Ezekieli 31 - KITABU KITAKATIFU

Egebeti ifananywa nu musaala gwu mudaragwa

¹ Ku lidiku liu kutanga, ku mweli gwa kavaga mu muhiga gwi likomi na mulala gwi lihaminywa lietu, Yahova yamoloma ninzi.

² Yambolera, “Mwana wu Mundu, ovoolere Mwami wa, Egebeti harara na vandu veve vosi ndi: Munyi munyala kufananywa na vwaha mu vonene vwinyu?

³ Muveeye kuli musaala gwu mudaragwa mu Lebanoni, ogoveeye ni zisia zie chiriri kilahi ligali; Goveeye mutambi ligali kali kuduuka mu malesi.

⁴ Goveeye na mazi kogokola guviruki, migera ja mazi gu mululiva jihaanaa chukulia kugwo. Gisamangwa amazi gasamangwa havundu hu musaala yigu guvirukila. Migera ja mazi jahirwa mu misaala jiosi ju mu mulitu.

⁵ Kigira gwasamwa na mazi vulahi, gwaviruka nigutambiha ligali kuvita misaala jindi jiosi. Zisia ziagwo ziali zindiduhu kandi zindambi ligali.

⁶ Vuli zing'ano ziosi zia manyonyi, ziumbaka zinyumba ziazio mu zisia ziu musaala yigu; zinyama ziu mu vulimu zivuliraa vana vazio mu chiriri chu musaala yigu. Zihiiri ziu mu kivala zisoseraa mu chiriri chagwo.

⁷ Musaala yigu gwaali munene kandi mulahi ligali; gwaali mutambi ligali, ni zisia zindambi. Miri jagwo jaduuka hasi mu mazi manyingi.

⁸ Sigwaliho nu musaala gundi gwu mudaragwa mu mulimi gwa Nyasaye ugwali gunyala koleng'anywa nu musaala yigu mba. Sihaliho nu musaala gwu muberosi ugwali ni zisia kuli yizi mba, anoho si gwaliho musaala gwu Mwamori ugwali ni zisia kuli yizi mba. Si gwaliho nu musaala gundi mu mulimi gwa Nyasaye ugwali mulahi kuli musaala yigu mba.

⁹ Ndaagokola kuva mulahi ligali ni zisia zinyingi ligali. Vuli musaala mu Edeni, mulimi gwange, gwaali ni likendeka ku musaala yigu.

¹⁰ “Kulwayago, Inzi Yahova Wuvunyali, ndaamuvolera aga ziza kwekoleka ku musaala yigu, ugwavirukaa kali kuduuka mu malesi. Lwa gwaviruka nigutambiha, gwaali ni liegingira.

¹¹ Mali kukusuura kandi ndaleka umwamihi mugeni wu kutihiza ligali agokolere agadukanaa nagwo kandi kolondekana nu vudamanu vwagwo.

¹² Avageni vi zihiiri vukutihiza valagotema kandi valagoleka. Zisia ziagwo kandi amatu gagwo galavunguluka ku vuli kiguru kandi livona mu kivala. Zihiiri ziosi iziamenyaa mu chiriri chagwo zilagoleka.

¹³ Amanyonyi galamenya ku musaala gumali kugwa yigu, kandi zinyama ziu mu vulimu ziladuvagira hasi zisia na amatu gagwo.

¹⁴ Kunangwa, kutura kalunu, si gulavaho musaala gwosi, kali gove nigwasamwa vulahi ligali, guliviruka kandi gutambiha ligali kuli musaala yigu mba. Anoho zisia ziagwo sizilakaviruki kuduuka mu malesi kuli yigu mba. Josi jilakakuzi kuli avandu vakuza ma vazia mu kivala cha vakuzu.”

¹⁵ Yaga nigo aga Yahova Wuvunyali avoora, “Ku lidiku liene yilio lwu musaala yigu gulikuza nukuzia mu kivala chavakuzu, ndakagukuniki na mazi gu mu lirova, kuli kelolero chi Lisioma. Ndakagumili mazi gimigera gavuli kwituruka. Kigira musaala yigu gumali kukuza, ndakakuniki vigulu via Lebanoni ni kisundi, kandi ndakakole misaala josi ju mumulitu kwuma.

¹⁶ Lwu musaala yigu gulakakuzi nukuzia mu kivala cha vakuzu, lihulirika lie liigwa liagwo lilakadegerizi zihiiri. Misaala josi ja Edeni kandi misaala josi mitovole kandi milahi ja Lebanoni, ijasamwa mazi vulahi, ijiveeye hasi ku lirova, jilakasangaliri liigwa liu musaala yigu.

¹⁷ Josi jilakazie harara nagwo mukivala chavakuzu kuva harara ni jamala kugwa. Vosi avamenyaa isi wi chiriri chagwo valasalanywa hagati hi zihiiri.

¹⁸ “Musaala yigu goveeye kuli mwami wa Egebeti harara na vandu veve vosi. Si jiveeye ho misaala mu Edeni jiveeye mitambi kandi jukuyaanziza mba. Navuzwa kalunu, alazia mu kivala cha vakuzu kuli misaala ja Edeni. Alakahambane harara na yavo avataveeye avasuuvirifu kandi yavo aviitirwa mu vulwani. Inzi Yahova Wuvunyali mali kovora.”