Ezekieli 3 - KITABU KITAKATIFU

¹ Nyasaye yavoola, “Mwana wu Mundu, ulie likaradasi lia mang'oda yili; maku uzie omolome na vandu va Isiraeli.”

² Kunangwa ndaakunura munwa gwange, kandi niyamba likaradasi lia mang'oda nduuki kulia.

³ Yambolera, “Mwana wu Mundu, ulie likaradasi lia mang'oda liangoheeza yili ma wiguti.” Ndaalia, na liali linolu ligali kuli vwuki.

⁴ Maku Nyasaye yavoola, “Mwana wu Mwundu, zia ku vandu va Isiraeli kandi uvavoolere aga ngovolera.

⁵ Inzi singutumaa ku ihiiri emoloma lulimi logeni ludinyu mba, navuzwa ku avandu va Isiraeli.

⁶ Niiva ndakutuma ku zihiiri ziezingulu izimolomaa zinimi zindinyu zia utamanyiliza, zilakuhuliriza.

⁷ Navuzwa siaveeye ho kali mulala ku vandu va Isiraeli uwaza avugiliri kukuhulira mba; kali si vanyara ku mbulira mba. Vosi vaveeye avahindagirizi kandi avataveeye vahuliri.

⁸ Kalunu ndakokola ove muhindagirizi kandi mululu kuli yavo.

⁹ Ndakokola ove utanyala kusundwa kuli lwanda, mudinyu kuli ligina liuvuguli; utatia vibaali yavo mba.”

¹⁰ Nyasaye yaazizagilira kovora, “Mwana wu Mundu, uhulirizi ligali ma wizulizi vindu viosi viangovoolera.

¹¹ Uzie kalunu ku vandu vi kivala chienyu avaveeye mu lihaminywa ma omolome kuvo kandi. Uvavoolere, ndi Inzi Yahova Wuvunyali mboraa kuvo, kali niiva valahulira anoho valasura kuhulira.”

¹² Maku Roho wa Nyasaye yang'inga igulu, kandi ndaahulira inyima wange muhuumu munene gwu mwoyo ugovolaa ndi, “Uvukumi vwa Yahova mwigulu igulu vwizominywe!”

¹³ Inzi ndahulira zimbaha zievilombe zikubaganaa harara mu vwerefu, kandi niliyoga lia magurudumu liahulirika kuli lidegera linene lie kivala.

¹⁴ Roho yang'inga igulu ma mambila ihale, kandi ndaazia mu vululu nu vutima, zinguru zia Yahova ziali na inzi.

¹⁵ Ndaazia ku vandu vilihaminywa avamenyaa ha Teli Abibu ahimbi nu mugera gwa Kebari. Ndaamenya hagati haavo mu ligenya ku madiku saba.

Yahova Yatovola Zacheli kuva Musikari

¹⁶ Lwa madiku saba gaavita Yahova yamoloma ni inzi.

¹⁷ Yavoola, “Mwana wu Mundu, Inzi ngokoraa musikari ku ihiiri ya Isiraeli. Ivi ulavavolera amiganihizu gangovolera.

¹⁸ Niiva ndakalandizi ndi umundu muchamu alakuza, navuzwa ivi uvuli kumwiganihiza agirung'ane kutura kuzinzira zizie kuduuka ahonyie livamwoyo lilie, alakuza naveeye mwoni, inzi ndakudula ku likuza lilie.

¹⁹ Navuzwa niiva uliganihiza umundu muchamu ma avuli koleka uvudamanu vwivwe, alakuza kigira uvwoni vwivwe; navuzwa ivi ulakehonyie.

²⁰ “Kandi niiva umundu mulungi alaleka uvulungi nokokola zimbi, ndavika chukwikigatala imbiri weve, na alakuza. Kigira si wamwiganihiza mba, alakuza kigira uvwoni vwivwe mwene. Amalungi goosi agayakola si galizulizwa mba, na ndakudula ku likuza lilie.

²¹ Niiva uliganihiza mundu mulungi aleke kokora uvwoni, ma ahuliri, alamenya ligali kigira yahulira lieganihiza, na ivi ulahonyia livamwoyo liilio.”

Zacheli si alamoloma Mba

²² Ndaahulira zinguru zinene zia Yahova kandi yambolera, “Tula uzie mu livona. Na ndamoloma na ivi wene yeyo.”

²³ Kunangwa ndaazia mu livona, na wene yeyo ndaalora uvukumi vwa Yahova, kuli ndaali nembololi ku mugera gwa Kebari. Ndaagwa hasi mamumama,

²⁴ navuzwa Roho wa Nyasaye yasingiriza. Yahova yambolera, “Uzie yengo ma wihaniri munyumba.

²⁵ Kandi ivi O, Mwana wu Mundu, ulavofwa ni migoye na si ulazia ichova mu vandu mba.

²⁶ Inzi ndakora lulimi lulwo luhande mu kikarangula kunangwa uvuli kuviganihiza kigira vaveeye avandu vu kwibaala.

²⁷ Maku, ndamoloma na ivi kandi ndakuha zungulu komoloma, ulavavolera aga inzi, Mwami munene Yahova, mboraa. Valala kuvo valahulira, navuzwa avandi valakuchaya, kigira eveeye ihiiri ya vandu vu kwibaala.”