Ezekieli 29 - KITABU KITAKATIFU

Ovoporofeti vwu Kudiviza Avandu va Egebeti

¹ Ku lidiku lie likomi nagaviri ku mweli gwi likomi gwu muhiga gwi likomi gwi lihaminywa lietu, Yahova yamoloma ninzi.

² Yavoola, “Mwana wu Mundu, ukalagiri mwami wa Egebeti. Umuvolere kuli oyo harara na vandu vosi va Egebeti valakahevwe mageri.

³ Omolome kandi ovoole, ndi yaga nigo aga Yahova Wuvunyali avooreraa Mwami wa Egebeti: Inzi mbeeye musigu woovo, ivi ingwina enene, egonaa mumugera. Ivi ovola ndi mugera gwa Naili nugwange kandi ndagolomba.

⁴ Ndavika zindohani muzisaya zizio, kandi ndakora zisuzi ziu mu migera zihande kuive. Inzi ndakungusa kutura mumugera gwa Naili, nizisuzi ziosi nizihaandi kuive.

⁵ Nangusiuvi muchangalangwe harara ni zisuzi yizio ziosi. Muviri gugwo nagugwi kumalova kandi si naguyavilwi mba. Nambane muviri gugwo ku zinyama ziu muvulimu na manyonyi gu muvwerefu kugulie.

⁶ Maku avandu vosi va Egebeti valakamanye ndi, inzi mbeeye Yahova.” Yahova avoora, “Avandu va Isiraeli veereda ku munyi avandu va Egebeti kigira ovokonyi, navuzwa simwali avalahi kuvita kisala kededekere mba.

⁷ Lwa veesedema ku munyi, mwaavunika, nivatozatoza mumaha gaavo, kandi numuvakola nivavunika migongo jiavo.

⁸ Maku kalunu, inzi, Yahova, ngovolera ndi ndanyoora avasaza kukwingilira ni vivavi, kandi valiita vandu vovo ni zinyama zizio.

⁹ Kivala cha Egebeti nakitigale amang'anye. Maku numanyilizi ndi inzi mbeeye Yahova. “Kigira wavoola ndi mugera gwa Naili nugugwo, kandi ni ivi wagolomba,

¹⁰ Inzi mbeeye musigu woovo kandi musigu wumugera gwa Naili. Ndakora kivala cha Egebeti choosi kuva mang'anye, kutura ku lidaala linene lia Migidoli ku lovega lwa Ivaale kuduuka ku lidaala linene lia Aswani kulovega lwi Isavaalu, kuduuka ku zinzako zia Ezopia.

¹¹ Umundu anoho zinyama si nazigende mu mba. Ku mihiga 40 ikindu si kilakamenye mu mba.

¹² Ndakora kivala cha Egebeti kuva hazwa ligali mulirova. Ku mihiga 40, madaala manene ga Egebeti galakave mang'anye; galava madamanu ligali kuvita lidaala lindi liosi. Ndakora vandu va Egebeti kuva avahambe. Valakirukili muvuli vivala kandi valakamenye hagati muvandu vandi.”

¹³ Yahova Wuvunyali avoora, “Inyima wi mihiga 40, ndakiranyie avandu va Egebeti kutura muvivala uwa ndakavasalanyiri,

¹⁴ kandi ndakavaleke vamenye Isavaalu wa Egebeti, yengo wavo wukutanga. Valakave nu vwami vodedekere,

¹⁵ vwami vodedekere mu vwosi, kandi si namwamiihi ku zihiiri zindi ziosi mba. Nambakore kuva avadedekere ligali kali si navamiihi zihiiri zindi ziosi kandi mba.

¹⁶ Avandu va Isiraeli si naverede kumunyi kigira vokonyi mba. Lidivizwa lia vandu va Egebeti nalizulizi avandu va Isiraeli ndi, vaakora vudamanu kwereda ku vandu va va Egebeti. Maku avandu va Isiraeli navamanye ndi Inzi mbeeye Yahova Wuvunyali.”

Mwami Nebukadineza Alakaguuti Avandu va Egebeti

¹⁷ Ku lidiku liu kutanga liu mweli gwu kutanga gwu muhiga gwa 27 gwi lihaminywa lietu, Yahova yamoloma ninzi.

¹⁸ Yavoola, “Mwana wu Mundu, mwami Nebukadineza yaatanga kwingilira vandu va Tiro. Yakola avasikari veve kuginga misigo miliduhu kuduuka mitwi jaavo nijigwa iviole kandi mavega gaavo nigafuvuka, navuzwa Mwami anoho iliihi lilie si lilanyoola mitungu ku miyinzi jene yijo mba.

¹⁹ Kunangwa kalunu yaga nigo aga inzi, Yahova Wuvunyali mboraa: Mbana kivala cha Egebeti ku mwami Nebukadineza. Alaranya uvuhinda vwosi vwa vandu va Egebeti kuli mitungu ji liihi lilie.

²⁰ Mali kuhaana kivala cha Egebeti kuli mitungu kigira liihi lilie liangolera miyinzi. Inzi, Yahova Wuvunyali mali kovora.

²¹ “Lwa gene yago nagekoleke, inzi ndakakole avandu va Isiraeli kuva ni zinguru. Ndakaleke ivi Zacheli, komoloma havulavu kunangwa vuli mundu akuhuliri. Heneyaho, valakamanye ndi inzi mbeeye Yahova.”