulwani, kandi harara na vandu vatali avasuuvirifu. Vosi vaveeye mu zisoni harara niyavo avaveeye mu kivala cha vakuzu.

³¹ “Lwu mwami wa Egebeti harara ni liihi lilie navalole virindwa via vandu yava vosi, aviitirwa mu vulwani ni kivavi, aleleminywa mwoyo kigira avandu yava.” Mwami Munene Yahova avoora.

³² “Inzi ndaakola Mwami wa Egebeti kulandiza litihiza mu kivala cha vandu avaveeye mwoyo, navuzwa oyo harara ni liihi lilie valitirwa mu vulwani; valagona harara na yavo vosi avataali avasuuvirifu, kandi harara nayavo aviitirwa mu vulwani.” Yahova Wuvunyali umali kovora.