Ezekieli 30 - KITABU KITAKATIFU

Yahova Alakahaane Mageri ku vandu va Egebeti

¹ Yahova yamoloma na,

² Yavoola, “Mwana wu Mundu, oporofete kandi ulandizi aga inzi, Yahova Wuvunyali mboraa. Ulandizi makuva yaga: Lidiku liu kutihiza lizaa!

³ Lidiku liveeye ahimbi, lidiku lwa Yahova alakahaane mageri. Lidiku lia malesi kandi liu kutihiza ku zihiiri.

⁴ Vulwani vulakaveho mukivala cha Egebeti kandi ovovereri vunyingi navove mu kivala cha Ezopia. Avandu vanyingi mu Egebeti valakitwi; kivala kilakalaanywe nukutigara hazwa.

⁵ “Liihi lilakiiti avasikari avukutungwa kutura Ezopia, Lidia, Libia, Arebia, Kubu, kandi kali kutura mu vandu vange vene.”

⁶ Yahova avoora, “Kutura Migidoli kolovega lwi Ivaale kuduuka Aswani kolovega lwi Isavaalu, avandu vakonya Egebeti vosi valakitirwi mu liihi ni kivavi. Iliihi liukwigingira lia Egebeti lilakadivizwi. Inzi Yahova Wuvunyali mali kovora.

⁷ Kivala kilakave hazwa ligali mu lirova, kandi madaala manene goosi galakatigale mang'anye ligali.

⁸ Lwa nambambizi muliru mu kivala cha Egebeti nukwita vandu vosi avakonyaa kivala yicho, maku navamanye ndi inzi mbeeye Yahova.

⁹ “Lwi lidiku yilio liliduuka, kandi lwa vandu va Egebeti lidivizwa, inzi ndakatumi avatumwa ni zimeri kuvukiza vandu va Ezopia avataveeye ni limanya, na valakatiihizwi. Lidiku yilio lizaa!”

¹⁰ Yahova Wuvunyali avoora, “Ndatumikira mwami Nebukadineza wa Babiloni koheriza uvuhinda vwa vandu va Egebeti.

¹¹ Oyo harara na viliihi veve, avataveeye nizimbavasi valakaze kwononyia kivala. Na vingiliri avandu va Egebeti nivivavi, kandi kivala nachizuri miviri mikuzu.

¹² Ndakakaminyi mugera gwa Naili kandi ndakagulizi kivala ku vandu vadamanu. Avandu vageni valakadivizi kivala choosi. Inzi, Yahova mali kovora.”

¹³ Yahova Wuvunyali avoora, “Ndadiviza ivifananyi kandi avanyasaye vuvugadi mu Mefisi. Sialakaveho mundu kali mulala uwaza yamihi avandu va Egebeti mba, kandi ndakatiihizi avandu vosi.

¹⁴ Ndakakole Isavaalu wa Egebeti kuva hazwa, kandi ndakasambe lidaala lia Zoani Ivaale. Ndakahaane mageri ku vandu vi lidaala linene lia Zebesi.

¹⁵ Ndakaviiki uvutima vwange vululu ku vandu vi lidaala lia Pelusiamu, liveeye zimbinga zinene, zia Egebeti. Ndakadivizi vuhinda vwa vandu vi lidaala lia Zebesi.

¹⁶ Ndasamba kivala cha Egebeti, kandi avandu vi lidaala lia Pelusiamu valakave mu vuzunu. Madigi gi lidaala lia Zebesi galakagwi, kandi mazi galakizuli mu lidaala linene.

¹⁷ Avasaza vasoleri va madaala manene ga Heliopolisi na Bubasitisi valakakuzili mu vulwani, kandi avakali valakahilwi mu vuhambe.

¹⁸ Kisundi kilakakuniki Tahapanesi lwa ndakakole avandu va Egebeti kuva vugira zinguru kandi nokoheliza zinguru ziavakola kuva niligingira. Kisundi nakikuniki Egebeti, kandi avandu vamadaala gacho vosi navahilwi muvuhambe.

¹⁹ Lwa nambane mageri ku vandu va Egebeti, maku valakamanye ndi, Inzi mbeeye Yahova.”

Mwami wa Egebeti Aveeye ni Zinguru mba

²⁰ Ku lidiku lia 7 ku mweli gwu kutanga gwu muhiga gwa 12 gwi lihaminywa lietu, Yahova yamoloma na inzi.

²¹ Yavoola, “Mwana wu Mundu, mali kuvunanyia mukono gwu mwami wa Egebeti. Siaveeyeho nu mundu wagovohelera ni zibendegi anoho kuguviika lukanda, kunangwa guduuki kohona kandi gove nizinguru kugumira kivavi mba.

²² Kunangwa kalunu, yaga nigo aga inzi, Mwami Munene Yahova, mboraa: Mbeeye musigu wu Mwami wa Egebeti. Nziza kuvunanyia makono geege gombi; ogoveeye mulahi kandi ugumali kuvunika; kandi kivavi nakigwi hasi kutura mumukono gwigwe.

²³ Nziza kusalanyira vandu va Egebeti mulirova liosi.

²⁴ Maku ndakora makono gu mwami wa Babiloni kuva ni zinguru; kandi ndaviika kivavi change mu makono geege. Navuzwa ndavunanyia makono gu mwami wa Egebeti, kandi alakenya nukukuza imbiri wu musigu weve.

²⁵ Yee, ndamukora kuva mudedekere kandi ndakora mwami wa Babiloni kuva ni zinguru. Lwa nambane kivavi change kuye kandi na kesone mu kivala cha Egebeti, vuli mundu namanye ndi Inzi mbeeye Yahova.

²⁶ Ndakasaranyiri avandu va Egebeti mu lirova liosi. Maku navamanye ndi, Inzi mbeeye Yahova.”